ސްރީލަންކާގެ ރައީސް ގޮތަބަޔަ ރާޖަޕަކްސަ މިއަދު އިސްތިއުފާ ދެއްވާނެކަމުގެ ޔަގީންކަން ދެއްވާފައިވާ ކަމަށް އެގައުމުގެ ގާނޫނު ހަދާ މަޖިލީހުގެ ރައީސް މަހިންދަ ޔާޕާ އަބޭވަރުދަނާ ވިދާޅުވެއްޖެއެވެ.
މަހިންދަ ވިދާޅުވީ، ގޮތަބަޔަ މިއަދު އިސްތިއުފާގެ ސިޓީ ފޮނުއްވާނެ ކަމުގެ ޔަގީންކަން ވަނީ އަރުވާފައެވެ. އެހެންކަމުން ގާނޫނު ހަދާ މަޖިލީހުން އަންނަ ބުދަ ދުވަހު އާ ރައީސަކު ހޮވާނެ ކަމަށް ވެސް މަހިންދަ ވިދާޅުވިއެވެ.
ލަންކާގެ ރައްޔިތުންގެ މިދިޔަ ހަފުތާ ބަންދު ތެރޭގައި ބޭއްވި ބޮޑެތި މުޒާހަރާތަކާ ގުޅިގެން، މިއަދު އިސްތިއުފާ ދެއްވާނެ ކަމަށް މިދިޔަ ހޮނިހިރު ދުވަހު ގޮތަބަޔަ ވިދާޅުވިއެވެ.
ނަމަވެސް ރޭ ދަންވަރު ގޮތަބަޔަ ރާއްޖެ ވަޑައިގެން، ރައީސް ކަމުން އިސްތިއުފާ ދެއްވުމުގެ ބަދަލުގައި ވެރިކަމުގެ ބާރުތައް ބޮޑުވަޒީރު ރަނިލް ވިކްރަމަސިންހައާ ހަވާލުކުރެއްވުމުން އެ މަނިކުފާނު އިސްތިއުފާ ދެއްވަން އުޅުއްވާތޯ ބައެއް މީހުން ވަނީ ސުވާލު އުފައްދާފައެވެ.
ލަންކާގައި މިއަދު ވެސް ދަނީ ސަރުކާރާ ދެކޮޅަށް މުޒާހަރާތައް ބާއްވަމުންނެވެ. އެގޮތުން ގިނަ އަދަދެއްގެ މީހުން ވަނީ ބޮޑުވަޒީރު އޮފީސް ކައިރިއަށް އެއްވެފައެވެ.
ލަންކާގެ ރައްޔިތުން މުޒާހަރާ ކުރަމުން ދަނީ އެގައުމު އިގުތިސާދީ ގޮތުން އިނދަޖެހި، އަސާސީ ތަކެތި ކަމަށްވާ ކާބޯތަކެއްޗާއި ތެލާއި ގޭހާއި ބޭސްވެސް ނުލިބޭ ހާލަތަށް ގައުމު ގޮސްފައިވުމުންނެވެ. އެގޮތުން އެ ހާލަތުގައި ގައުމު އޮންނަތާ ހަ މަހަށް ވުރެ ގިނަ ދުވަސްވެފައިވާ އިރު މިއަހަރުގެ ކުރީކޮޅު ބޭއްވި މުޒާހަރާތައް ހޫނުވުމުން، މިދިޔަ މެއި މަހު އޭރުގެ ބޮޑުވަޒީރު މަހިންދަ ރާޖަޕަކްސަ އިސްތިއުފާ ދެއްވިއެވެ.