ޗައިނާގައި މި އަހަރު އޮންނަ އޭޝިއަން ގޭމްސްގެ ޗެފް ޑި މިޝަނަރަކަށް މޯލްޑިވްސް ސްޕޯޓްސް ކޯޕަރޭޝަނުގެ ޗެއާމަން ހުސައިން މުހައްމަދު ހަމަޖައްސައިފިއެވެ.
ހުސެއިން އަކީ ވޮލީބޯޯލް އެސޯސިއޭޝަން އޮފް މޯލްޑިވްސް (ވީއޭއެމް)ގެ ކުރީގެ ޖެނެރަލް ސެކްރެޓަރީކަންވެސް ކުރައްވާފައިވާ ބޭފުޅެކެވެ.
މިއަހަރުގެ އޭޝިއަން ގޭމްސް ބޭއްވުމަށް ހަމަޖެހިފައިވަނީ ސެޕްޓެމްބަރު މަހުގެ 10 އިން 25 އަށް ޗައިނާގެ ހާންޒޫގައެވެ. މި ގޭމްސްގައި އެކި ކުޅިވަރުތަކުން ރާއްޖޭގެ 100 އަށްވުރެ ގިނަ އެތްލީޓުން ވާދަކުރާނެއެވެ.
އޭޝިއަން ގޭމްސްގެ ޗެފް ޑި މިޝަން އަކަށް ހުސެއިން ހަމަޖެއްސިއިރު، އޭނާގެ އެންމެ ބޮޑު ޒިންމާއެއްގެ ގޮތުގައި އޮތީ ރާއްޖޭގެ ހުރިހާ އެތުލީޓުންނަށް މި ގޭމްސްގައި ބޭނުންވާ ކަންކަން ހަމަޖެއްސުމެވެ.
މީގެ ކުރިން 2010 ވަނަ އިންޑިއާގެ ނިއުދިއްލީގައި އޮތް 19 ވަނަ ކޮމަންވެލްތް ގޭމްސްގެ ޗެފް ޑި މިޝަންގެ ޒިންމާ ވެސް ހުސެއިން ވަނީ އަދާކޮށްފައެވެ. މި އަހަރުގެ ގޭމްސް ހުރުމުގެ އިންތިޒާމްތަކާއި، ދަތުރުކުރުމުގެ ކަންކަން ބެލަހައްޓައި ހަމަޖެއްސުމުގައި އެންމެ އިސްކޮށް ހަރަކާތްތެރިވާނީ ހުސެއިންއެވެ.
ހުސެއިންއަކީ ރާއްޖޭގައި ތިބި މަދު އިންޓަނޭޝަނަލް ބީޗްވޮލީބޯޅަ ރެފްރީންގެ ތެރޭގައި ހިމެނޭ ރެފްރީއެކެވެ. އޭނާ ވަނީ ވޮލީބޯޅަ އެސޯސިއޭޝަނުގެ ޖެނެރަލް ސެކްރެޓަރީގެ މަގާމު ދެ ދައުރު އަދާކޮށްފައެވެ.
ސްޕޯޓްސް މެނޭޖްމަންޓުގެ ދާއިރާ އިން މާސްޓާސް ފުރިހަމަ ކުރައްވާފައިވާ ހުސައިން ވަނީ ދާދި ފަހުން ސްރީލަންކާގައި ނިމުނު ސެންޓްރަލް ޒޯން ބީޗްވޮލީބޯޅަ މުބާރާތުގެ އިސް ޑެލިގޭޓްގެ ގޮތުގައި މަސައްކަތްކޮށްފައެވެ. އަދި 2019 ވަނަ އަހަރު ނޭޕާލްގައި ބޭއްވި ސައުތު އޭޝިއަން ގޭމްސްގެ ބީޗް ވޮލީގެ އެންމެ އިސް ރެފްރީއެއްގެ ޒިންމާ ވެސް އަދާކުރީ ހުސެއިންއެވެ.