މެލޭޝިއާއަކީ ކިތަންމެ ވަރުގަދަ ޓީމެއް ނަމަވެސް ރާއްޖެއަށް އެ ޓީމު ބަލިކުރެވޭނެކަމަށް ރާއްޖޭގެ ގައުމީ ޓީމުގެ އިތުބާރު ޑިފެންޑަރު ސަމޫހު އަލީ (ސަމުއްޓޭ) ބުނެފިއެވެ.
ބައިނަލްއަގްވާމީ އެކުވެރި ކަމުގެ މެޗެއްގައި މާދަމާ މެލޭޝިއާއާ ދެކޮޅަށް ރާއްޖޭގެ ގައުމީ ފުޓުބޯޅަ ޓީމު ބައްދަލުކުރަން ހަމަޖެހިފައިވާ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން ސަމުއްޓޭ ބުނީ މެލޭޝިއާއިން ކުޅެނީ ވަރަށް އަވަސް ފުޓުބޯޅައެއްކަމަށެވެ.
މީގެއިތުރުން އެ ގައުމުގެ އެޓޭކުތަކަކީ ވަރަށް އަވަސް އެޓޭކުތަކެއް ކަމަށާއި، އެ ގައުމަކީ ވަރުގަދަ ޓީމެއްކަން ގަބޫލުކުރާކަަމަށް ވެސް ސަމުއްޓޭ ބުނެފައިވެއެވެ. އެހެންނަމަވެސް ރާއްޖެއަށް މެލޭޝިއާ ބަލުކުރެވޭނެކަމަށް ސަމުއްޓޭ ބުންޏެވެ.
ސަމުއްޓޭ މި މޭރުމުން ވާހަކަދެއްކިއިރު ފީފާގެ ދުނިޔޭގެ ރޭންކިންގައި ރާއްޖެއަށް 154 ވަނަ ލިބޭއިރު މެލޭޝިއާ އޮތީ ރޭންކިންގެ 146 ވަނައިގައެވެ.
ރާއްޖޭގެ ގައުމީ ޓީމުގެ މިހާރުގެ ކޯޗު މޮރިއޭރޯ ވަނީ ގައުމީ ޓީމަށް ރަނގަޅު ނަތީޖާތަކެއް ނެރެދީފައެވެ. އެގޮތުން މޮރިއޭރޯ އިރުޝާދުގެ ދަށުން ގައުމީ ޓީމުން މިހާތަނަށް ވަނީ ނުވަ މެޗެއް ކުޅެފައެވެ. އޭގެތެރެއިން ހަތަރު މެޗުން މޮޅުވިއިރު، ތިން މެޗުން ވަނީ ބަލިވެފައެވެ. އަދި އަނެއް ދެ މެޗު ނިމުނީ އެއްވަރުވެގެންނެވެ.
ރާއްޖެ މޮޅުވީ މި އަހަރު ބަންގްލަދޭޝާ ދެކޮޅަށް ކުޅުނު އެކުވެރިކަމުގެ މެޗާއި އޭޝިއަން ކަޕް ކޮލިފައިންގައި ސްރީލަންކާ އަތުންނާއި ސެޕްޓެމްބަރު މަހު ކުޅުނު އެކުވެރިކަމުގެ ދެ މެޗުގައި ބްރުނާއީ ދާރުއްސަލާމާއި ލާއޯސް އަތުންނެވެ.
ރާއްޖެ ބަލިވީ މިދިޔަ އަހަރުގެ ފޯ ނޭޝަންސް ކަޕްގައި ބަންގްލަދޭޝް އަތުންނާއި މި އަހަރު އޭޝިއަން ކަޕް ކޮލިފައިންގައި ތައިލެންޑާއި އުޒްބެކިސްތާންއާ ދެކޮޅަށް ކުޅުނު މެޗުތަކުންނެވެ.
އެއްވަރުވީ މިިދިޔަ އަހަރު ނޮވެމްބަރު މަހު ފޯ ނޭޝަންސް ކަޕްގައި ސްރީލަންކާ އާއި ސީޝެލްސްއާ ދެކޮޅަށް ކުޅުނު މެޗުތަކުގައެވެ.
މާދަމާ މެލޭޝިއާއާ ދެކޮޅަށް ކުޅޭ މެޗަކީ ގައުމީ ޓީމާއެކު މޮރިއެރޯ އެއްބަސްވުން އައުކުރިފަހުން އޭނާގެ އިރުޝާދާއެކު ގައުމީ ޓީމު ކުޅޭނެ ފުރަތަމަ މެޗެވެ.
މެލޭޝިއާގެ ބުކިޓް ޖަލީލް ނޭޝަނަލް ސްޓޭޑިއަމުގަ މާދަމާ މެލޭޝިއާއާ ދެކޮޅަށް ކުޅޭ މެޗަށްފަހު މިމަހުގެ 17 ވަނަ ދުވަހު ރާއްޖޭގެ ގައުމީ ޓީމުން ސިންގަޕޫރާ ދެކޮޅަށް ސިންގަޕޫރުގެ ޖަލަން ބިސާރް ސްޓޭޑިއަމުގައި ކުޅޭނެއެވެ.