ހައި ކޯޓުގެ ފަނޑިޔާރު އަލީ ސަމީރު އިސްތިއުފާ ދެއްވައިފިއެވެ.
ޖުޑީޝަލް ސާވިސް ކޮމީޝަން (ޖޭއެސްސީ)އިން ނެރުނު ބަޔާނެއްގައި ބުނެފައިވަނީ މިއަދުން ފެށިގެން ސަމީރު ފަނޑިޔާރުކަމުން އިސްތިއުފާ ދެއްވައިފައިވާ ކަމަށެވެ.
ފަނޑިޔާރުކަމުން ސަމީރު އިސްތިއުފާ ދެއްވުމުން އޭނާ ވަނީ ޖޭއެސްސީގެ މެންބަރު ކަމުން ވެސް ވަކިވެފައެވެ.
ސަމީރު އިސްތިއުފާ ދެއްވި ސަބަބެއް އަދި ނޭނގެއެވެ.
ސަމީރަކީ ފަނޑިޔާރުކަމުގައި 15 އަހަރަށްވުރެ ދިގު މުއްދަތަކަށް ޚިދުމަތް ކުރެއްވި ބޭފުޅެކެވެ. ހައިކޯޓު ފަނޑިޔާރަކަށް 2011 ގައި އައްޔަނުކުރުމުގެ ކުރިން އޭނާ މަސައްކަތް ކުރައްވާފައިވަނީ ސިވިލް ކޯޓުގައެވެ.
ސިވިލް ކޯޓުގައި އެންމެ ފަހުން ހުންނެވީ އިސް ޤާޒީގެ މަޤާމުގައެވެ. އަދި ފަނޑިޔާރުކަމުގެ މަޤާމުގެ ކުރިންވެސް މިދާއިރާގައި އެކިއެކި ކޯޓުތަކުގައި އޭނާ މަސައްކަތް ކުރައްވާފައިވެއެވެ.
ހައިކޯޓުގައި ހިމެނޭ ފަނޑިޔާރުންގެ ތެރެއިން އެ ކޯޓުން އިންތިހާބު ކުރާ ފަނޑިޔާރެއްގެ ހައިސިއްޔަތުން ސަމީރު ޖޭއެސްސީ މެމްބަރު ކަމަށް ފުރަތަމަ އައްޔަން ކުރެއްވީ ޑިސެމްބަރު 5، 2019 ވަނަ ދުވަހުއެވެ.
ސަމީރަކީ މިސްރުގެ އަލްއަޒުހަރު ޔުނިވާސިޓީއިން ޝަރީއަތާއި ގާނޫނުގެ ރޮނގުން މަތީ ތައުލީމު ހާސިލު ކުރެއްވުމަށްފަހު، މެލޭޝިޔާގެ އިންޓާނޭޝަނަލް އިސްލާމިކް ޔުނިވާސިޓީން ކޮމްޕަރޭޓިވް ލޯ އިން މާސްޓާސް ޑިގްރީ ހާސިލް ކުރައްވާފައިވާ ބޭފުޅެކެވެ.