އިންސާނުން ހަނދަށް ފޮނުވުމުގެ ތައްޔާރީތައް ނާސާއިން ފަށައިފިއެވެ.
ދެހާސްފަންސަވީސް ވަނަ އަހަރު ކުރިއަށް ގެންދަން ހަމަޖެހިފައިވާ އާޓެމިސް މިޝަންގައި އިންސާނުން ހަނދަށް ފޮނުވަން ނާސާއިން ވަނީ ނިންމާފައެވެ.
މި މަސައްކަތުގެ އެންމެ މުހިންމު އެއް ބަޔަށް ފަރިތަކުރުމުގެ ގޮތުން ނާސާގެ އެސްޓްރޮނޯޓުން ދަނީ ތައްޔާރުވަމުންނެވެ. އެގޮތުން ހަނދުގައި ހިނގަން ފަރިތަކުރުމުގެ ގޮތުން 12 މީޓަރު ފުން ޕޫލެއްގައި އެމީހުންނަށް ދަނީ ތަމްރީނުތައް ދެމުންނެވެ.
އެމެރިކާގެ ޓެކްސަސްގައި ހުންނަ ނިއުޓްރަލް ބޮޔަންސީ ލެބޯޓްރީގައި ކުރިއަށް ގެންދާ މި ތަމްރީނުތައް ޚާއްސަ ކުރެވިފައިވަނީ މޫންވޯލްކް ކުރާ މާހައުލާ އެއްގޮތަށެވެ.
ނާސާއިން މީގެ ކުރިން ހަނދަށް ފޮނުވި އިންސާނުން ތިބީ ހަނދުގެ އީކުއޭޓަރ ކައިރީގައެވެ. އެ ސަރަހައްދަށް އިރުގެ އަލިކަން ލިބުނުނަމަވެސް، އާޓެމިސް މިޝަން ކުރިއަށް ގެންދާނީ ހަނދުގެ ސައުތު ޕޯލްގައެވެ.
ސައުތު ޕޯލްގައި މި މިޝަން ކުރިއަށް ގެންދަން ނިންމި މައިގަނޑު އެއް ސަބަބަކީ އެ ސަރަހައްދުގައި ގަނޑުފެން ހުރިކަމަށް ނާސާއަށް ގަބޫލުކުރެވުމެވެ.