ސޯޝަލް މީޑިއާގައި މިހާރު ދައުރުވަމުންދާ ފޮޓޯތަކަކީ އޭނާގެ ފޮޓޯތަކެއްކަމަށާއި އެ ކޮޓަރިއަށް ދިޔައީ ވިޔަފާރީގެ ބައްދަލުވުމަކަށް ކަމަށް ރައްޔިތުންގެ މަޖިލީހުގެ ނޮޅިވަރަމް ދާއިރާގެ ކުރީގެ މެމްބަރު މުޙައްމަދު ނަޝީދު (ކާނަލް) ވިދާޅުވެއްޖެއެވެ.
އެއް ޖިންސުން ގުޅުން ހިންގާ ވީޑިއޯތަކުން ފެންނަ ކޮޓަރީގައި ފިރިހެނަކާ އެކު ކާނަލް ނަޝީދު ހަރަކާތްތެރިވާ ފޮޓޯއެއް ސޯޝަލް މީޑިއާގައި ރޭ ވަނީ އާންމުވެފައެވެ.
އެކަމާ ގުޅިގެން ކުރެއްވި ފޭސްބުކު ޕޯސްޓެއްގައި ކާނަލް ނަޝީދު ވިދާޅުވީ ސޯޝަލް މީޑިއާގައި ދައުރުވާ ފޮޓޯގައި އޭނާ ހުރި ކޮޓަރިއަކީ ވިޔަފާރި ބައްދަލުވުމަކަމަށް ކަމަށް ބުނެ ތަކުރާރުކޮށް ގުޅައިގެން ގެންދިޔަތަނެއްކަމަށެވެ. އަދި އޭނާ އެތަނަށް ދިޔައީ އެއީ ކޮވިޑް ދުވަސްވަރަށް ވެފައި ފަސޭހައިން ބޭރުތެރޭގައި ބައްދަލުވުންތައް ނުބޭއްވޭތީކަމަށް ކާނަލް ނަޝީދު ވިދާޅުވިއެވެ.
"އެމީހުންގެ މަޤްޞަދަކަށްވެފައި އޮތީ އަޅުގަނޑު ލައްވާ އެއަމަލު ހިންގުން. އަޅުގަނޑު އެކަމުން ބަރީއަވިން،" ކާނަލް ނަޝީދު ވިދާޅުވިއެވެ.
ކާނަލް ނަޝީދު ވިދާޅުވީ ދެ ލައްކަ ރުފިޔާ ހޯދަން އެދި، ފޮޓޯތައް ލީކުކޮށްލާނެ ކަމުގެ ބިރު އޭނާއަށް ދެއްކި ކަމަށެވެ. ނަމަވެސް ފައިސާ ވެސް ދީފައި ނުވާނެކަމަށް އޭނާ ވިދާޅުވިއެވެ.
ސޯޝަލް މީޑިއާގައި ދައުރުވާ ފޮޓޯގައި ފެންނަނީ ކާނަލް ނަޝީދު ކޮޓަރިއެއްގައި އިތުރު ފިރިހެނަކާ އެކު ހުންނަ ތަނެވެ. ފޮޓޯއަށް ފުރަގަސްދީގެން ހުރި އެ މީހާ މަތިން އެއްޗެއް ނުލާ ހުރިއިރު ކާނަލް ނަޝީދު ހުންނެވީ ގަމީކާއި ފަޓުލޫނެއް ތުރުކުރައްވައި މާސްކް އަޅުއްވައިގެނެވެ.
އެ ފޮޓޯއާ ގުޅިގެން ސޯޝަލް މީޑިއާގައި ބައެއް މީހުން ދަނީ ނަޝީދަށް ފާޑު ކިޔަމުންނެވެ. އެގޮތުން ބައެއް މީހުން ބުނީ ރިސޯޓު ހިއްސާ ވެސް އޮންނަ މީހަކު ވިޔަފާރި ބައްދަލުވުމަކަށް ހަށިފާރަވެރިއަކާ ނުލާ ގެސްޓްހައުސް ކޮޓަރިއަކަށް ދާނޭކަމަށް ގަބޫލު ނުކުރެވޭކަމަށެވެ.
އަދި މިފަދަ އަމަލެއް ހިނގާކަން އެނގި ހުރެ އެކަން ފުލުހުންގެ ސަމާލުކަމަށް ނުގެނައީ ކީއްވެތޯ ބައެއް މީހުން ސުވާލުކޮށްފައި ވެއެވެ.
ކާނަލް ނަޝީދަކީ ކުރީގެ ރައީސް ޢަބްދުﷲ ޔާމީން އަބްދުލްގައްޔޫމްގެ ވެރިކަމުގައި ރާއްޖެއިން ތައިލެންޑަށް ކަނޑައަޅާފައި ހުންނެވި ސަފީރެވެ.
މިދިޔަ މާޗު މަހުގެ ފަހުކޮޅުން ފެށިގެން ބަރަހަނާ ވީޑިއޯތަކެއް ބޭނުންކޮށްގެން ބްލެކް މެއިލް ކުރަމުންދާ ކަން ފުލުހުންގެ ސަމާލުކަމަށް އައިސްފައިވާ ކަމަށް އެސިސްޓެންޓް ޕޮލިސް ކޮމިޝަނަރު މުހައްމަދު ރިޔާޒު ވަނީ ވިދާޅުވެފައެވެ.