ހދ. ނޮޅިވަރަމްގައި މަރާލާފައި އޮއްވާ ފެނުނު އެރަށު ހިތަށްފިނިވާގޭ ނިޝާމާ މުޙައްމަދު، 28،ގެ ގާތިލް ކަމަށް ބެލެވޭ އޭނާގެ ފިރިމީހާ، އދ. ފެންފުށި ރޯޒީ ވިލާ، އަބޫބަކުރު ފައިސަލްގެ ހަށިގަނޑު މިރޭ މާލެ ގެނެސްފިއެވެ.
ފުލުހުންގެ މީޑިއާ އޮފިޝަލް "ސަން"އަށް ވިދާޅުވީ ފައިސަލް އަބޫބަކުރުގެ ހަށިގަނޑު މިހާރު މާލެ ގެނެސްފައިވާ ކަމަށެވެ.
"އަބޫބަކުރު ފައިސަލްގެ ހަށިގަނޑު މާލެ ގެނައުމަށްފަހު. މިރޭ ވަނީ އާއިލާއާ ހަވާލުކޮށްފަ،" އޮފިޝަލް ވިދާޅުވިއެވެ.
ފުލުހުން ބުނެފައިވަނީ ފައިސަލް މަރުވީ މިއަދު ހެނދުނު 8:28 ގައި ކަމަށެވެ.
ކަށުނަމާދު ޕޭޖުގައިވާ ގޮތުން ފައިސަލްގެ މައްޗަށް ކުރެވޭ ކަށުނަމާދު އޮންނާނީ މަސްޖިދު ތަޢާވުން، އާސަހަރާ މިސްކިތުގައި މިރޭ 11:30ގައެވެ.
"ސަން"އަށް އެނގިފައިވާ ގޮތުގައި އޭނާ މަރުވީ އޭނާގެ ސިކުނޑި އެއްކޮށް މަސައްކަތްކުރުން ހުއްޓި ޑޮކްޓަރުން އުންމީދު ކަނޑައިލައިފައިވަނިކޮށެވެ.
ފައިސަލް، ހދ. ކުޅުދުއްފުށީ ޕޮލިސް ސްޓޭޝަންގައި ބަންދުކޮށްފައި ހުރި ގޮޮޅީގައި ދަން ޖެހިގެން، ކުޅުދުއްފުށީ ހޮސްޕިޓަލަށް ގެންދިޔައީ މިދިޔަ އަންގާރަ ދުވަހުގައެވެ. އޭނާއަށް ފަރުވާދެމުން އައީ އެ ހޮސްޕިޓަލުގެ އައިސީޔޫގައެވެ.
މިމަހުގެ 10 ވަނަ ދުވަހު ނިޝާމާ މަރުވެފައި އޮއްވައި ފެނުނީ އޭނާ ދިރިއުޅެމުންދިޔަ ގޭގެ ކޮޓަރި ތެރެއިންނެވެ.
ނިޝާމާގެ ހަށިގަނޑު ވެސް މިހާރު އޮތީ މާލެ ގެނެސް މޯޗަރީގައެވެ. އޭނާގެ ޕޯސްޓްމޯޓަމް ހަދަން ރާއްޖޭއިން ބޭރަށް ގެންދިޔުމުގެ ތައްޔާރީތައް ފުލުހުން ވަނީ ފަށާފައެވެ.