ޔޫކްރޭންގެ ހަނގުރާމައާ ގުޅިގެން ދުނިޔޭގެ ބާޒާރުގައި ތެލުގެ އަގު އުފުލުމުން، އެސްޓީއޯއިން ތެޔޮ ވިއްކާ އަގު ބޮޑުކޮށްފިއެވެ.
އެސްޓީއޯއިން މިއަދު ބުނީ، މިދިޔަ މަހުގެ ފަހުކޮޅު ރަޝިއާ އާއި ޔޫކްރޭންގެ ހަނގުރާމަ ފެށީ ދުނިޔޭގެ ބާޒާރުގައި ތެލުގެ އަގު ހިފެހެއްޓުމެއް ނެތި އުފުލެމުން ދަނިކޮށް ކަމަށެވެ. އަދި އެ ހަނގުރާމައިގެ ސަބަބުން، ތެލުގެ އަގު މައްޗަށްދާ ނިސްބަތް މިހާރު އިތުރުވެފައިވާ ކަމަށެވެ.
އެހެންކަމުން މާދަމާއިން ފެށިގެން ފިއުލް ސަޕްލައިސް މޯލްޑިވްސްގެ ސްޓޭޝަންތަކުން ތެޔޮ ލިބޭނީ ތަފާތު އަގެއްގައި ކަމަށް އެސްޓީއޯއިން ބުންޏެވެ.
މިއަދު ތެލުގެ އަގަށް ގެނައި ބަދަލާއެކު ކުރިން 12.98 ރުފިޔާ އަށް ހުރި ޕެޓްރޯލް ލީޓަރެއް ދެން ލިބޭނީ 14.60 ރުފިޔާއަށެވެ. އަދި ކުރިން 13.04 ރުފިޔާއަށް ލިބުނު ޑީސަލް ލީޓަރެއް ދެން ލިބޭނީ 14.80 ރުފިޔާއަށެވެ.
އެސްޓީއޯއިން އެންމެ ފަހުން ތެލުގެ އަގު ބޮޑުކުރީ މިދިޔަ މަހުގެ ތެރޭގައެވެ.
ދުނިޔޭގެ ބާޒާރުގައި ސާފު ނުކުރާ ތެޔޮ ފީފާއެއްގެ އަގު މިހާރު ހުރީ އެވްރެޖްކޮށް 115.80 ޑޮލަރުގައެވެ. މިދިޔަ މަހުގެ ކުރިން ސާފު ނުކުރާ ތެޔޮ ފީފާއެއްގެ އަގު 100 ޑޮލަރަށް ވުރެ މަތިވެފައި ވަނީ 2014 ވަނަ އަހަރެވެ.