ބޮޑީބިލްޑިންގެ ދުނިޔޭގެ ފެޑެރޭޝަން، ވޯލްޑް ބޮޑީބިލްޑިން އެންޑް ފިޒީކް ފެޑެރޭޝަން (ޑަބްލިއުބީޕީއެފް)ގެ ނައިބު ރައީސްގެ މަގާމަށް، އިބްރާހިމް ހަމީދު (އިއްބެ) އިންތިޚާބު ކޮށްފިއެވެ.
އިއްބެ އަކީ ރާއްޖޭގެ ބޮޑީބިލްޑިން އެސޯސިއޭޝަން (ބީބީއޭއެމް)ގެ ރައީސްއެވެ.
ދުނިޔޭގެ ބޮޑީބިލްޑިންގް ފެޑެރޭޝަނުގެ ނައިބު ރައީސްގެ މަގާމަށް އިއްބެ ހޮވުނީ، ތައިލެންޑްގެ ޕުކެޓްގައި މިހާރު ކުރިއަށްދާ ދުނިޔޭގެ ބޮޑީބިލްޑިން ޗެމްޕިއަންޝިޕްގެ ތެެރެއިން ކުރިއަށްދިޔަ ދުނިޔޭގެ ބޮޑީބިލްޑިން އެންޑް ފިޒީކް ފެޑެރޭޝަންގެ އިންތިހާބުގައެވެ. އޭނާއާ ވާދަކޮށްފައި ވަނީ އިރާންގެ އާމިރުއާ ވާދަކޮށްގެންނެވެ.
މި މަގާމަށް އިއްބެ އިންތިޚާބު ކުރުމަށް، ގިނަ ގައުމުތަކެއްގެ ފުރިހަމަ ތާއީދު ލިބުނުކަން ފާހަގަކޮށްލެވެއެވެ. އިއްބެއަށް ދުނިޔޭގެ ގިނަ ގައުމުތަކެއްގެ ތާއީދު ލިބުނީ، މި އަހަރު މާފުށީގައި ބޭއްވި އޭޝިއާގެ 54 ވަނަ ބޮޑީ ބިލްޑިންގް އަދި ފިޒިކްސް ސްޕޯޓްސް ޗެމްޕިއަންޝިޕްގެ ތެރެއިން ކުރެވުނު ފުރިހަމަ މަސައްކަތްތަކުގެ ސަބަބުން ކަމަށް ބެލެވެއެވެ.
އިއްބެ އަކީ ރާއްޖޭގައި މި ކުޅިވަރު ކުރިއަރުވަން ނުހަނު ގިނަ މަސަައްކަތްތަކެއް ކޮށްފައިވާ އަދި މިއަދުވެސް އެފަދަ ގިނަ މަސައްކަތްތަކެއް ކުރަމުން އަންނަ ފަރާތެކެވެ.
އިއްބެ އަކީ ބޮޑީބިލްޑިންގެ ބައިނަލްއަގުވާމީ ފެންވަރުގެ ޖަޖެއްވެސް މެއެވެ. އެކި ގިންތިތަކުގެ މުބާރާތްތަކުގައި ޖަޖެއްގެ ގޮތުގައި އިއްބެ އިންސާފުކޮށްފައިވެއެވެ. އެގޮތުން އިއްބެ ހަރަކާތްތެރިވި މުބާރާތްތަކަށް ބަލާއިރު، ވޯލްޑް ޗެމްޕިއަންޝިޕް، އޭޝިއަން ޗެމްޕިއަންޝިޕް، ސައުތު އޭޝިއަން ޗެމްޕިއަންޝިޕްގެ އިތުރުން ފާއިތުވި އަހަރު ބޭއްވި ސައުތު އީސްޓް އޭޝިއަން ގޭމްސްގައިވެސް އިއްބެ ޖަޖުކަން ކޮށްފައިވާއިރު، ރާއްޖޭގެ އިތުރުން ބައިނަލްއަގްވާމީ ފެންވަރުގައިވެސް އިއްބެ އަކީ ގިނަބައެއްގެ އިތުބާރު ހޯދާފައިވާ ޝަހްސިއްޔަތެކެވެ.
ދުނިޔޭގެ ބޮޑީބިލްޑިންގް ފެޑެރޭޝަނުގެ ނައިބު ރައީސްގެ މަގާމަށް އިއްބެ އިންތިޚާބު ވުމަކީ ރާއްޖެއަށް ލިބުނު ބޮޑު ޝަރަފެއްގެ ގޮތުގައި މި ދާއިރާގައި މަސައްކަތްކުރާ ހުރިހާ ފަރާތްތަކުންވެސް ފާހަގަކުރެއެވެ.