ސަރުކާރުގެ ދަނޑުވެރިކަމާ ބެހޭ ކުންފުނި ކަމަށްވާ އެގްރޯނެޓުން ގިނަ ޢަދަދެއްގެ ކަރާ ބާޒާރަށް ނެރެން ފަށައިފިއެވެ.
އެގޮތުން ރަމަޟާން މަހުގެ ފުރަތަމަ ދުވަހު ފަސް ޓަނު ކަރާ، ދެވަނަ ދުވަހު 1.5 ޓަނު ކަރާ އަދި ތިން ވަނަ ދުވަހު ތިން ޓަނު ކަރާ ވަނީ ބާޒާރަށް ނެރެފައެވެ.
އަދި މިހަފުތާގެ ތެރޭގައި އިތުރު 10 ޓަނު ކަރާ ބާޒާރަށް ނެރުމަށް މިހާރު ވަނީ ތައްޔާރު ކުރެވިފައި ކަމަށް އެގްރޯ ނެޓުން މައުލޫމާތު ދިނެވެ.
އެކި ދުވަސްތަކަށް ބަހާލައިގެން ޖުމްލަ 117 ޓަނު ކަރާ އެގްރޯނެޓުން ރަމަޟާން މަހު ބާޒާރަށް ނެރުމަށް ވަނީ ހަމަޖެހިފައެވެ.
ކޮންމެ އަހަރެއްގެ ރޯދަމަހު، ޚާއްޞަކޮށް ކަރާ ފަދަ ބާވަތްތަކުގެ އަގު މައްޗަށް އުފުލުމުގެ ޝަކުވާ އާއްމުންގެ ފަރާތުން އިތުރުވާތީ، އެކަމަށް ޙައްލެއް ހޯދުމުގެ އަމާޒުގައި ގިނަ ޢަދަދެއްގެ ކަރާ ހެއްދުމަށް ފަހު ބާޒާރަށް ނެރެން ފެށީ ކަމަށް އެގްރޯ ނެޓުން ބުންޏެވެ.
ދަނޑުވެރިކަމުގެ ބާވަތްތަކުގެ އުފެއްދުންތެރިކަން އިތުރުވެފައި ވާތީ، އެހެން އަހަރުތަކާ ޚިލާފަށް މިއަހަރުގެ ރަމަޟާން މަހުގައި ބާޒާރުގައި ކަރާގެ އަގު އާދަޔާ ޚިލާފަށް ބޮޑު ނުވެ ހިފެހެއްޓިފައި ވާކަން އެގްރޯއިން ފާހަގަ ކުރިއެވެ.
އުންމީދަކީ، ގިނަ ޢަދަދެއްގެ ދިވެހި އުފެއްދުންތައް ބާޒާރަށް ނެރެވިގެން ދިއުން ކަމަށާއި ރަމަޟާން މަހުގެ ހުރިހާ ހިސާބެއްގައި ވެސް އެތަކެތި ބާޒާރުގައި ހެޔޮ އަގުގައި ލިބެން ހުރުން ކަމަށް އެގްރޯއިން ބުންޏެވެ.
ކަރާގެ އިތުރުން ބަރަބޯ، ބަޓާނާ، ތޮރާ، ކިއުކަންބާ، ފަޅޯ އަދި ފަތްކޭލުގެ ބާވަތްތައް ގިނަ ޢަދަދަކަށް ބާޒާރަށް ނެރުމަށް ވަނީ ހަމަޖެހިފައެވެ.
އެގްރޯނެޓުގެ އުފެއްދުންތައް ހޯލްސޭލްކޮށް ގަންނަން ބޭނުންވާ ފަރާތްތަކުން އޯޑަރުކުރުމަށާ މަޢުލޫމާތު ސާފުކުރުމަށް އެގްރޯނެޓުގެ ހޮޓްލައިން ނަންބަރު 3030490 އަށް ގުޅުމަށް އެ ކޯޕަރޭޝަނުން އެދެއެވެ.
ސަރުކާރުގެ އިޤުދިޞާދީ ސިޔާސަތުގެ ދަށުން ވިޔަފާރީގެ ސިނާޢަތެއްގެ ގޮތުގައި ދަނޑުވެރިކަން ތަރައްޤީކުރުމަށްޓަކައި، އެގްރޯ ނޭޝަނަލް ކޯޕަރޭޝަން (އެގްރޯނެޓް) އުފެއްދެވީ މިދިޔަ އަހަރުގެ އޭޕްރީލް މަހުގެ ތެރޭގައެވެ.