އއ. ރަސްދޫގައި ގާއިމުކުރުމަށް ސަރުކާރުން ވައުދުވެފައިވާ އައިސްޕްލާންޓްގެ މަސައްކަތް ނިމި މަސްވެރިންނަށް ޚިދުމަތް ދޭން ފެށޭނެ ކަމަށް ލަފާކުރެވެނީ އަންނަ އަހަރުގެ މާޗް މަހުގައި ކަމަށް ފިޝެރީސް މިނިސްޓަރު ޑރ. ޙުސައިން ރަޝީދު ޙަސަން ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ތޮޮއްޑޫ ދާއިރާގެ މެންބަރު ޙަސަން ޝިޔާން ވަނީ ރަސްދޫ އައިސް ޕްލާންޓްގެ
މަސައްކަތް ރޭވިފައިވާ ގޮތާއި މަސައްކަތް ނިމި މަސްވެރިންނަށް ޚިދުމަތްލިބޭނެ ތާރީޚަކާ ބެހޭ ގޮތުން މިނިސްޓަރާ ސުވާލުކުރައްވާފައެވެ.
މެންބަރުގެ ސުވާލަށް ޖަވާބުދެއްވަމުން މިނިސްޓަރު ވިދާޅުވީ އައިސްޕްލާންޓްގެ މަސައްކަތުގެ ބީލަމަށް އެންމެ ފުރަތަމަ ހުޅުވާލީ މިދިޔަ އަހަރުގެ ސެޕްޓެމްބަރު މަހުގެ ނުވަ ވަނަ ދުުވަހުކަމަށާއި އެ ޓެންޑާގެ މުއްދަތު ހަމަވީ މިދިޔަ އަހަރުގެ އޮކްޓޫބަރު މަހުގެ 21 ވަނަ ދުވަހުކަމަށެވެ.
އޭރު ދީފައިވާ މުއްދަތުގެ ތެރޭގައި ބިޑު ހުށަހެޅީ އެންމެ ފަރާތަކުން ކަމަށާއި އެ ފަރާތުން ރެޖިސްޓްރީ ވެފައި ނުވާކަމަށް މިނިސްޓަރުގެ ވާހަކައިގައި ފާހަގަކުރެއްވިއެވެ.
އެހެންކަމުން އެ ބީލަން ބަލައިނުގަންނަން މިނިސްޓްރީން ނިންމިއެވެ.
އޭގެ ފަހުން ބީލަމަށް ހުޅުވާލީ މަސައްކަތުގެ ޝަރުތުތަކަށް ބައެއް ބަދަލުތައް ގެނައުމަށް ފަހުގައެވެ. އެގޮތުން، ކުރިން އައިސްޕްލާންޓް ނިންމުމަށް ދީފައިވާ މުއްދަތަކީ ހަ މަސް ނަމަވެސް ފަހުން އެ މުއްދަތު ވަނީ އަށް މަހަށް އިތުރުކޮށްފައެވެ. އަދި މާލީ ގޮތުން ހުންނަޖެހޭ ޝަރުތުތަކާއި ބީލަން ހުށަހަޅާ ފަރާތްތަކުގެ ތަޖުރިބާ ކުރިއަށްވުރެ ދަށްކުރުމަށް ނިންމި ކަމަށް ވެސް މިނިސްޓަރު ވިދާޅުވިއެވެ.
ބީލަން ހުށަހެޅުމުގެ ޝަރުތުތަކަށް ގެނައި ބަދަލުތަކާއެކު ބީލަން ހުށަހެޅުމަށް މިދިޔަ މަހުގެ 21 ވަނަ ދުވަހު ހުޅުވާލިއެވެ. އަދި ބީލަން ހުށަހެޅުމުގެ އެންމެ ފަހު ދުވަހަކަށް އަންނަ މަހުގެ އަށް ވަނަ ދުވަސްް ވަނީ ކަނޑައަޅާފައެވެ.
މިނިސްޓަރު ވިދާޅުވީ ބީލަން ކާމިޔާބުކުރާ ފަތާރާއެކު އެއްބަސްވުމުގައި ސޮއި ކުރެވޭނެކަމަށް ލަފާކުރެވެނީ އަންނަ މަހުގެ ތިންވަނަ ހަފްތާގެ ތެރޭގައި ކަމަށެވެ.
"ބީލަން ކާމިޔާބުކުރާ ފަރާތާއެކު ސޮއިކުރެވޭނެކަމަށް ލަފާކުރެވެނީ ޖޫންމަހުގެ ތިންވަނަ ހަފްތާގެ ތެރޭގަ. އައިސްޕްލާންޓް ގާއިމްކޮށް ނިންމާ ޚިދުމަތްދެވޭނީ ސޮއިކުރާތާ އަށް މަސްފަހުން، މާޗް 2023ގައިކަމަށް އަޅުގަނޑުމެންނަށް ލަފާކުރެވެނީ،" މިނިސްޓަރު ވިދާޅުވިއެވެ.
ސައުދީގެ އެހީއާއެކު ރަސްދޫގައި ގާއިމުކުރަން ނިންމާފައިވަނީ 25 ޓަނުގެ އައިސްޕްލާންޓެކެވެ.