ސްޕެއިންގެ ގައުމީ ސްކޮޑުގައިއާއި ބާސެލޯނާގެ މެދުތެރެ ބެލެހެއްޓުމުގައި އިސް ދައުރެއް އަދާކުރަމުން އަންނަ ޒުވާން ތަރިން ކަމުގައިވާ ޕެޑްރީއާއި ގަވީ، އެ މަގާމު ކުރިން އަދާކުރި އަންދްރެސް އިނިއެސްޓާއާއި ޒަވީ ހެނާންޑޭޒްއަށްވުރެ މޮޅު ކަމަށް، ބާސާއަށް ކޯޗުކޮށްދެމުން އަންނަ ޒަވީ ބުނެފިއެވެ.
ސްޕެއިންގެ ނޫހަކަށްދިން އިންޓަވިއުއެއްގައި ވާހަކަދައްކަމުން ޒަވީ ބުނީ، ޒުވާން ދުވަސްވަރުގައި ބާސާއާއި ސްޕެއިންގެ މެދުތެރެ ބެލެހެއްޓުމުގައި އޭނާއާއި އިނިއެސްޓާ އަދާކުރަމުންދިޔަ ދައުރަށްވުރެ ފުރިހަމައަށް، ޕެޑްރީއާއި ގަވީ އެ ދައުރު މިހާރު އަދާކުރަމުން އަންނަ ކަމަށެވެ.
ޒަވީ ބުނީ ބާސާގެ މިހާރުގެ ޒުވާން ކުޅުންތެރިންނަކީ އެ ކްލަބުން މިހާތަނަށް ފެނުނު އެންމެ މޮޅު ކުޅުން ކަމަށާއި އުމުރުން 20 އަހަރުގައި އޭނާއާއި އިނިއެސްޓާގެ ކުޅުމުގެ ފެންވަރު ޕެޑްރީއާއި ގަވީ މިހާރު ކުޅެމުން އަނަން ފެންވަރާއި ނުބައްދަލު ކަމަށެވެ.
ޒަވީ ގަބޫލު ކުރާގޮތުގައި މި ދެ ކުޅުންތެރިންނާއެކު ބާސެލޯނާއަށް ފުޓުބޯޅައިގައި ގިނަ ކާމިޔާބީތަކެއް ހޯދައި، 2019 ވަނަ އަހަރަށްފަހު ސްޕެނިޝް ލަލީގާގެ ޓްރޮފީ އުފުލާލުމުގެ ފުރުސަތު ބޮޑެވެ.
އިނިއެސްޓާއާއި ޒަވީ އަކީ ފުޓުބޯޅައިގެ ތާރީޚު ދުށް އެންމެ ކާމިޔާބު، އެންމެ ހުނަރުވެރި ދެ މިޑްފީލްޑަރުންނެވެ. މި ދެ ކުޅުންތެރިންގެ ޑްރިބްލިންގް ހުނަރާއި، ތޫނުފިލިކަމުގެ އެހީގައި ސްޕެއިންއާއި ބާސެލޯނާއިން ފުޓުބޯޅައިގައި ގިނަ ކާމިޔާބީތަކެއް ވަނީ ހޯދާފައެވެ.
ޒަވީއާއި އިނިއެސްޓާ --ފޮޓޯ/ގެޓީ އިމޭޖަސް
"ޓިކި ޓަކާ"ގެ އެހީގައި މި ދެ ކުޅުންތެރިން ވަނީ ބާސާއާއެކު ޔޫއެފާ ޗެމްޕިއަންސް ލީގު ތިން ފަހަރު، ސްޕެނިޝް ލަލީގާ ފަސް ފަހަރު، ސުޕާ ކަޕް ތިން ފަހަރު އަދި ކޮޕާ ޑެލްރޭ ވެސް ތިން ފަހަރަށް ކާމިޔާބު ކޮށްފައެވެ. އަދި ސްޕެއިންގެ ގައުމީ ޓީމަށް މި ދެ ކުޅުންތެރިންގެ ޖާދޫގެ އެހީގައި 2010 ވަނަ އަހަރުގެ ފީފާ ވޯލްޑް ކަޕާއި 2012 ވަނަ އަހަރުގެ ޔޫރޯ މުބާރާތް ކާމިޔާބު ކުރެވިފައި ވެއެވެ.
ދެހާސް އެއްވަނަ އަހަރު ބާސާގެ ބީ ޓީމުން ސީނިއާ ކެރިއަރު ފަށައި 2018 ވަނަ އަހަރާއި ދެމެދު އެ ކުލަބަށް ކުޅެދިން އިނިއެސްޓާ ވަނީ އެ ޓީމަށް ކުޅެދިން 674 މެޗުން 57 ލަނޑު ކާމިޔާބު ކޮށްދީ 138 އެސިސްޓު ކޮށްދީފައެވެ. 1997 ވަނަ އަހަރާއި 2015 ވަނަ އަހަރާއި ދެމެދު ބާސާގައި ހޭދަކުރި މުއްދަތުގެ ތެރޭގައި ޒަވީ ވަނީ އެ ޓީމަށް ކުޅެދިން 767 މެޗުން 85 ލަނޑު ކާމިޔާބު ކޮށްދީ 185 އެސިސްޓު ކޮށްދީފައެވެ.
ކުޅުންތެރިއެއްގެ ގޮތުގައި ކެރިއަރު ހުށްޓާލައި ކޯޗިންގް ކެރިއަރު ޒަވީ ފެށީ 2019 ވަނަ އަހަރު ގަތަރުގެ އަލް ސާދް ކުލަބުންނެވެ. އެއަށްފަހު ބާސާގެ ސީނިއާ ޓީމުގެ ކޯޗުކަމާ ޒަވީ ހަވާލުވީ 2021 ވަނަ އަހަރުގެ ތެރޭގައެވެ. ބާސާއިން ވަކިވުމަށްފަހު އަދިވެސް ފުޓުބޯޅަ ކުޅެމުން އަންނަ އިނިއެސްޓާ 2018 ވަނަ އަހަރުން ފެށިގެން ކުޅެމުން އަންނަނީ ޖަޕާނުގެ ވިސޭލް ކޯބޭ ނަމަކަށް ކިޔާ ކުލަބަށެވެ.
ޕަބްލޯ ގަވީ (ކ) އަދި ޕެޑްރީ (ވ) --ފޮޓޯ/ގެޓީ އިމޭޖަސް
އުމުރުން 18 އަހަރުގެ ގަވީ 2021 ވަނަ އަހަރުގެ ތެރޭގައި ބާސާގެ ސީނިއާ ޓީމަށް ކުޅެން ފެށިއިރު މިހާތަނަށް އައިއިރު އޭނާ އެޓީމަށް ކުޅެދިން 66 މެޗުން ދެ ލަނޑު ޖަހައިދީ ހަތް އެސިސްޓު ވަނީ ކޮށްފައެވެ. އަދި އުމުރުން 20 އަހަރުގެ ޕެޑްރީ 2020 ވަނަ އަހަރު ބާސާގެ ސީނިއާ ޓީމަށް ކުޅެން ފެށިއިރު މިހާތަނަށް އެޓީމަށް ކުޅެދިން 93 މެޗުން 12 ލަނޑު ޖަހައިދީ ހަތް އެސިސްޓު ކޮށްދީފައިވެއެވެ.
ގަވީ ވަނީ ސްޕެއިންގެ ސީނިއާ ގައުމީ ޓީމަށް 17 މެޗު ކުޅެދީ ތިން ލަނޑު ކާމިޔާބު ކޮށްދީފައެވެ. މިހާތަނަށް ގައުމީ ޓީމަށް 18 މެޗު ކުޅެދީފައިވާ ޕެޑްރީއަށް އަދި ގައުމީ ޖާޒީގައި ލަނޑެއް ޖެހިފައެއް ނުވެއެވެ.