﷽ އެއީ ކީރިތި ޤުރުޢާނުގެ އާޔަތެކެވެ. ބައެއް ބޭފުޅުން ވިދާޅުވާ ގޮތުގައި ތައުބާ ސޫރަތް ފިޔާވާ ކޮންމެ ސޫރަތެއް ފަށާއިރު ﷽ ހިމެނެއެވެ. އެހެންނަމަވެސް މިއީ އަންނަމްލް ސޫރަތުގެ އާޔަތެއް ކަމާމެދު ހުރިހާ ޢިލްމުވެރިން އިއްތިފާޤުވެއެވެ.
﷽ މިއީ ވަރަށް ބަރަކާތްތެރި އާޔަތެކެވެ. އަޅުގަނޑުމެން ކުރާ ހުރިހާ ކަމެއްވެސް މި އާޔަތުން ފަށައިފިކަމުގައި ވަނީނަމަ ބަރަކާތް ލައްވަވާކަމުގައި ބަޔާންވެގެންވެއެވެ.
އެނގިވަޑައިގަންނަވާތޯ، ސުލައިމާން ނަބީކަލޭގެފާނު ޔަމަނުގެ ބިލްޤީސަމްއަށް ފޮނުއްްވެވި ސިޓީފުޅުގައި ފުރަތަމަވެސް ލިޔުއްވެވީ ކީކޭކަން؟ ﷽. އަންނަމްލް ސޫރަތުގެ އޮނަތިރީސް ވަނަ އާތަޔުން އެ ސޫރަތުގެ އެއްތިރީސްވަނަ އާޔަތާ ހަމައަށް އަންގަވާފައިވަނީ އޭ ތިމަންކަމަނާގެ އަރިހުގައި ވާ މީހުންނޭވެ. ތިމަންކަމަނާއަށް މާތްވެގެންވާ ސިޓީފުޅެއް ލިބިވަޑައިގަންނަވައިފިއެވެ. މި ސިޓީފުޅަކީ ސުލައިމާން ނަބީކަލޭގެ އަރިހުން ތިމަންކަމަނާއަށް ލިބިވަޑައިގެންނެވި ސިޓީފުޅެއް ކަމަށާ އަދި އެ ސިޓީފުޅުގައި ވަނީ ﷽އެވެ.
ހަމަ އެހެންމެ ނޫޙްގެފާނު އެކަލޭގެފާނަށް އީމާންވީ މީސްކޮޅާއެކުގައި ނަވަށް އަރާވަޑައިގަތުމަށްފަހުގައި ވިދާޅުވީ ކީކޭތޯ؟ އޭ މުއުމިނު އަޅުތަކުންނޭ! މި ނަވަށް އަރާވަޑައިގަންނަވާށެވެ. ﷲގެ އިސްމަފުޅާއެކުގައި އެ ނައު ދަތުރުކޮށް އަދި ބަނދަރުކުރައްވާހުއްޓެވެ. ތިމަންކަލޭގެފާނުގެ ވެރި ރަސްކަލާންގެއީ ފާފަތައް ފުއްސަވާ ރަޙީމްވަންތަ ރަސްކަލާންގެއެވެ.
ނޫޙޫގެފާނުގެ ނައުކޮޅަށް އަރައިވަޑައިގަތުމަށް ފަހުގައި ވެސް ފެއްޓެވީ ﷽އިންނެވެ.
ހަމައެހެންމެ އަޅުގަނޑުމެންގެ މާތް ނަބިއްޔާ ޞައްލައްﷲ ޢަލައިހި ވަސައްލަމް ހަދީސްފުޅު ކުރައްވާފައިވަނީ އަޅުގަނޑުމެން ކުރާ ކޮންމެ ރަނގަޅު ކަމެއް ކުރުމުގެ ކުރިން ﷽ ކިއުމަށެވެ.
ޞަޙާބީބޭކަލެއް ކަމުގައިވާ އުސްމާންބިން އަބިލްޢާޞްގެ ހަށިކޮޅުގައި ތަދުފުޅެއް އިހުސާސްވެގެން ދިޔައިރު ރަސޫލާ ޞައްލަﷲޢަލައިހި ވަސައްލަމައަށް އެކަން ދަންނަވާލީމައި ވިދާޅުވީ އެ ތަދުފުޅުވާ ތަނެއްގައި އަތްޕުޅު ޖައްސަވާލައްވަވާފައި ﷽ ތިންފަހަރު ވިދާޅުވާށެވެ. އެކަން އެގޮތަށް ކުރުމުގެ ސަބަބުން ހަށިކޮޅަށް ލުއިކަން ލިބިވަޑައިގެންފި ކަމަށް ބަޔާންވެގެންވެއެވެ.
ހަމައެހެންމެ އަޅުގަނޑުމެންނަށް އިރުޝާދު ދެއްވާފައިވަނީ ވަރަށް ގިނަ މުސްތަހައްބު ވެގެންވާ ކަންތައްތަކެއް އެބަހުރި ކަމަށް ﷽ގައި، މިކަމުގެ މަޤާމުކަތެއްވެއެވެ. ކެއުމުގެ ކުރިން ﷽ ކިއުމަށް އަދި ކެއުމުގެ ކުރިން ބިސްމި ކިއުމަށް ހަނދާންނެތިއްޖެ ކަމަށް ވަނީނަމަ މެދުތެރެއިން ނަމަވެސް بِسْمِ اللَّهِ أَوَّلَهُ وَآخِرَهُ ކިއުމަށް އަންގަވާފައިވެއެވެ.
ހަމައެހެންމެ ވުޟޫކުރުމުގެ ކުރިން ﷽ ކިއުމަކީ ބައެއް މަޒުހަބުތަކުގައި ވާޖިބު ވެގެންވާކަމެކެވެ. ކަތިލާ އިރުގައި ﷽ ކިއުން ވެސް ވާޖިބުވެގެންވެއެވެ.
މިގޮތުން އަޅުގަނޑުމެންގެ ހަޔާތުގެ ކޮންމެ ރަނގަޅު ކަމެއްކުރުމުގެ ކުރިން ﷽ ކީމަ އޭގެ ނަތީޖާއަކީ ކޮބައިތޯ؟ އަޅުގަނޑުމެން މި މަސައްކަތް ކުރަނީ މި ކާއިނާތުގެ ވެރި ﷲގެ އިސްމަފުޅުގައެވެ. އެ ނަތީޖާއިން ﷲގެ ރައްކާތެރިކަމާއި ހިމާޔަތް އަޅުގަނޑުމެންނަށް ލިބިގެން ދާނެއެވެ.
ކާއިނާތުގެ ވެރިރަސްކަލާންގެ އިސްމަފުޅުން އަޅުގަނޑުމެންނަށް ކަމެއް ފެށިއްޖެ ކަމަށް ވަނީނަމަ އޭގެ ނަތީޖާ އަޅުގަނޑުމެންނަށް އަންނާނީ ކިހިނަކުންކަން ވިސްނަވާށެވެ. އެހެންވީމައި ﷽ މި ކަލިމަފުޅަކީ ވަރަށް ބަރަކާތްތެރި ވެގެންވާ ކަލިމަފުޅެއްކަން މި ފުރުސަތުގައި ތި ބޭފުޅުންނަށް ހަނދާންކޮށްދެމެވެ.