ރަޝިޔާއާއި ބެލަރޫސްގައި ހިންގަމުންދާ މެޑިސިން ކޯސްތަކުގެ ކްލާސްތައް އޮންލައިންކޮށް ހިންގަން ޖެހޭ ޙާލަތެއް އަދި ނެތް ކަމަށް އެ ޔުނިވާސިޓީތަކުން ބުނެފިއެވެ.
ބެލަރޫސްގެ ޔުނިވާސިޓީތަކުން ބާލިންގައި ހުންނަ ދިވެހި އެމްބަސީއަށް މައުލޫމާތު ދީފައިވާ ގޮތުގައި ދަރިވަރުންގެ ކިޔެވުން އޮންލައިންކޮށް ކުރިއަށް ގެންދެވޭނީ އެ ގައުމުގެ ހެލްތު މިނިސްޓްރީއާއި އެޑިއުކޭޝަން މިނިސްޓްރީން ނިންމައިގެންކަމަށެވެ. އަދި ކައިރި މުސްތަޤްބަލެއްގައި ކްލާސްތައް އޮންލައިންކުރުމުގެ ވިސްނުމެއް ބެލަރޫސް ސަރުކާރުގެ ނެތް ކަމަށް ވަނީ އަަންގައިފައެވެ.
މީގެ އިތުރުން، ދަރިވަރުން ބެލަރޫސްގައި ތިބޭއިރު ދަރިވަރުންގެ ސަލާމަތާއި ރައްކާތެރިކަން ޔުނިވާސިޓީތަކުން ޔަގީންކޮށްދޭކަމަށްވެސް ޔުނިވާސިޓީތަކުން ދިވެހި ސަރުކާރަށް ވަނީ އަންގައިފައެވެ.
ރަޝިޔާގެ ޔުނިވާސިޓީތަކުން ވެސް ވަނީ ދިވެހި ދަރިވަރުން ތިބި ސަރަހައްދުތަކަށް ނުރައްކަލެއް އޮތްކަމަށް ނުފެންނާތީ ކިޔެވުން އޮންލައިންކޮށް ކުރިއަށް ގެންދަން ނުފެންނަކަމަށް ބުނެފައެވެ.
ބެލަރޫސް އަކީ ގިނަ އަދަދެއްގެ ދިވެހި ދަރިވަރުން މަތީ ތައުލީމު ހާސިލުކުރަމުން އަންނަ ގައުމެކެވެ. ރަޝިޔާއާއި ގާތް ގުޅުމެއް އޮންނަ ބެލަރޫސްގެ ސަރުކާރުން ވަނީ ހަނގުރާމަ ފެށެން ގާތްވެފައި ވަނިކޮށް އެ ގައުމާއެކު އަސްކަރީ ތަމްރީނުތަކެއް ވެސް ކުރިއަށް ގެންގޮސްފައެވެ.
ހަނގުރާމައިގެ ސަބަބުން ބެލަރޫސްގެ އިގްތިސާދަށް ވެސް ބޮޑު އަސަރެއް ކުރާނެ ކަމަށް ބެލެވެއެވެ.
ފޮރިން މިނިސްޓްރީން މައުލޫމާތު ދޭ ގޮތުގައި ރަޝިއާގައި 88 ދިވެހިން، ބެލަރޫސްގައި 137 ދިވެހިން އަދި ޔޫކްރޭންގައި ނުވަ ދިވެހީން މިހާރު އެބަތިއްބެވެ.