އިންޑިއާގެ ވެރިކަން ކުރާ ބާރަތިޔަ ޖަނަތާ ޕާޓީ (ބީޖޭޕީ)އިން ގުޖުރާތު ސްޓޭޓުގެ ގާނޫނު ހަދާ މަޖިލީހުގެ އިންތިޚާބުން ތަފާތު ބޮޑު ނަތީޖާއަކާއެކު، ތާރީޚީ ކާމިޔާބީއެއް ހޯދައިފިއެވެ.
އެ ގައުމުގެ ބޮޑުވަޒީރު ނަރެންދުރަ މޯދީގެ އުފަން ސްޓޭޓްކަމަށްވާ ގުޖުރާތުގައި މިއީ އެޕާޓީން ގާނޫނު ހަދާ މަޖިލީހުގެ އަޣުލަބިއްޔަތު ޖެހިޖެހިގެން ހޯދި ހަތް ވަނަ ދައުރެވެ.
އިންޑިއާގެ އިލެކްޝަންސް ކޮމިޝަނުން މިއަދު އާންމުކުރި ނަތީޖާއިން ދައްކާ ގޮތުގައި ގުޖުރާތުގެ ގާނޫނު ހަދާ މަޖިލީހުގެ 182 ގޮނޑީގެ ތެރެއިން 156 ގޮނޑި ކާމިޔާބު ކުރީ ބީޖޭޕީއިންނެވެ.
އެންމެ ފަހުން 2017 ވަނަ އަހަރު ބޭއްވި ގުޖުރާތުގެ ގާނޫނު ހަދާ މަޖިލީހުގެ އިންތިޚާބުގައި ބީޖޭޕީން ކާމިޔާބުކުރީ 99 ގޮނޑިއެވެ.
ތަޖުރިބާކާރުން ބުނާ ގޮތުގައި ގުޖުރާތުގައި ލިބުނު މި ކާމިޔާބީގެ ސަބަބުން، 2024 ވަނަ އަހަރު ބޭއްވުމަށް ހަމަޖެހިފައިވާ އާންމު އިންތިޚާބުގެ ކުރިން ބީޖޭޕީގެ މަގުބޫލުކަން އިތުރުވާނެއެވެ. އެއާއެކު މޯދީއަށް ތިން ވަނަ ދައުރެއް ލިބުމުގެ ފުރުސަތު ބޮޑުވާނެއެވެ.
ދެ މަރުހަލާއަކަށް ބަހާލައިގެން ކުރިއަށްގެންދިޔަ އެ އިންތިޚާބުގެ ނަތީޖާއިން ދައްކާގޮތުގައި، 2017 ވަނަ އަހަރު 77 ގޮނޑި ކާމިޔާބުކުރި އިދިކޮޅު ކޮންގްރެސް ޕާޓީއަށް މިފަހަރު ލިބުނީ ގުޖުރާތުގެ އެންމެ 17 ގޮނޑިއެވެ. އަދި ދިއްލީއާއި ޕަންޖާބުގެ ގާނޫނު ހަދާ މަޖިލީހަށް މެންބަރުން ހޮވުމަށް މިއަހަރުގެ ކުރީކޮޅު ބޭއްވި އިންތިޚާބުތަކުން ކުރި ހޯދި އާމް އާދުމީ ޕާޓީ (އޭއޭޕީ)އަށް ގުޖުރާތުން ލިބުނީ އެންމެ ފަސް ގޮނޑިއެވެ.
ނިއުދިއްލީގެ ޖަވާހަރުލާލް ނެހްރޫ ޔުނިވަސިޓީގައި ޕޮލިޓިކަލް ސައިންސް ކިޔަވައިދޭ ޓީޗަރަކާ ހަވާލާދީ އަލްޖަޒީރާއިން ބުނެފައިވާގޮތުގައި ގުޖުރާތުގައި ބީޖޭޕީއަށް ލިބުނު ކާމިޔާބީއިން ދައްކުވައިދެނީ ބީޖޭޕީއަށް ހިންދޫންގެ ވޯޓު އިތުރުވެފައިވާ ކަމެވެ.
އިންޑިއާގެ ބޮޑުވަޒީރު ނަރަންދުރަ މޯދީ އިންޑިއާގެ ގުޖުރާތުގައި ކެމްޕެއިން ކުރައްވަނީ -- ފޮޓޯ/ ރޮއިޓާސް
ގުޖުރާތުގައި ހުންނަ ބީޖޭޕީގެ ތަރުޖަމާނު ޔަގްނޭޝް ޑޭވް ވިދާޅުވީ ކުރިން ކޮންގްރެސް ޕާޓީ ކާމިޔާބުކުރި މުސްލިމް ސަރަހައްދުތަކުގައި ވެސް އޭނާގެ ޕާޓީން ކާމިޔާބު ހޯދާފައިވާ ކަމަށެވެ. އެހެންކަމުން މުސްލިމުންގެ ތާއިދުވެސް އެ ޕާޓީއަށް އޮތްކަން ހާމަވާ ކަމަށް އޭނާ ވިދާޅުވިއެވެ.
ގުޖުރާތުގެ އިންތިޚާބާ ދިމާކޮށް މޯދީއާއެކު ހޯމް މިނިސްޓަރު އަމިތު ޝާހު ވަނީ ގާތްގަނޑަކަށް މަހެއްހާ ދުވަސް ވަންދެން ގުޖުރާތުގައި ވަރުގަދައަށް ކެމްޕޭންކޮށް، އެތައް އެއްވުމަކާއި ރޯޑްޝޯތަކެއް ބާއްވާފައެވެ.
ގުޖުރާތުގެ އަހުމަދުއާބާދުގައި މަސައްކަތް ކުރާ މައިނޯރިޓީ ރައިޓްސް އެކްޓިވިސްޓެއްކަމަށްވާ ކަލީމް ސިއްދީގް އަލްޖަޒީރާއަށް ބުނި ގޮތުގައި އެ އިންތިޚާބުގައި ބީޖޭޕީއިން ވޯޓު ހޯދުމަށް މުސްލިމުންނާ ދެކޮޅަށް ކެމްޕޭނެއް ކުރިއެވެ.
އިންޑިއާ މިނިވަންވި ފަހުން އެގައުމުގައި ހިނގި އެންމެ އަނިޔާވެރި ދީނީ ހަމަނުޖެހުން ހިނގީ 2002 ވަނަ އަހަރު ގުޖުރާތުގައެވެ. އެއީ އެ ސްޓޭޓުގެ ޗީފް މިނިސްޓަރުކަމާ މޯދީ ހަވާލުވެވަޑައިގެންނެވިތާ ކުޑަ ދުވަސްކޮޅެއް ފަހުންނެވެ.
އިންޑިއާގެ 29 ސްޓޭޓުގެ ތެރެއިން ދިހަވަރަކަށް ސްޓޭޓު މިހާރު ކޮންޓްރޯލް ކުރަނީ ބީޖޭޕީ އާއި އެޕާޓީއާ ގުޅިފައިވާ ޕާޓީތަކުންނެވެ.