އީރާނުގައި މިފަހަކަށް އައިސް އެގައުމުގެ ސަރުކާރާ ދެކޮޅަށް ކުރިއަށްދިޔަ ވަރުގަދަ މުޒާހަރާތަކުގެ ފަހަތުގައި އޮތީ އެމެރިކާގެ ރައީސް ޑޮނަލްޑް ޓްރަމްޕާއި، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫގެ އިތުރުން ވިލާތުގެ ގައުމުތައް ކަމަށް އީރާނުގެ ރައީސް މަސްއޫދު ޕެޒެޝްކިއަން ތުހުމަތު ކުރައްވައިފިއެވެ.
ޓީވީ މެދުވެރިކޮށް ދެއްވި ބަޔާނެއްގައި ޕެޒެޝްކިއަން ވިދާޅުވީ، ބޭރުގެ ބާރުތަކުން މައުސޫމް ރައްޔިތުންނަށް ހިތްވަރުދީ، ގައުމު ބައިބައިކޮށް ފިތުނަ އުފެއްދުމަށް މަސައްކަތް ކޮށްފައިވާ ކަމަށެވެ. އަދި މިއީ ހަމައެކަނި އިޖުތިމާއީ މުޒާހަރާތަކެއް ނޫން ކަމަށާއި، މީގެ ނާޖާއިޒު ފައިދާ ބޭރުގެ ބާރުތަކުން ނަގާފައިވާ ކަމަށް އޭނާ ވިދާޅުވިއެވެ.
އީރާނުގެ ތެހެރާންގައި ކުރިއަށްދިޔަ މުޒާހަރާގެ ބައިވެރިން އެއްވެފައި -- ފޮޓޯ: ރޮއިޓާސް
"އާދައިގެ މުޒާހަރާތަކުގައި މީހުން ބަޑި ނުއުފުލާނެ، އަދި ސަލާމަތީ ބާރުތަކުގެ މީހުންނެއް ނުމަރާނެ. އެމްބިއުލާންސާއި ފިހާރަތަކުގައި ހުޅެއް ނުޖަހާނެ،" ޕެޒެޝްކިއަން ވިދާޅުވިއެވެ. އޭނާ އިތުރަށް ވިދާޅުވީ، ސުލްހަވެރިކަމާއެކު ކަންބޮޑުވުންތައް ފާޅުކުރާ ފަރާތްތަކުގެ އަޑުއަހައި، އެކަންކަން ހައްލުކުރުމަށް ސަރުކާރު އޮތީ ތައްޔާރަށް ކަމަށެވެ.
އީރާނު ސަރުކާރުން ހާމަކޮށްފައިވާ ގޮތުގައި މި މުޒާހަރާތަކުގައި 3,000 އަށްވުރެ ގިނަ މީހުން މަރުވެފައިވެއެވެ. ނަމަވެސް އޭގެ ތެރެއިން ގިނައީ ސަލާމަތީ ބާރުތަކުގެ މީހުން ކަމަށް ސަރުކާރުން ބުނާއިރު، އިންސާނީ ހައްގުތަކަށް މަސައްކަތްކުރާ ޖަމާއަތްތަކުން ބުނަނީ މަރުވި މީހުންގެ އަދަދު އެތައް ހާހަކަށް އަރާނެ ކަމަށެވެ.
މި ހަމަނުޖެހުންތަކާ ގުޅިގެން އެމެރިކާގެ ރައީސް ޑޮނަލްޑް ޓްރަމްޕް ވަނީ އީރާނަށް އަސްކަރީ ހަމަލާއެއް ދީފާނެ ކަމުގެ އިންޒާރު ދެއްވާފައެވެ. އަދި އެމެރިކާގެ މަނަވަރުތައް މިހާރު ވެސް މެދުއިރުމަތީގެ ކަނޑުގެ ސަރަހައްދުގައި އޮތްއިރު، ޓްރަމްޕް ވިދާޅުވީ ބޭނުންވެއްޖެ ހިނދެއްގައި ހަމަލާދޭން އެމެރިކާ އޮތީ ތައްޔާރަށް ކަމަށެވެ.
އީރާނުގެ ޚާރިޖީ ވަޒީރު އައްބާސް އަރަގްޗީ ވިދާޅުވީ، އެމެރިކާއާއެކު "އިންސާފުވެރި" މަޝްވަރާތަކެއް ކުރަން އީރާނުން ތައްޔާރު ކަމަށެވެ. ނަމަވެސް ބިރުދެއްކުމާއި އިންޒާރުގެ ދަށުގައި އެފަދަ މަޝްވަރާއެއް ނުކުރެވޭނެ ކަމަށާއި، އީރާނުގެ މިސައިލް ޕްރޮގްރާމާ ބެހޭގޮތުން އެއްވެސް މަޝްވަރާއެއް ނުކުރެވޭނެ ކަމަށް އޭނާ ތަކުރާރުކުރެއްވިއެވެ.
މި މުޒާހަރާތަކާ ގުޅިގެން އެމެރިކާގެ ޓްރެޜަރީ ޑިޕާޓްމަންޓުން ވަނީ އީރާނުގެ ދާޚިލީ ވަޒީރު އިސްކަންދަރު މޫމިނީ އާއި ރިވޮލިއުޝަނަރީ ގާޑްސްގެ އިސް ބައެއް އޮފިޝަލުންނާ ދެކޮޅަށް ދަތިކުރުމުގެ ފިޔަވަޅުތައް އަޅާފައެވެ. މީގެ އިތުރުން، އީރާނުގެ މަހުޖަނު ބާބަކު ޒަންޖާނީ އާއި އޭނާއާ ގުޅުންހުރި ބައެއް ޑިޖިޓަލް ކަރަންސީ އެކްސްޗޭންޖްތަކަށް ވެސް ވަނީ ފިޔަވަޅު އަޅާފައެވެ.