އެމެރިކާގެ މަޝްހޫރު ލިޔުންތެރިޔާ އަދި، ޚިދުމަތް ދިނުމު ދާއިރާގެ ތަޖުރިބާކާރެއް ކަމަށްވާ ރޮން ކައުފްމަން އާއެކު، މޯލްޑިވްސް އެސޯސިއޭޝަން އޮފް ހިއުމަން ރިސޯސް ޕްރޮފެޝަނަލްސް (މާޕް)ގެ ހާއްސަ ސެމިނާއެއް ބާއްވައިފިއެވެ.
އެމްއެންޔޫ އޮޑިޓޯރިއަމްގައި މިއަދު ކުރިއަށް ދިޔަ މި ސެމިނާ ކުރިއަށް ދިޔައީ "އޯގާތެރި ލީޑަރުންގެ ސަގާފަތެއް އުފެއްދުން" މި މައުޟޫއުގެ ދަށުންނެވެ.
މާޕްގެ ރައީސް ޙުސައިން އަފީފް "ސަން"އަށް ވިދާޅުވީ، މިއަދުގެ ހަރަކާތުގައި 250އެއްހާ މީހުން ބައިވެރިވި ކަމަށެވެ.
"[މި އިވެންޓުގައި] މި ކިޔަައިދެނީ މަސައްކަތް ކުރާ މާހައުލުގައި، އަދި އަޅުގަނޑުމެންގެ ކޮމިއުނިޓީތަކުގައި ވެސް އަދި އަޅުގަނޑުމެން މިއުޅޭ ހުރިހާ ތަނެއްގައި، ކިހިނެތްތޯ އޯގާތެރިވުމާ، އަޅާލުމާ މިކަންކަން ޕްރެކްޓިސް ކުރެވޭނީ" އަފީފް ވިދާޅުވިއެވެ.
މަޝްހޫރު ލިޔުންތެރިޔާ ރޮން ކައުފްމަން އާއެކު މާޕުން ބޭއްވި ސެމިނާގެ ތެރެއިން --- ފޮޓޯ/ މާޕް
މީގެ އިތުރުން އޭނާ ވިދާޅުވީ، މި ހަރަކާތަކީ ކޮންމެ އަހަރަކު ވެސް އެ ޖަމިއްޔާއިން ކުރިއަށް ގެންދަމުން އަންނަ އިވެންޓެއް ކަމަށެވެ.
"ކޮންމެ އަހަރަކު ވެސް އިންޓަނޭޝަނަލް ތޯޓް ލީޑާ އެެއް ގެނެސްގެން އެބަ ބާއްވަން އެއް އިވެންޓު... އިރާދަކުރެއްވިއްޔާ އަންނަ އަހަރު ވެސް ދުނިޔޭގެ ފެންވަރުގެ ތޯޓް ލީޑާއެއް ގެނެސްގެން އެއް އިވެންޓު ބޭއްވުމުގެ ޕްލޭން ކުރިއަށް ދާނެ" އަފީފް ވިދާޅުވިއެވެ.
ރޮން ކައުފްމަން އަކީ ސާވިސް ޕާފޯމަންސް އަދި ސާވިސް ކަލްޗާގެ ދާއިރާއިން ދުނިޔޭގެ މަގުބޫލުކަން ހޯދާފައިވާ މާހިރެކެވެ. އޭނާގެ ފޮތް "އަޕްލިފްޓިން ސާވިސް" ވަނީ ނިއުޔޯކްޓައިމްސް ބެސްޓް ސެލާސްގެ ތެރޭގައި ހިމެނިފައެވެ. އޭގެ އިތުރުން ވެސް އޭނާ ވަނީ 14 ފޮތެއް ޝާއިއު ކުރައްވާފައެވެ.