ރާއްޖޭގައި ބްރޯޑްކާސްޓަރުން ތަމްރީނުކޮށް، އެހީތެރިކަން ފޯރުކޮށްދޭ އެންމެ ބޮޑު ޖަމާއަތް، އޭޝިއާ ޕެސިފިކް ބްރޯޑްކާސްޓިން ޔޫނިއަން (އޭބީޔޫ) ގެ ސެކްރެޓަރީ ޖެނެރަލްގެ މަގާމަށް ޓީވީއެމްގެ ކުރީގެ އިންޖިނިއަރިން ހެޑް އަހްމަދު ނަދީމް އައްޔަނުކޮށްފިއެވެ.
މިއީ އޭބީޔޫގެ އިސް މަގާމަކަށް ދިވެއްސަކު އައްނުކުރި ފުރަތަމަ ފަހަރެވެ. އަދި މިއީ ވޭތުވެދިޔަ 13 އަހަރުގެ ތެރޭގައި އެ މަގާމަށް އާ ބޭފުޅަކު އައްޔަންކުރި ވެސް ފުރަތަމަ ފަހަރެވެ.
ނަދީމް އެ މަގާމަށް އައްނުކުރި ނަމަވެސް އޭނާގެ ދައުރު ފެށޭނީ އަންނަ އަހަރުގެ އޭޕްރީލް މަހުއެވެ.
އޭބީޔޫގެ އާ އެސްޖީގެ މަގާމަކަށް އައްޔަނުކުރި އަހުމަދު ނަދީމް ---
ޓީވީއެމްގައި ހެޑް އޮފް އިންޖިނިއަރިންގެ މަގާމުގައި 11 އަހަރު މަސައްކަތް ކުރެއްވި ނަދީމް އަކީ މި ދާއިރާގައި 25އަހަރު ދުވަހުގެ ތަޖުރިބާ ލިބިވަޑައިގެންފައިވާ ބޭފުޅެކެވެ. އަދި އޭނާ މިހާތަނަށް ހުންނެވީ އޭބީޔޫގެ ޓެކްނޮލޮޖީގެ އެންޑް އިނޮވޭޝަން ޑިރެކްޓަރުގެ މަގާމުގައެވެ.
ނަދީމަކީ 2008 ވަނަ އަހަރުން ފެށިގެން އޭބީޔޫގެ އެކި މަގާމުތައް އަދާކުރައްވަމުން އަންނަ ބޭފުޅެކެވެ.
ނަދީމްގެ އިތުރުން އޭބީޔޫގެ އެކި މަގާމުތަކުގައި ދިވެހީން އެބަތިއްބެވެ.
އޭބީޔޫގެ މެމްބަރުންގެ ގޮތުގައި ހިމެނެނީ 57 ގައުމަކުން 287 ބްރޯޑްކާސްޓަރުންނެވެ. އެއީ ތިން ބިލިއަން މީހުންގެ އޯޑިއެންސެކެވެ.