ލެޓިން އެމެރިކާގެ ގައުމެއް ކަމަށްވާ ނިކަރަގުއާއިން، ނެދަލެންޑާ ޚާރިޖީ ގުޅުންތައް ކަނޑާލައިފި އެވެ.
ނިކަރަގުއާއިން ނެދަލެންޑާއެކު އޮތް ޚާރިޖީ ގުޅުން ކަނޑާލީ، ނެދަލެންޑުން ނިކަރަގުއާގައި އަޅަން ބުނި ހޮސްޕިޓަލެއް ނޭޅޭނެކަމަށް ނެދަލެންޑުން ބުނުމުންނެވެ.
"ނިކަރަގުއާގެ ރައްޔިތުންނަށާއި މި ގައުމަށް ފުރައްސާރަކުރާ ބަޔަކު މި ގައުމުން ފެނިގެނެއް ނުވާނެ. އަހަރެމެން ނެދަލެންޑާއެކު ގުޅުން ބާއްވަން ބޭނުމެއް ނޫން." ނިކަރަގުއާގެ ރައީސް ޑޭނިއަލް އޯޓެގާ ވިދާޅުވިއެވެ.
އޯޓެގާ ވިދާޅުވީ މިދިޔަ ބުރާސްފަތި ދުވަހު އެ ގައުމުގެ ވެރިރަށް މަނަގުއާއަށް، ނެދަލޭންޑުން ސެންޓްރަލް އެމެރިކާއަށް ކަނޑައަޅުއްވާފައި ހުންނަވާ ސަފީރު ކްރިސްޓީން ޕިރޭން ކުރެއްވި ޒިޔާރަތެއްގައި ހޮސްޕިޓަލް ނޭޅޭނެކަމަށް ވިދާޅުވި ކަމަށެވެ.
"އެމްބެސެޑަރު ވަޑައިގެން އަޅުގަނޑުމެންނާ ވާހަކަ ދެއްކެވީ އަޅުގަނޑުމެންނަކީ ނެދަލެންޑުގެ ދަށުގައިވާ ބައެއްކަމަށް ހީކޮށްގެން،" ނިކަރަގުއާގެ ރައީސް ވިދާޅުވި އެވެ.
ނެދަލެންޑުން މީގެ އެތައް އަހަރެއް ކުރިން ނިކަރަގުއާގައި އަޅަން ބުނި ހޮސްޕިޓަލެއް ނޭޅޭނެކަމަށް ބުނުމުން ނިކަރަގުއާގެ ސަރުކާރަށް އެކަން ވެގެންދިޔައީ ނެދަލެންޑުން އެ ގައުމަށް ކުރި ޖެއްސުމަކަށެވެ.
މީގެ އިތުރުން، ނިކަރަގުއާއިން ވަނީ އެމެރިކާއިން އެ ގައުމަށް ކަނޑައެޅުއްވި ޚާއްސަ މަންދޫބު ހޫގޯ ރޮޑްރިގޭޒަށް ވެސް ނިކަރަގުއާއަށް ވަޑައިނުގަނެވޭނެކަމަށް ބުނެފައެވެ. އެއީ އެމެރިކާގެ ސެނެޓުގައި އޮތް އަޑުއެހުމެއްގައި އޭނާ ނިކަރަގުއާއާ ދެކޮޅަށް ވާހަކަފުޅުދައްކަވާފައިވާ ކަމަށް ބުނެއެވެ.
ރޮޑްރިގޭޒް ވަނީ ނިކަރަގުއާ ހަމަމަގަށް އެޅުވުމަށް އިގުތިސާދީ އަދި ޚާރިޖީ ފިޔަވަޅުތައް އެޅުމަށް ގޮވާލައްވާފައެވެ. އަދި ނިކަރަގުއާގެ ސަރުކާރަކީ ޑިކްޓޭޓާޝިޕެއްގެ ގޮތުގައި އޭނާ ވަނީ ސިފަކުރައްވާފައެވެ.
ނިކަރަގުއާއަކީ ހޮންޑިއުރަސް އާއި ކޯސްޓަރިކާ އާ ދެމެދު އޮންނަ، ހަ މިލިއަން މީހުންގެ އާބާދީއެއް އޮތް ގައުމެކެވެ. ސެންޓްރަލް އެމެރިކާގައި އޮތް އެންމެ ބޮޑު ގައުމަކީވެސް ނިކަރަގުއާއެވެ.