އަންނަ އަހަރު ޗައިނާގައި ބާއްވަން ހަމަޖެހިފައިވާ 18 ވަނަ އޭޝިއަން ކަޕް ގަތަރުގައި ބާއްވަން އޭޝިއަން ފުޓްބޯލް ކޮންފެޑެރޭޝަން (އޭއެފްސީ)އިން ނިންމައިފިއެވެ.
މިއަދު ބޭއްވި އޭފްސީގެ 11 ވަނަ ހިންގާ ކޮމެޓީގެ ބައްދަލުވުމުގައި ނިންމާފައިވަނީ ޗައިނާގެ "ޒީރޯ ކޮވިޑް ޕޮލިސީ"ގެ ސަބަބުން އެ ގައުމުގައި އޭޝިއަން ކަޕް ނުބޭއްވުމަށް ނިންމުމުން އެ ފުރުސަތު ގަތަރަށް ދިނުމަށެވެ.
އެ ބައްދަލުވުމުގައި އޭފްސީގެ ރައީސް ޝައިޚް ސަލްމާން ބިން އެބްރަހިމް ހަލީފާ ވަނީ އިންޑޮނޭޝިއާއާއި ސައުތު ކޮރެއާ އެ މުބާރާތް ބޭއްވުމަށް ޝައުގުވެރިކަން ފާޅުކުރުމުން ޝުކުރު ދަަންނަވާފައެވެ.
ޝައިޚް ސަލްމާން ވިދާޅުވީ ބައިނަލްއަގްވާމީ ބޮޑެތި ކުޅިވަރު މުބާރާތްތައް ބޭއްވުމުގައި ގަތަރުގެ ގާބިލުކަމާއި ރެކޯޑުތަކަށް މުޅި ދުނިޔެ އަބަދުވެސް ތައުރީފުކުރާކަމަށެވެ.
މީގެއިތުރުން އޭފްސީން ދެފުށް ފެންނަ ގޮތެއްގައި ޕްރޮފެޝަނަލްކަމާއެކު ބިޑް ކުރުމުގެ ކަންކަމާއި، ގައުމެއް އިޚްތިޔާރުމުގެ ކަންކަން ކުރިއަށް ގެންދިޔަކަމަށްޓަކައި ޝުކުރު ދަންނަވާފައެވެ.
މީގެ ކުރިން އޮތްގޮތުންނަމަ އަންނަ އަހަރުގެ ޖޫން މަހުގެ 16 ވަނަ ދުވަހުން ފެށިގެން ޖުލައި މަހުގެ 16 ވަނަ ދުވަހާ ހަމައަށް އެ މުބާރާތް ކުރިއަށްދާނީ ޗައިނާގެ 10 ސިޓީއެއްގައެވެ.
ހަތަރު އަހަރުން އެއްއަހަރު ބާއްވާ އޭޝިއަން ކަޕްގެ އެންމެ ފަހުގެ ޗެމްޕިއަނުންނަކީ ވެސް މިއަހަރު މުބާރާތް ބާއްވާ ގަތަރެވެ. 2019 ވަނަ އަހަރު ބޭއްވި މުބާރާތް ހޯސްޓުކޮށްފައިވަނީ ޔުނައިޓެޑް އަރަބް އެމިރޭޓްސްއެވެ.
މިއީ ގަތަރުގައި އޭފްސީ ކަޕް ބާއްވާ ތިން ވަނަ ފަހަރެވެ. އެ ގައުމުން ވަނީ 1988 ވަނަ އަހަރުގެ މުބާރާތުގެ އިތުރުން 2011 ވަނަ އަހަރުގެ މުބާރާތް އެ ގައުމުގައި ބާއްވާފަައެވެ. މީގެއިތުރުން މިއަހަރު ބާއްވާ ވޯލްޑްކަޕް ވެސް ބާއްވަނީ އެ ގައުމުގައެވެ. ވޯލްޑުކަޕަށް މިހާރު ވަނީ މުޅި ގަތަރު އެއްކޮށް ތައްޔާރުވެފައެވެ. އެ ގައުމުން އެ މުބާރާތަށް ވެފައިވާ ތައްޔާރީތަކަށް ފުޓުބޯޅަ ދިރާސާކުރާ ގިނަ ބަޔަކު ވަނީ ތައުރީފުކޮށްފައެވެ.
މީގެއިތުރުން މިއަދު އޭފްސީން ބޭއްވި ހިންގާ ކޮމެޓީގެ ބައްދަލުވުމުގައި ވަނީ 2027 ވަނަ އަހަރުގެ އޭޝިއަން ކަޕް ބާއްވަން ބިޑް ކޮށްފައިވާ ދެ ގައުމުގެ ތެރެއިން ގައުމެއް އަންނަ އަހަރުގެ ފެބްރުއަރީ މަހު ބާއްވާ ހިންގާ ކޮމެޓީގެ ބައްދަލުވުމުގައި ފާސްކުރުމަށް ނިންމައިފައެވެ.
ދެން އަންނަ 2027 ވަނަ އަހަރުގެ މުބާރާތް ބޭއްވުމަށް ބިޑްކޮށްފައިވަނީ ސައުދި އަރަބިއާގެ އިތުރުން އިންޑިއާއިންނެވެ.