އޭޝިއާގެ އެންމެ މުއްސަނދި މީހާ ގޯތަމް އަދާނީގެ ކުންފުނިތަކުން މަކަރު ހަދާފައިވާ ކަމަށް ބުނެ އެމެރިކާގެ ކުންފުންޏަކުން ނެރެފައިވާ ރިޕޯޓަކީ ދުރާލާ ރާވައިގެން، އިންޑިއާއަށް ދިން ހަމަލާއެއް ކަމަށް އަދާނީ ގްރޫޕުން ބުނެފިއެވެ.
އަދާނީ ގްރޫޕުން، އެ ގުރޫޕުގައި ހިމެނޭ ކުންފުނިތަކަށް ލިބޭ އާމްދަނީއާ ބެހޭ ގޮތުން އޮޅުވާލާފައިވާ ކަމަށް ބުނެ މިދިޔަ ހަފުތާގައި ރިޕޯޓެއް ނެރެފައި ވަނީ، މާލީ މުއާމަލާތްތައް ކުރުމުގައި ކުށްކުރުމުގެ މައްސަލަތައް ދިރާސާކޮށް އިންވެސްޓް ކުރާ ކުންފުންޏެއް ކަމަށްވާ ހިންޑެންބާގް ރިސާޗްއިންނެވެ.
ހިންޑެންބާގްއިން ނެރެފައިވާ 100 ސަފުހާގެ ރިޕޯޓުގައިވާ ގޮތުން އަދާނީގެ ދަރަނި އިތުރުވަމުން ދިޔަ ނަމަވެސް، އޭނާ ވަނީ އޭނާގެ ކުންފުނިތަކުގެ އާމްދަނީ އާއި ހިއްސާގެ އަގުތައް އޭގެ އަސްލު އަދަދުތަކަށް ވުރެ އިތުރު ކަމަށް ދެއްކުމަށް ގަވާއިދާ ޚިލާފަށް އަމަލުކޮށްފައެވެ.
އެ ރިޕޯޓަށް ރައްދު ދިނުމަށް އަދާނީ ގްރޫޕުން ވަނީ 413 ސަފުހާގެ ލިޔުމެއް ނެރެފައެވެ. އެ ގްރޫޕުން ބުނީ ކުންފުނިތަކުގެ މުއާމަލާތްތަކުގައި އިންޑިއާގެ ހުރިހާ ގާނޫނަކާ އެއްގޮތަށް އަމަލުކޮށްފައިވާ ކަމަށާއި ގާނޫނީ ގޮތުން ހާމަކުރަން ޖެހޭ މިންވަރަށް މައުލޫމާތު ހާމަކޮށްފައިވާނެ ކަމަށެވެ.
މީގެ އިތުރުން ހިންޑެންބާގްގެ ރިޕޯޓަކީ ހެއްކެއް ނެތި، އެމެރިކާގެ ކުންފުންޏަކަށް ފައިދާ ހޯދުމުގެ މަގުސަދުގައި ނެރުނު ރިޕޯޓެއް ކަމަށް ވެސް އަދާނީ ގްރޫޕުން ވަނީ ތުހުމަތުކޮށްފައެވެ.
އަދާނީ ގުރޫޕުން އެހެން ބުނީ، ހިންޑެންބާގްއިން އެ ރިޕޯޓު ނެރުމުގެ ކުރިން، އަދާނީ ގްރޫޕުގެ ހިއްސާގެ އަގު ވެއްޓޭނެ ކަމަށް ލަފާކޮށް ފައިސާ އިންވެސްޓުކޮށްފައިވާތީއެވެ.
ހިންޑެންބާގްއިން ލަފާ ކުރި ގޮތަށް، ރިޕޯޓު ނެރުނު ފަހުން އަދާނީ ގްރޫޕުގެ ކުންފުނިތަކުގެ މާކެޓް ވެލިއު ވަނީ ކުރިއާއަޅާބަލާއިރު 50 ބިލިއަން ޑޮލަރު ދަށްވެފައެވެ. އަދި އަދާނީގެ އަމިއްލަ މިލްކިއްޔާތުގެ އަގު ވެސް ދަށަށް ގޮސް، ދުނިޔޭގެ ތިން ވަނައަށް އެންމެ މުއްސަނދި މީހާގެ މަގާމު އޭނާއަށް ވަނީ ގެއްލިފައެވެ.
ދުނިޔޭގެ އެންމެ މުއްސަނދި މީހުންގެ ލިސްޓުގައި އަދާނީގެ ނަން މިހާރު އޮތީ އަށް ވަނައިގައެވެ. އެއީ 88.2 ބިލިއަން ޑޮލަރުގެ މިލްކިއްޔާތަކާއެކުގައެވެ.
ހިންޑެންބާގްއިން ބުނެފައިވާ ގޮތުގައި އެ ކުންފުނިން އަދާނީއަށް ކުރި 88 ސުވާލުގެ ތެރެއިން 62 ސުވާލަކަށް އެ ގުރޫޕަށް ޖަވާބު ދެވިފައި ނުވެއެވެ.
އަދާނީ ގުރޫޕުން ނެރެފައިވާ ލިޔުމަށް ރައްދި ދެމުން ހިންޑެންބާގްއިން ބުނެފައިވަނީ އިންޑިއާއަކީ ކުރިއަރަމުން އަންނަ ހަރުދަނާ ޑިމޮކްރަސީއެއް އޮންނަ ގައުމެއް ކަމަށެވެ. އަދި އެ ގައުމަކީ ދުނިޔޭގެ ބޮޑު ބާރެއް ކަމަށް ގަބޫލުކުރާ ކަމަށް ވެސް އެ ކުންފުނިން ބުންޏެވެ.
އެހެންނަމަވެސް އިންޑިއާގެ ކުރިއެރުން އަދާނީ ގުރޫޕުން ހުއްޓުވާ ކަމަށް ވެސް ގަބޫލުކުރާ ކަމަށާއި އެ ކުންފުނިތަކުން ދަނީ ގައުމު ލޫޓުވަމުން ކަމަށް ހިންޑެންބާގް ކުންފުނިން ވަނީ ތުހުމަތުކޮށްފައެވެ.
ހިންޑެންބާގްގެ ރިޕޯޓާ ގުޅިގެން އެ ކުންފުންޏާ ދެކޮޅަށް "ގާނޫނީ ގޮތުން އެޅޭނެ ފިޔަވަޅުތައް" ބަަލަމުން އަންނަ ކަމަށް އަދާނީ ގުރޫޕުން ވަނީ މީގެ ކުރިން ބުނެފައެވެ.
މި މައްސަލަ ފެންމަތިވެފައި ވަނީ އަދާނީ ގްރޫޕުގެ އަދާނީ އެންޓަޕްރައިޒަސްގެ 2.5 ބިލިއަން ޑޮލަރުގެ ހިއްސާ މި ހަފުތާގައި ވިއްކަން އިއުލާންކޮށްފައި ވަނިކޮށެވެ.