ދިވެހި ފަނޑިޔާރުންގެ ޖަމިއްޔާގެ ރައީސަކަށް ސުޕްރީމް ކޯޓުގެ ފަނޑިޔާރު ހުސްނުއްސުއޫދު އައްޔަނުކޮށްފިއެވެ.
ފަނޑިޔާރުންގެ ޖަމިއްޔާގެ ރައީސްގެ މަގާމް ހުސްވެފައި ވަނީ އެ މަގާމުގައި މީގެ ކުރިން ހުންނެވި އަބްދުއްރައޫފް އިބްރާހިމް, ހައި ކޯޓުގެ ފަނޑިޔާރުކަމުން އިސްތިއުފާދެއްވުމުންނެވެ.
އެ މަގާމަށް ސުއޫދު އައްޔަނުކުރުމަށް ނިންމާފައިވަނީ ފަނޑިޔާރުންގެ ޖަމިއްޔާގެ ހިންގާ ކޮމެޓީންނެވެ. އެ ނިންމުން ސުއޫދު ވަނީ ގަބޫލުކުރައްވައި ފަނޑިޔާރުންގެ ޖަމިއްޔާގެ ރައީސްގެ މަގާމާ ހަވާލުވެވަޑައިގެންފައެވެ.
ފަނޑިޔާރުންގެ ޖަމިއްޔާގެ ނަމުގައި ޖަމިއްޔާއެއް އުފެއްދުމަށް ހުށަހަޅާފައިވަނީ 2019 ވަނަ އަހަރެވެ.
ޖުޑިޝަލް އެޑްމިނިސްޓްރޭޝަނުން މީގެ ކުރިން ބުނީ އެ ޖަމިއްޔާ ހަދަނީ ފަނޑިޔާރުންގެ ގާނޫނުން ފަނޑިޔާރުންނަށް ލިބިގެންވާ ހައްގުގެ ދަށުން ކަމަށެވެ.
އެ ޖަމިއްޔާގެ މަގުސަދަކީ ފަނޑިޔާރުންގެ މުސްތަގިއްލުކަން ހިމާޔަތް ކުރުމަށް މަސައްކަތް ކުރުމާއި ފަނޑިޔާރުންގެ މިނިވަންކަމާއި މުސްތަގިއްލުކަން ދެމެހެއްޓުމަށް މަސައްކަތްކުރުމާއި އެމީހުންގެ އިމްތިޔާޒުތައް ހިމާޔަތްކުރުމަށް މަސައްކަތްކުރުމެވެ.