އައްޑޫ ސިޓީގައި ކުކުޅު އާލާކޮށް އޭގެ ވިޔަފާރި ކުރަން ގާއިމުކުރި "ޕޯލްޓްރީ ފާމް"އިން ކުކުޅު ވިއްކަން އިއްޔެ ފަށައިފިއެވެ.
އައްޑޫ ސިޓީގައި ކުކުޅު ގެންގުޅުމަށް އެ ސިޓީ ކައުންސިލުން އިސްނަގައިގެން ހުޅުވައިލި ފުރުސަތުގައި އެކަމަށް އިސްނެގި އެއްބަޔަކީ ހިތަދޫ ބީޓެކް ކުންފުންޏެވެ.
އެ ކުންފުނީގެ މެނޭޖިން ޑިރެކްޓަރު ޙުސައިން މުޙައްމަދު "ސަން"އަށް ވިދާޅުވީ ފާއިތުވެދިޔަ މަަސްދުވަހުގެ ތެރޭގައި އެ ކުންފުނިން 5،000 ކުކުޅު ވިއްސައިފައިވާ ކަމަށެވެ.
ޙުސައިން ވިދާޅުވި ގޮތުގައި ބީޓެކް ކުންފުންޏަށް ލިބުނު ބިމުގައި އެ ކުންފުނިން ބޭނުންވީ ފުޅާ ދާއިރާއެއްގައި އެ މަސައްކަތް ފަށާށެވެ. އެގޮތުން ފުރަތަމަ ވެސް ގިނަ އަދަދެއްގެ ކުކުޅު އާލާކުރުމުގެ މަސައްކަތް ފެށިކަމަށް އޭނާ ކިޔައިދިނެވެ.
"އަޅުގަނޑުމެން މި ތަނުގައި ކެޕޭސިޓީ އެބައިން މިހާރު ވެސް ތިރީސްހާސް ކުކުޅު ގެންގުޅެވޭ ވަރަށް. އެކަމަކު ޓެސްޓަކަށް އަޅުގަނޑުމެން ސްޓާޓް ކުރީ ފަސްހާސް ކުކުޅު،" ޙުސައިން ވިދާޅުވިއެވެ.
ޙުސައިން ވިދާޅުވި ގޮތުގައި، އެންމެ ފުރަތަމަ ކުކުޅު އާލާކުރަން ފެށީ އެތަނުގައި ބިސް އަޅުވައި، ވިއްސައިގެންނެވެ. އަދި މި ކުކުޅުތަކަކީ ދިވެހި ކުކުޅުކަމާއި ތާޒާ ކުކުޅުކަމުގެ ޔަގީންކަން އޭނާ އަރުވައެވެ.
އައްޑޫގައި ވިއްކާ ކުކުޅަކީ ދިވެހި ކުކުޅުކަމަށް ބީޓެކް ކުންފުނިން ބުނޭ --
"ބޭރުން ގެންނަ ފްރޯޒެން ކުކުޅަށްވުރެ ރަަހަ ވަރަށް ތަފާތު ވާނެ މި އެއްޗެހީގައި،" ޙުސައިން ވިދާޅުވިއެވެ.
އެ ތަނުން ފިނިކުރި ކުކުޅު ވިއްކާ އަގަކީ 65 ރުފިޔާއެވެ. ޙުސައިން ވިދާޅުވި ގޮތުގައި މިއަދު ވެސް އެތަނުން ކުކުޅު ގަންނަން ގިނަ ބަޔަކު ވަނީ އައިސްފައެވެ. އެގޮތުން އެތަނުގެ މުވައްޒަފުންނަށް ނުތަކާ ވަރަށް ކަސްޓަމަރުން މިއަދު އެބަ އަންނަކަމުގައި ޙުސައިން ވިދާޅުވިއެވެ.
ކުކުޅުގެ އިތުރުން، ކުކުޅު ބިސް ވިއްކުމަކީ ވެސް އެ ކުންފުނީގެ ޕްލޭނެކެވެ. މިހާރު ވެސް އެކަަން ކުރާނެ ތަން ހުރީ ތައްޔާރަށެވެ.
ޙުސައިން ވިދާޅުވި ގޮތުގައި އެ ތަނުން 10،000 ބިސް ދުވާލަކަށް އުފެއްދޭނެއެވެ. އެހެން ނަމަވެސް ދެ ކަން އެއްފަހަރާ ކުރަން އުނދަގޫވުމުން ބިސް ވިއްކަން އަދި ވަނީ ނުފެށިފައެވެ.
"ކުރިއަށް އޮތް ކުޑަ މުއްދަތެއް ތެރޭގައި ފެށޭނެ،" ޙުސައިން ވިދާޅުވިއެވެ.
ބީޓެކްގެ ޕޯލްޓްރީ ފާމުން އަދި ކުކުޅު ވިއްކަނީ އައްޑޫގައި އެކަންޏެވެ. އެހެން ނަމަވެސް، ކުކުޅާއި ކުކުޅު ބިސް ފުޅާދާއިރާއެއްގައި ވިއްކުމަކީ އެ ކުންފުނީގެ އަމާޒެކެވެ.