މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ރައީސް އަދި ކުރީގެ ރައީސް މުޙައްމަދު ނަޝީދު ޕާޓީއިން ބޭރުކޮށްފައި، ވެރިކަމެއް ނުހޯދޭނެ ކަމަށް ރައްޔިތުންގެ މަޖިލީހުގެ ބިލެތްދޫ ދާއިރާގެ އެމްޑީޕީ މެންބަރު އަޙުމަދު ހަލީމް (ދޮންބިލެތް) ވިދާޅުވެއްޖެއެވެ.
ދޮންބިލެތް މިފަދައިން ވިދާޅުވީ އެމްޑީޕީގެ އެތެރޭގެ އިންތިޚާބާ ދިމާކޮށް، ސިޔާސީ މަގާމުތަކުގައި ތިބި އެ ޕާޓީގެ އެކި މެންބަރުން ވަޒީފާއިން ވަކިކުރާ ކަމަށް ބުނެ އެމްޑީޕީ މެންބަރަކު މަޖިލީހަށް ހުށަހަޅައިފައިވާ ކުއްލި މައްސަލައަށް ބަހުސް ކުރައްވަމުންނެވެ.
ރ. ދުވާފަރު ހެލްތު ސެންޓަރުގެ ސީނިއާ އެޑްމިނިސްޓްރޭޓަރުގެ މަގާމުގައި ހުރި އާމިރު އަޙުމަދު ވަކިކޮށްފައިވާ ކަން ފާހަގަކުރައްވައި، ދޮންބިލެތް ވިދާޅުވީ 1200 މީހުން ތިބި ދާއިރާއެއްގައި 150 އެއްހާ މީހުންގެ ސޮޔާއެކު، މެންބަރަކު ވަކިކުރުމުން ބާކީ ތިބި އެހެން މީހުންގެ ހައްގު ގެއްލިގެންދާ ކަމަށެވެ.
އެތެރޭގެ އިންތިޚާބާ ގުޅުވައިގެން މިފަދަ ކަންކަން ހިންގުމަކީ ބަލައިގަނެވޭނެ ކަމެއް ނޫން ކަމަށް ދޮންބިލެތް ވިދާޅުވިއެވެ.
"އިންތިޚާބުތައް ކާމިޔާބު ކުރަނީ ތާއީދު ހޯދައިގެން، ބިރު ދައްކައިގެންނެއް ނޫން، އަޅުގަނޑުމެންގެ މި ސަރުކާރު ވުޖޫދުވީ ވެސް ބިރު ދައްކައިފައި ތިބި، ވަޒީފާއިން ކަނޑައިފައި ތިބި މީހުން އަނބުރާ ވަޒީފާތަކަށް ގެނައުމަށް ވައުދުވެގެން،" ދޮންބިލެތް ވިދާޅުވިއެވެ.
އޭނާ އިތުރަށް ވިދާޅުވީ ރައީސް އިބްރާހީމް މުޙައްމަދު ޞާލިޙު ވެވަޑައިގެންނެވި ވައުދާ އެއްގޮތަށް އެކަން ކުރައްވަމުން ގެންދަވާ ކަމަށެވެ. އެގޮތުން ޕީޕީއެމް ސަރުކާރުގައި ވަޒީފާއިން ކަނޑައިލައިފައި ތިބި ގިނަ ބަޔަކަށް ވަޒީފާ ދިނުމަށްފަހު، އެތެރޭގެ އިންތިޚާބާ ދިމާކޮށް ވަޒީފާއިން ވަކި ކުރުމަކީ ފަހަތަށް އެޅިގެން ދާ ފިޔަވަޅެއް ކަމަށް އޭނާ ވިދާޅުވިއެވެ.
މެންބަރުން ވަކި ކުރާ ވާހަކަ ދައްކަނީ ސަރުކާރު ކުޑަކަކޫ މައްޗަށް ތިރިކުރުމަށް ނޫން ކަމަށާއި މިއީ ޕާޓީ ތެރޭގައި ހުރި މައްސަލަތައް ހައްލުކޮށް، އަންނަ އަހަރުގެ ރިޔާސީ އިންތިޚާބު ކާމިޔާބު ކުރުމަށް އެޅިގެންދާ ފިޔަވަޅެއްގެ ގޮތުގައި ދޮންބިލެތް ސިފަކުރެއްވިއެވެ.
ހަމައެހެންމެ ރައީސް ނަޝީދު ޕާޓީ ހިސޯރުކޮށްގެން އުޅޭ ވާހަކައަކީ ވެސް ގަބޫލުކުރެވޭ ވާހަކައެއް ނޫން ކަމަށް އޭނާ ވިދާޅުވިއެވެ.
"މިއަދު ވެސް ދުވާފަރު ދާއިރާގެ މެންބަރު ވިދާޅުވެއްޖެ، އަބަދަކު ޕާޓީ ހިސޯރުކޮށްގެން ނޫޅެވޭނެއޭ، އެ ވިދާޅުވަނީ ރައީސް ނަޝީދުގެ ވާހަކަ. އަޅުގަނޑު ގަބޫލުކުރާ ގޮތުގައި ރައީސް ނަޝީދު މި ޕާޓީން ނެރިގެން އަޅުގަނޑުމެންނަށް ވާނެ މޮޅެއް ނޯންނާނެ،" ދޮންބިލެތް ވިދާޅުވިއެވެ.
ކުރީގެ ރައީސް ޢަބްދުﷲ ޔާމީން އަބްދުލްޤައްޔޫމްގެ ވެރިކަން ވެއްޓުނީ، ރައީސް މައުމޫން އަބްދުލްޤައްޔޫމް ދުރުކުރެއްވުމުން ކަމަށް ވިދާޅުވެ، ދޮންބިލެތް އިތުރަށް ވިދާޅުވީ ރައީސް ނަޝީދު ޕާޓީން ދުރުކޮށްގެން އެމްޑީޕީއަށް ވެސް ވެރިކަން ނުލިބޭނެ ކަމަށެވެ.
"އެހެންވީމަ އަޅުގަނޑުމެންނަކަށް ރައީސް ނަޝީދު ދޫކޮށްލައިފައިކައެއް އަޅުގަނޑުމެންނަށް ހޯދޭނެ ވެރިކަމެއް ނޯންނާނެ،" ދޮންބިލެތް ވިދާޅުވިއެވެ.