އަންނަ އަހަރުގެ ރިޔާސީ އިންތިޚާބަށް އެމްޑީއޭއިން އެކުލަވާލާ މެނިފެސްޓޯގައި ހިމެނޭނީ ރައްޔިތުންނަށް ސީދާ ނަތީޖާ ފެންނާނެ ކަންކަން ކަމަށް އެމްޑީއޭގެ ޕޮލިސީ އެންޑް ޑިވެލޮޕްމަންޓް ކައުންސިލްގެ މެންބަރު ޙުސައިން ސާލިމް މުޙައްމަދު ވިދާޅުވެެއްޖެއެވެ.
އެމްޑީއޭއިން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ސާލިމް ވިދާޅުވީ، އެމްޑީއޭގެ މެނިފެސްޓޯ އެކުލަވާލެވޭނީ މިވަގުތު ރައްޔިތުންނަށް ދިމާވެފައިވާ ގިނަ މައްސަލަތަކުގެ ހައްލާ އެކުގައި ކަމަށެވެ.
"އެގޮތުން މެނިފެސްޓޯގައި އަޅުގަނޑުމެން ބޮޑަށް ހިމަނާލާނީ ރައްޔިތުންނަށް [އެކަންކަމުގެ] ޑައިރެކްޓް އިމްޕެކްޓް ކުރާނެ ކަންކަން," އޭނާ ވިދާޅުވިއެވެ.
އެމްޑީއޭގެ ނާއިބު ރައީސް އަލީ މައުރޫފް މިއަދުގެ ނޫސްވެރިންގެ ބައްދަލުވުމުގައި ވާހަކަދައްކަވަނީ --- ސަން ފޮޓޯ/ މުޙައްމަދު ޙައްޔާން
މި ބައްދަލުވުމުގައި ވާހަކަދައްކަވަމުން އެމްޑީއޭގެ ނާއިބު ރައީސް އަލީ މައުރޫފް ވިދާޅުވީ އެމްޑީއޭއިން އަންނަ އަހަރުގެ ރިޔާސީ އިންތިޚާބަށް ތައްޔާރުވަމުން އަންނައިރު، އެ ޕާޓީއަށް މެންބަރުން އިތުރުކުރުމުގެ މަސައްކަތް ވަރަށް ބާރަށް ކުރިއަށްދާ ކަމަށެވެ.
"އަޅުގަނޑުމެން ޕާޓީގެ ލީޑާޝިޕުން ރާއްޖޭގެ އެކި ކަންކޮޅުތަކަށް ދަތުރުކުރުމުން އެނގުނީ އަޅުގަނޑުމެންގެ ޕާޓީގެ ރައީސް އޮނަރަބަލް އަޙްމަދު ސިޔާމަށް ވަރަށް ބޮޑަށް ތާއީދު އެބައޮތްކަން،" މައުރޫފް ވިދާޅުވިއެވެ.
މިހާރުވެސް، އެ ޕާޓީއަށް ރާއްޖޭގެ އެކި ކަންކޮޅުތަކުން ގިނަ އަދަދެއްގެ މީހުން ގުޅެމުން ދާކަން އޭނާ ވަނީ ފާހަގަކުރައްވާފައެވެ.
އެމްޑީއޭގެ ނާއިބު ރައީސް ޑރ. ޢާއިޝަތު ރަފިއްޔާ މިއަދުގެ ނޫސްވެރިންގެ ބައްދަލުވުމުގައި ވާހަކަދައްކަވަނީ --- ސަން ފޮޓޯ/ މުޙައްމަދު ޙައްޔާން
އެޕާޓީގެ ނާއިބު ރައީސް ޑރ. ޢާއިޝަތު ރަފިއްޔާ ވިދާޅުވީ އެމްޑީއޭގެ އަމާޒަކީ ރާއްޖޭގެ އެންމެ ބޮޑެތި ޕާޓީތަކުގެ ތެރޭގައި ހިމެނުން ކަމަށެވެ. އޭނާ ވެސް ވަނީ ރާއްޖޭގެ އެކި ކަންކޮޅުތަކުން ގިނަބަޔަކު ޕާޓީއާ ގުޅެމުން އަންނަ ކަމަށް ވިދާޅުވެފައެވެ.
އެޕާޓީގެ ޕޮލިސީ އެންޑް ޑިވެލޮޕްމެންޓް ކައުންސިލުގެ މެންބަރު މުހައްމަދު އައްބާސް ވަނީ އެ ޕާޓީއަށް މެންބަރުން އިތުރުކުރުމަށް ކުރަމުންދާ މަސައްކަތްތަކާ ގުޅޭ ތަފްސީލުތައް ހާމަކުރައްވާފައެވެ.
އެގޮތުން، ރ. އަތޮޅަށް އެންމެ ފަހުން ކުރި ދަތުރުގައި ރައްޔިތުންގެ ބޮޑު ތަރުހީބެއް ލިބުނުކަން ފާހަގަކުރައްވައި އޭނާ ވިދާޅުވީ ދެން އެ ޕާޓީގެ ޓީމުން އަމާޒު ހިފާނީ ށ. އަތޮޅަށް ކަމަށެވެ.
އެމްޑީއޭގެ ޕޮލިސީ އެންޑް ޑިވެލޮޕްމެންޓް ކައުންސިލުގެ މެންބަރު މުހައްމަދު އައްބާސް މިއަދުގެ ނޫސްވެރިންގެ ބައްދަލުވުމުގައި ވާހަކަދައްކަވަނީ --- ސަން ފޮޓޯ/ މުޙައްމަދު ހައްޔާން
"އަޅުގަނޑުމެން އުންމީދުކުރަނީ ށ. އަތޮޅުން ވެސް، އަޅުގަނޑުމެންގެ ޕާޓީގެ މެންބާޝިޕް އިތުރުކުރުމަށް އަޅުގަނޑުމެން މި ކުރަމުންދާ މަސައްކަތުގައި ވަރަށް ބޮޑު އެއްބާރުލުމެެއް ލިބޭނެ ކަމަށް،" އޭނާ ވިދާޅުވިއެވެ.
އަންނަ އަހަރުގެ ރިޔާސީ އިންތިޚާބަށް ތައްޔާރުވުމުގެ ގޮތުން އެމްޑީއޭއިން އަންނަނީ ގިނަ މަސައްކަތްތަކެއް ކުރަމުންނެވެ. އެގޮތުން، އެ ޕާޓީގެ ރައީސް، އަޙްމަދު ސިޔާމް މުޙައްމަދު އިންތިޚާބަށް ނުކުމެ ވަޑައިގަންނަވާނެކަން އިއުލާން ކުރައްވާފައިވާއިރު، އެ ޕާޓީއިން އަންނަނީ މެންބަރުން އިތުރުކުރުމުގެ ބޮޑެތި ހަރަކާތްތަކެއް ހިންގަމުންނެވެ.