އުރީދޫ ދިވެހި ޕްރިމިއާ ލީގުގައި މިއަދު ހަވީރު ޔުނައިޓެޑް ވިކްޓަރީ (ޔޫވީ) އާއި ކުލަބް އީގަލްސް ބައްދަލު ކުރި މެޗު އެއްވަރުވެގެން ނިމިއްޖެއެވެ.
ގަލޮޅު ރަސްމީ ދަނޑުގައި ކުޅުނު މި މެޗު އެއްވަރުވީ 1-1 ގެ ނަތީޖާއަކުންނެވެ.
މެޗު ފަށައިގެން އީގަލްސްގެ އަހުމަދު ރިޒްވާން (ރިޒޭ) ފޮނުވާލި ހަމަލާ އީގަލްސްގެ ކީޕަރު އަހުމަދު އަނަފް ޒަރިޔަންދު ވަނީ މަތަކޮށްފައެވެ.
ޔޫވީން މެޗުގައި ލަނޑު ޖަހައި ލީޑު ނެގީ ހަތް ވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ ބިދޭސީ ކުޅުންތެރިޔާ އިވާން ވެރާސްއެވެ. އޭނާ މި ލަނޑު ޖަހާފައިވަނީ އެ ޓީމަށް ލިބުނު ހިލޭ ޖެހުމެއްގައި އަނަޓޯލީ ވްލަޝީޗޭފް ފޮނުވާލި ބޯޅަ އީގަލްސްގެ ކީޕަރު މުޙައްމަދު ތޯހާގެ އަތުގައި ޖެހިފައި ނިކުތް ބޯޅަ ބޮލުން ގޯލަށް ފޮނުވާލައިގެންނެވެ.
އޭގެ ފަހުން އީގަލްސްއަށް މެޗުގެ ނަތީޖާ ހަމަހަމަ ކުރުމަށް ރަނގަޅު ފުރުސަތެއް ލިބުނެވެ. މި ފަހަރުވެސް ރިޒޭ ފޮނުވާލި ބޯޅަ ދިޔައީ ގޯލުގެ ދަނޑި ކައިރިން ބޭރަށެވެ.
ފުރަތަމަ ހާފު ނިމުނީ 1-0 ގެ ނަތީޖާއަކުން ޔޫވީ ކުރީގައި އޮވެގެންނެވެ.
އީގަލްސް އިން މެޗުގެ ނަތީޖާ ހަމަހަމަކުރީ 86 ވަނަ މިނެޓުގައެވެ. އެ ޓީމުގެ މި ލަނޑު ކާމިޔާބުކޮށްދިނީ އަބްދުﷲ ޒިޔާން ދިން ބޯޅާއެއް ގޯލަށް ފޮނުވާލައިގެން އަލީ އަޒުވާން އަބްދުލް އަޒީޒެވެ.
ލީގު ތާވަލްގެ އެއް ވަނައިގައި މާޒިޔާ އޮތީ ނުވަ ޕޮއިންޓާއެކުއެވެ. ދެ ވަނައިގައި އޮތް ޔޫވީ އަދި ވެލެންސިއާ އަށް ލިބިފައިވަނީ ހަތް ޕޮއިންޓެވެ. ނަމަވެސް ފައިދާ ގޯލުން ކުރި ލިބެނީ ޔޫވީއަށެވެ. ހަތަރު ވަނައިގައި ވެލެންސިއާ އޮތީ ހަ ޕޮއިންޓާއެކުގައެވެ.
ލީގުގައި މިރޭ މާޒިޔާ ސްޕޯޓްސް އެންޑް ރެކްރިއޭޝަން ނިކުންނާނީ ދަ ގްރާޏްޑޭ ސްޕޯޓްސް ކުަލަބާ ދެކޮޅަށެވެ.