އެމްޑީޕީގެ ގައުމީ މަޖިލީހުގެ މެންބަރުންނާއި ބައްދަލުކުރައްވައި، އެޕާޓީގެ ރިޔާސީ ޕްރައިމަރީގައި ވާދަކުރައްވާނެކަން ހާމަކުރައްވައި އެންމެ މެންބަރުންގެ ތާއީދަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް އެދިވަޑައިގެންފިއެވެ.
އެޕާޓީގެ ރިޔާސީ ޕްރައިމަރީ އަންނަ ޖެނުއަރީ މަހުގެ 28 ވަނަ ދުވަހު ބޭއްވުމަށް ނިންމައި, ވާދަކުރުމުގެ ފުރުސަތު ވަނީ ހުޅުވައިލައިފައެވެ. އެހެންވެ، އެ އިންތިޚާބުގައި ވާދަކުރައްވާނެކަން ހިއްސާކޮށް، ގައުމީ މަޖިލީސް މެންބަރުންގެ އެއްބާރުލުމާއި ތާއީދަށް އެދުމަށް ރައީސް ޞާލިހް ވަނީ އެ މެންބަރުންނާ ބައްދަލުކުރައްވާފައެވެ.
ސޯލްޓް ކެފޭގައި ރޭ ބޭއްވި އެ ބައްދަލުކުރެއްވުމުގައި ގައުމީ މަޖިލީހުގެ ދެބައިކުޅަ އެއްބަޔަށްވުރެ ގިނަ މެންބަރުން ވަނީ ބައިވެރިވެލައްވާފައެވެ. ޚާއްސަކޮށް، މީގެ ކުރިން ރައީސާއި ސަރުކާރަށް ވަރަށް ބޮޑަށް ފާޑުވިދާޅުވަމުން ގެންދެވި ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމާއި އިނގުރައިދޫ ދާއިރާގެ މެންބަރު ހަސަން އަހުމަދު (ހަސަންޓޭ) ހިމެނިވަޑައިގަންނަވައެވެ.
ބައްދުލުވުމުގެ ތަފުސީލު "ސަން" އާ ހިއްސާ ކުރައްވަމުން މަކުނުދޫ ދާއިރާގެ މެންބަރު މުހައްމަދު ރާއީ ވިދާޅުވީ ގައުމީ މަޖިލީހުގެ މެންބަރުންނާއި ރައިސް ބައްދަލުކުރެއްވީ ރަސްމީކޮށް ނޫން ކަމަށެވެ. އެކަމަކު، މި ބައްދަލުކުރެއްވުމުގައި އެމަނިކުފާނު ރިޔާސީ ޕްރައިމަރީގައި ވާދަކުރައްވާނެކަން މެންބަރުންނާ ހިއްސާ ކުރެއްވި ކަމަށާއި އަދި، އެކަމަށްޓަކައި އެންމެ މެންބަރުންގެ ތާއީދާއި އެއްބާރުލުން ދެއްވުމަށް އެދިވަޑައިގެންނެވި ކަމަށް ރާއީ ވިދާޅުވިއެވެ.
"ރައްޔިތުންގެ މަޖިލީހުގެ މެންބަރުންނާއި، ޕާޓީގެ ދާއިރާތަކުގެ ރައީސުންނާއި މި ބޭބޭފުޅުންގެ އެއްބާރުލެއްވުމަށް އެމަނިކުފާނު އެދިވަޑައިގެންނެވީ،" އޭނާ ވިދާޅުވިއެވެ.
ދެވަނަ ދައުރެއްގެ ޝައުގުވެރިކަން ރައީސް އެންމެ ފުރަތަމަ ފާޅުކުރައްވައިފައިވަނީ މިދިޔަ ޖޫން މަހުގެ އަށްވަނަ ދުވަހު ބޭއްވި ނޫސްވެރިންގެ ބައްދަލުވުމެއްގައެވެ. އެދުވަހަށް ފަހުގައި އެމަނިކުފާނުގެ އަރިސް ބޭބޭފުޅުން ގެންދަވަނީ ނުރަސްމީކޮށް ކެމްޕޭން ކުރައްވަމުންނެވެ.
ރައީސްގެ އިތުރުން، އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވެސް ވަނީ ޕްރައިމަރީގައި ވާދަކުރައްވާނެކަން އިއުލާނު ކުރައްވާފައެވެ. އެއާއެކު އެމަނިކުފާނުގެ އަރިސް ބޭފުޅުން ވެސް މިހާރު ގެންދަވަނީ އެމަނިކުފާނަށް ތާއީދު ހޯދުމުގެ މަސައްކަތް ކުރައްވަމުންނެވެ.
އެމްޑީޕީގެ ޕްރައިމަރީގައި ވާދަކުރައްވަން ޝައުގުވެރިވާ ބޭފުޅުން 500 މެންބަރުންގެ ތާއީދު ފޯމާއެކު އަންނަ ހޮނިހިރު ދުވަހުގެ ހަވީރު ހަތަރެއް ޖެހުމުގެ ކުރިން ފޯމް ހުށަހަޅަން ޖެހެއެވެ.
އެމްޑީޕީގެ ޕްރައިމަރީ ބާއްވަން އިއުލާނުކޮށްފައިވަނީ އެޕާޓީ ތެރޭ ވަރަށް ބޮޑަށް ބައިބައިވުން އުފެދި، ޕާޓީ ދެކަފިވެފައިވަނިކޮށެވެ.
ދެ ރައީސުންގެ މެދުގައި ނުތަނަވަސްކަން ބޮޑުވެފައިވަނީ ވެރިކަމުގެ ނިޒާމާ ގުޅޭ ގޮތުންނެވެ. އެގޮތުން ދައުރުގެ މެދުން ބޮޑުވަޒީރުކަމަށް ވަޑައިގަތުމުގެ ޝައުގުވެރިކަން ނަޝީދުގެ ހުންނެވި ނަމަވެސް ރައީސް ޞާލިޙް ގެންދަވަނީ ފާޅުގައި ރިޔާސީ ނިޒާމަކަށް ތާއީދުކުރައްވަމުންނެވެ.