ޖަރުމަނު ބޮންޑަސްލީގާގައި ބަޔާން މިއުނިކް 5-0 އިން ފްރައިބާގް ބަލިކުރި މެޗުގައި ބަޔާންގެ ލެރޯއީ ސާނޭއަށް އަނިޔާވެ ތިން ހަފުތާއަށް ކުޅުމާ ދުރަށް ދާންޖެހިއްޖެއެވެ.
ބަޔާނުން ބުނެފައިވަނީ ސާނޭގެ ފަލަ މަސްގަނޑަށް އަނިޔާވެފައިވާކަމަށެވެ. އޭނާ އަނިޔާއިން ރަނގަޅުވެ ކުޅުމުގައި ބައިވެރިވެވޭނެ ވަކި ދުވަހެއް އެ ކްލަބުން ބުނަފައެއް ނުވެއެވެ.
ނަމަވެސް ޖަރުމަނުގެ މީޑީއާ ރިޕޯޓުތައް ބުނާ ގޮތުގައި ޖަރުމަނުގެ ގައުމީ ޓީމުގައި މޮޅު ކުޅުމެއް ދައްކަމުން އަންނަ ސާނޭ ކުޅުމުގައި އަލުން ބައިވެރިވާން މަދުވެގެން ތިން ހަފުތާ ނަގާނެއެވެ.
އޭނާގެ އަނިޔާ ސީރިއަސް ނޫންކަމަށާއި ތިން ހަފުތާގެ ކުރިން ވެސް ރަނގަޅު ވެދާނެކަމަށް އެ މީޑީއާތަކުން ރިޕޯޓުކުރެއެވެ.
މިހާރު ވޯލްޑުކަޕް ފެށެން 33 ދުވަހަށް ކައިރިވެފައިވާއިރު އަނިޔާގެ ސަބަބުން އޭނާ ޖަރުމަނުގެ ސްކޮޑަށް ނުނަގަފާނެ ކަމަށް ވެސް ޖަރުމަނު މީޑިއާތަކުން ބުނެއެވެ.
ސާނޭ މިވަގުތު ހުރީ ވަރަށް ރަނގަޅު ފޯމެއްގައެވެ. އޭނާ ބަޔާނަށް މި ސީޒަނުގައި ވަނީ 10 ގޯލު ޖަހައިފައެވެ. ސާނޭއަށް އަނިޔާވި މެޗުގައި ވެސް އޭނާ ވަނީ ގޯލު ޖަހައިފައެވެ.
ޖަރުމަނު ވޯލްޑުކަޕަށް ނިކުންނައިރު ސާނޭއަކީ މުހިންމު ކުޅުންތެރިއެކެވެ. އުމުރުން 26 އަހަރުގެ ހަލުވި ސާނޭ ވަނީ ޖަރުމަނު ގައުމީ ޓީމަށް 47 މެޗު ކުޅެދީ 11 ގޯލު ޖަހައިފައެވެ.
ވޯލްޑްކަޕްގައި ޖަރުމަނު އޮތީ ގްރޫޕް އީގައެވެ. އެ ގްރޫޕްގައި ޖަރުމަނުގެ އިތުރުން ދެން އޮތީ ސްޕެއިންއާއި، ކޯސްޓަރީކާގެ އިތުރުން ޖަޕާނެވެ. ވޯލްޑްކަޕްގައި ޖަރުމަނު ކުޅޭ ފުރަތަމަ މެޗުގައި އެ ޓީމު ނޮވެމްބަރު 23 ވަނަ ދުވަހު ނިކުންނާނީ ޖަޕާނާ ދެކޮޅަށެވެ.