ބްރައިޓެން އަތުން ބަލިވުމުގެ ފުރިހަމަ ޒިންމާ ނަގާކަމަށް ލެސްޓާސިޓީގެ ކޯޗް، ބްރެންޑަން ރޮޖާސް ބުނެފިއެވެ.
އިނގިރޭސި ޕްރިމިއާ ލީގްގައި ރޭ ބްރައިޓެން އަތުން 2-5ގެ ނަތީޖާއިން ބަލިވި މެޗާ ބެހޭގޮތުން ނޫސްވެރިންނާ ވާހަކަދައްކަމުން ބްރެންޑަން ބުނީ، މި ސީޒަނުގައި ލެސްޓާ ސިޓީ ދައްކަމުން އަންނަ ކުޅުމާއި މެޗުތަކުން ފެންނަ ދަށް ނަތީޖާތަކުގެ ޒިންމާ އޭނާ ނަގާ ކަމަށެވެ.
ކޯޗު ބުނީ ޓީމުތެރޭގައި މައްސަލަތަކެއް ނެތްނަމަވެސް، ނިމިގެންދިޔަ ޓްރާންސްފާ މާކެޓްގައި ލެސްޓާ ސިޓީގެ މުހިއްމު ކުޅުންތެރިންތަކެއް ވިއްކާލުމުގެ ސަބަބުން އުނދަގޫތަކެއް ކުރިމަތިވާ ކަމަށެވެ. މިގޮތުން ޓީމުގެ ފަހަތް ބަލަހައްޓަމުން އައި ވެސްލޭ ފޮފާނާ އަދި ގޯލްކީޕަރު ކެސްޕާ ޝޫމައިކަލް ފަދަ ކުޅުންތެރިން ޓީމާ ވަކިވެގެންދިޔުމަކީ ލެސްޓާ ސިޓީއަށް މިވަގުތު ދިމާވެފައިވާ އެއް މައްސަލަކަމަށް ކޯޗު ބުންޏެވެ.
"ފުޓްބޯޅައިގައި ރަނގަޅު ދުވަސްވަރާއި ރަނގަޅު ނޫން ދުވަސްވަރު އަންނާނެ. އެއީ އަހަރެމެންގެ ތަޖުރިބާ. އަހަރުމެން މިއަދު މިހާ ހިސާބަށް އާދެވުނުއިރު، މީގެ ކިތަންމެ ތަޖުރިބާއެއްކޮށްފިން،" ލެސްޓާސިޓީގެ ކޯޗު ބްރެންޑަން ރޮޖާސް ބުންޏެވެ.
ލެސްޓާސިޓީގެ ކޯޗު ބުނީ ވޭތުވެދިޔަ މެޗްތަކުގެ ނަތީޖާ ކޮންމެގޮތަކަށް ނިކުތް ނަމަވެސް ޓީމާ ދޭތެރޭ އޮތް އުއްމީދު ގެއްލުވާ ނުލާ ކަމަށެވެ. އެގޮތުން މިހާރު ހުރިހާ ވެސް ވިސްނުމެއް ހުރީ އަންނަ ހޮނިހިރު ދުވަހު އެސްޓަންވިލާ އާ ދެކޮޅަށް ނިކުންނަ މެޗުން މޮޅުވާންކަމަށް ވެސް ކޯޗު ބުންޏެވެ.
އިނގިރޭސި ޕްރިމިއާ ލީގްގައި އެ ދެ ޓީމް މިހާރު އޮތްގޮތަށް ބަލައިފިނަމަ، ބްރައިޓެން އުޅެނީ ކުޅުނު ހަ މެޗުން ލިބުނު ތޭރަ ޕޮއިންޓާއެކު ތާވަލުގެ ހަތަރު ވަނައިގައެވެ. ހަ މެޗް ކުޅެގެން ލިބުނު އެއް ޕޮއިންޓާއެކު ލެސްޓާސިޓީ އުޅެނީ ތާވަލްގެ އެންމެ ފަހަތުގައެވެ.
ޕްރިމިއާ ލީގްގައި ރޭ ބްރައިޓެންއާ ދެކޮޅަށް ކުޅުނު މިމެޗްގައި ލެސްޓާސިޓީގެ ސަޕޯޓަރުން ވަނީ އެޓީމުގެ ކޯޗް ބްރެންޑަން ރޮޖާސްގެ އިސްތިއުފާއަށް ގޮވާލާފައެވެ.
ލެސްޓާސިޓީން ވަނީ 2016-2015 ސީޒަނުގައި އިނގިރޭސި ޕްރިމިއާ ލީގްގެ ޗެމްޕިއަންކަން ހޯދާފައެވެ. މީގެ އިތުރުން އެ ޓީމް ވަނީ ވޭތުވެދިޔަ ފަސް ސީޒަނުގައި ޕްރިމިއާ ލީގްގެ ގަދަ ފަސް ޓީމްގެތެރޭގައި ހިމެނިފައެވެ.