'އިންޓަނޭޝަނަލް އެޖެންސީ ފޯ ރިސާޗް އިން ކެންސާ'ގެ ފަރާތުން ކެންސަރަށް މަގުފަހިވާ ކަމަށް ކަނޑައަޅާފައިވާ 14 ވައްތަރެއްގެ ޕެސްޓިސައިޑް ނުވަތަ ގަހުގައި އުޅޭ ތަފާތު ފަނިތައް މަރަން ބޭނުންކުރާ ކެމިކަލް، މިދިޔަ އަހަރު ރާއްޖެ އެތެރެކޮށްފައިވާ ކަމަށް ދިރާސާތަކުން ދައްކައިފިއެވެ.
އެންވައިރަމަންޓް މިނިިސްޓްރީގެ ބޭސްލައިން ކެމިކަލް ދިރާސާ މިއަދު އިފުތިތާހުކޮށްފައިވާއިރު އެ މިނިސްޓްރީން ބުނީ ދަނޑުވެރިކަމާއި އިމާރާތް ކުރުމާއި އޮޑިދޯނިފަހަރު ބަނުން ފަދަ އެކިއެކި ސިނާއަތްތައް ފުޅާވުމާ ގުޅިގެން ތަފާތު ވައްތަރުގެ ކެމިކަލް އެތެރެ ކުރުން އިތުރުވެފައިވާ ކަމަށެވެ. އޭގެ ތެރޭގައި އިންސާނުންގެ ސިއްހަތަށާއި ތިމާވެއްޓަށް ނުރައްކާތެރި ކެމިކަލް ބޭނުންކުރުން ވެސް އިތުރު ވެފައިވާ ކަމަށް އެ މިނިސްޓްރީން ފާހަގަކުރެއެވެ.
އެގޮތުން ދަނޑުވެރިކަމުގެ ސިނާއަތާއި އިމާރާތް ކުރުމުގެ ދާއިރާގައި ފަނިފަކްސާ އަދި އެކިއެކި ސޫފާސޫފި މަރަން ބޭނުންކުރާ ކެމިކަލްތައް ފާހަގަކުރެވޭ ކަމަށް އެ މިނިސްޓްރީން ބުންޏެވެ.
އެންވައިރަމަންޓް މިނިސްޓްރީން ބުނީ އެ ދިރާސާ ރިޕޯޓަކީ 2016 ވަނަ އަހަރު އެ މިނިސްޓްރީން ތައްޔާރުކުރި ކެމިކަލް ޕްރޮފައިލްގެ މައުލޫމާތު އަދާ ހަމަކޮށް، 2017 ވަނަ އަހަރުން ފެށިގެން 2021 ވަނަ އަހަރާ ހަމައަށް ރާއްޖެއަށް އެތެރެކުރި އަދި އެކިއެކި ސިނާއަތްތަކުގައި ބޭނުންކުރި ކެމިކަލްގެ ބާވަތްތަކާއި، ކެމިކަލް މާއްދާތައް ބޭނުންކޮށްފައިވާ އުފެއްދުންތައް ބޭނުން ކުރި ގޮތް ދެނެގަތުމަށް ކުރިއަށް ގެންދިޔަ ރިޕޯޓެއް ކަމަށެވެ.
އެ ދިރާސާ ރިޕޯޓުގައި ބުނީ 2017 ވަނަ އަހަރުން 2021 ވަނަ އަހަރާ ހަމައަށް އެކިއެކި ކެމިކަލް މާއްދާތަކާއި ކެމިކަލް ޕްރޮޑަކްޓްސް ރާއްޖެއަށް އެތެރެކުރި މިންވަރު އެއް އަހަރުން އަނެއް އަހަރަށް އިތުރުވެފައިވާ ކަމަށެވެ. އަދި 2021 ވަނަ އަހަރު ރާއްޖެއަށް 10 ބިލިއަން ރުފިޔާގެ ކެމިކަލް އެތެރެ ކޮށްފައިވާއިރު އޭގެ ތެރެއިން ހަތް ބިލިއަން ރުފިޔާ ހިއްސާ ކުރަނީ ހަކަތަ އުފެއްދުމަށް އެތެރެކުރި ތެލަށް ކަން ރިޕޯޓުގައި ފާހަގަކޮށްފައިވެއެވެ.
އޭގެ އިތުރުން 2020 ވަނަ އަހަރު ކުރިމަތިވި ކޮވިޑް-19ގެ ބަލިމަޑުކަމާ ގުޅިގެން ކެމިކަލް މާއްދާތައް އެތެރެކުރި މިންވަރު މަދު ކަމަށް އެ ދިރާސާއިން ދައްކައެވެ. ނަމަވެސް ޖަރާސީމު މެރުމަށް ބޭނުންކުރާ ޑިސްއިންފެކްޓެންޓް ބޭހުގެ ބާވަތްތަކާއި ގަސްކާނާ އެތެރެކުރި މިންވަރު އިތުރުވެފައިވާ ކަން ރިޕޯޓުގައި ފާހަގަކޮށްފައިިއެވެ.
ދިރާސާގައި ބުނީ އެކިއެކި ސޫފާސޫފި މެރުމަށް ބޭނުންކުރާ ކެމިކަލް ނުވަތަ އިންސެކްޓިސައިޑްސްގެ 229 ޓަނު 2017 ވަނަ އަހަރު އެތެރެ ކޮށްފައިވާއިރު، އެބާވަތުގެ ކެމިކަލްގެ 1292 ޓަނު 2021 ވަނަ އަހަރު އެތެރެކޮށްފައިވާ ކަމަށެވެ. އެއީ 2017 ވަނަ އަހަރާ އަޅާބަލާއިރު، 462 އިންސައްތަ އިތުރު އަދަދެކެވެ.
ފާއިތުވި ފަސް އަހަރަށް ބަލާއިރު އަކަ މީޓަރަކަށްވާވަރުގެ 217،661 ސިމެންތި ޝީޓް އެތެރެކޮށްފައިވާ ކަމަށް ވެސް ދިރާސާއިން ދައްކައެވެ. އަދި އެސްބެސްޓޯސް އެކުލެވޭ 126،225 އަކަމީޓަރުގެ ސިމެންތި ޓިނު ޝީޓް ވެސް ހަމަ އެ މުއްދަތުގައި ރާއްޖެ އެތެރެކޮށްފައިވެއެވެ.
އޭގެ އިތުރުން ފާއިތުވި ފަސް އަހަރުގެ ތެރޭގައި އޮޑިދޯނި ފަހަރު ބަނުމަށް 1.35 ޓަނުގެ ސްޓައިރީން ރާއްޖެ އެތެކޮށްފައިވާ ކަމަށް ދިރާސާއިން ދައްކައެވެ. އެސްބެސްޓޯސް އަދި ސްޓައިރީން އަކީ ކެންސަރަށް މަގުފަހިކުރުވާ މާއްދާތަކެކެވެ.
އެ މާއްދާތައް ބޭނުންކުރާ ސިނާއަތްތަކުގައި މަސައްކަތްކުރާ ފަރާތްތަކާއި އެފަދަ މާއްދާ އެކުލެވޭ ކުނި ނައްތާލުމުގައި ހަރަކާތްތެރިވާ މީހުންނަށް އެ ދެ މާއްދާއިން ވެސް ނޭދެވޭ އަސަރު ކުރެއެވެ.
އެންވައިރަމަންޓް މިނިސްޓްރީން ބުނީ އެ ދިރާސާއިން ފާހަގަވި ކަންތައްތަކަށް ރިއާޔަތްކޮށް، ރާއްޖޭގެ ނާޒުކު ތިމާވެއްޓާއި އިންސާނުންގެ ސިއްހަތަށް ކެމިކަލްތަކުގެ ސަބަބުން ކުރިމަތިވާ ނޭދެވޭ އަސަރުތަކަށް ހައްލު ހޯދުމަށް މަގުފަހިވެގެން ދާނެ ކަމަށެވެ.