ށ. މާއުނގޫދޫގައި ޒުވާނެއްގެ ބަނޑަށް ވަޅި ހަރައިފިއެވެ.
މާއުނގޫދޫ ކައުންސިލް މެންބަރަކު "ސަން"އަށް ވިދާޅުވީ އެ ހާދިސާ ހިނގާފައި ވަނީ ރޭ މެންދަމު 12:00 ހާއިރު ކަމަށެވެ.
ބަނޑަށް ވަޅިހެރުމުން އަނިޔާވި ޒުވާނާއަށް އެރަށު ސިއްހީ މަރުކަޒުގައި ފަރުވާދިނުމަށްފަހު އިތުރުފަރުވާއަށް ކުޅުދުއްފުށީ ރީޖިނަލް ހޮސްޕިޓަލަށް ވަނީ ގެންގޮސްފައެވެ.
"އަނިޔާ ލިބުނު މީހާގެ ހާލު ވަރަށް ސީރިއަސް،" ކައުންސިލް މެންބަރު ވިދާޅުވިއެވެ.
އެ ހާދިސާގައި އަނިޔާ ލިބުނީ ރިސޯޓެއްގައި މަސައްކަތް ކުރާ އެރަށު މީހަކަށެވެ. އަދި ތުހުމަތު ކުރެވެނީ މަސްތުވާތަކެތީގެ މައްސަލަތަކުގެ ރެކޯޑް އޮންނަ މީހަކަށް ކަމަށް ކައުންސިލުން ބުންޏެވެ.
ކައުންސިލް މެންބަރު ވިދާޅުވީ އެ މީހާ މިހާރު ހައްޔަރުކޮށްފައިވާ ކަމަށެވެ.