ފީފާއިން ހޮވާ އަހަރުގެ އެންމެ މޮޅު ކުޅުންތެރިޔާގެ މަގާމް މިފަހަރު ވެސް ބަޔާން މިއުނިކްގެ ރޮބާޓް ލެވަންޑައުސްކީ ހޯދައިފިއެވެ.
ލެވަންޑައުސްކީއަށް އެ އެވޯޑް ލިބިފައި ވަނީ ރޭ ބޭއްވި ބެސްޓް ފީފާ ފުޓްބޯލް އެވޯޑްސް 2021 ގައެވެ. އެ ހަފްލާގައި އަންހެން އަދި ފިރެހެން ކެޓަގަރީން އެންމެ މޮޅު ކުޅުންތެރިޔާގެ އިތުރުން، އެންމެ މޮޅު ގޯލްކީޕަރާއި، ކޯޗާއި، ފީފާ ޕުސްކާސް އެވޯޑާއި، ފެއާ ޕްލޭ އެވޯޑް އަދި ފީފާ ޓޮޕް ފޭން އެވޯޑްވެސް ވަނީ ހަވާލުކޮށްފައެވެ.
ބެސްޓް ފީފާ މެންސް ޕްލޭޔަރުގެ މަގާމް މިދިޔަ އަހަރު ހޯދާފައިވަނީ ވެސް ލެވަންޑައުސްކީއެވެ. މިއީ އޭނާއަށް މި އެވޯޑް ލިބުނު ދެވަނަ ފަހަރެވެ.
ލެވަންޑައުސްކީ މިދިޔަ އަހަރު ވަނީ 44 މެޗެ ކުޅެދީ 51 ގޯލު ބަޔާން އަށާއި ޕޮލެންޑު ގައުމީޓީމަށް ކާމިޔާބުކޮށްދީފައެވެ. އަށް ގޯލު ޖެހުމަށް އެހީތެރިވެދީފައިވާ ލެވަންޑައުސްކީ 49 ގޯލު ޖަހާނެ ފުރުސަތު ތަނަވަސްކޮށްދީފައެވެ. އެނާ ވަނީ މިދިޔަ އަހަރު ބަޔާންއާއި އެކު ބޮންޑަސްލީގާއި ކްލަބު ވޯލްޑް ކަޕް ކާމިޔާބުކޮށްފައެވެ.
އާޖެންޓީނާގެ ލިއޮނަލް މެސީއާއި އިޖިޕްޓުގެ މުހައްމަދު ސަލާހް އާއި ވާދަކޮށް މި އެވޯޑް ކާމިޔާބު ކުރި ލެވަންޑައުސްކީ ވަނީ މިއަހަރު ބޮންޑަސްލީގާގެ ޓޮޕް ސްކޯރާކަމާއި، ޔޫރަޕިއަން ރަން ބޫޓުގެ އިތުރުން ކްލަބް ވޯލްޑު ކަޕްގެ ރަން ބޯޅަ ވެސް ހޯދާފައެވެ.
ބެސްޓް ފީފާ ފުޓްބޯލް އެވޯޑްސްގައި މި އަހަރުގެ އެންމެ މޮޅު އަންހެން ކުޅުންތެރިއަކަށް ހޮވިފައި ވަނީ ބާސެލޯނާގެ ސްޕެއިން މިޑްފީލްޑަރު އެލްކްސިއާ ޕުޓެލަސް އެވެ.
ފީފާއިން ހޮވާ މިއަހަރުގެ އެންމެ މޮޅު ފިރިހެން ގޯލް ކީޕަރުގެ މަގާމު ހާސިލްކޮށްފައި ވަނީ ޗެލްސީއާއި އެކު ޗެމްޕިއަންސް ލީގު އުފުލާލި ސެނެގާލްގެ ގައުމީޓީމްގެ ކުޅުންތެރިޔާ އެޑުއާޑް މެންޑީ އެވެ. އަދި މި އަހަރުގެ އެންމެ މޮޅު އަންހެން ގޯލްކީޕަރަކަށް ހޮވިފައިވާ ޕީއެސްޖީގެ ކްރިސްޓިއާނޭ އެންޑްލާއެވެ.
މިއަހަރުގެ ފީފާ ބެސްޓް މެންސް ކޯޗަކަށް ހޮވިފައި ވަނީ މިދިޔަ އަހަރު ޗެލްސީއަށް ޗެމްޕިއަންސް ލީގު ކާމިޔާބުކޮށްދިން އެ ޓީމްގެ ކޯޗް ތޯމަސް ޓުޗެލް އެވެ. މީގެ އިތުރުން އަންހެން އެންމެ މޮޅު ކޯޗަކަށް ހޮވިފައިވަނީ ޗެލްސީގެ އަންހެން ޓީމުގެ ކޯޗު އެންމާ ހަޔޭސްއެވެ.
ފީފާ ފޭން އެވޯޑް ހާސިލްކޮށްފައި ވަނީ ޔޫރޯ 2021 ގައި ޑެންމާކު އަދި ފިންލޭންޑު މެޗު ބަލަން ވަދެ ތިބި ސަޕޯޓަރުންނެވެ. އެއީ އެ މެޗުގައި ޑެންމާކުގެ ކްރިސްޓިއަން އެރިކްސަން ދަނޑުމަތީގައި ހުއްޓާ ކޮލައިޕްސް ވެގެން އެމެޖެންސީކޮށް ދަނޑުން ބޭލި އިރު ސަޕޯޓަރުން ދެއްކި ފުރިހަމަ ނަމޫނާގެ ސަބަބުންނެވެ.
މީގެ އިތުރުން މި ހާދިސާއާއި ގުޅިގެން ޑެންމާކު ޓީމުގެ ކުޅުންތެރިން ދެއްކި ހިތްވަރުގެ ސަބަބުން މި އަހަރުގެ ފެއާޕްލޭ އެވޯޑް ލިބިފައިވަނީ ޑެންމާކު ގައުމީ ޓީމަށާއި ޓީމުގެ އޮފިޝަލުންނަށެވެ.
އަދި އަހަރުގެ އެންމެ ރީތި ގޯލަށް ދޭ ފީފާ ޕުސްކާސް އެވޯޑް ހާސިލްކޮށްފައި ވަނީ ޓޮޓެންހަމް ހޮޓްސްޕާގެ އެރިކް ލަމޭލާއަށެވެ. އޭނާއަށް އެ އެވޯޑް ލިބުނީ މިދިޔަ އަހަރުގެ މާޗު މަހު 14 ވަނަ ދުވަހު އާސެނަލްއާއި ޓޮޓެންހަމް ކުޅުނު މެޗުގައިޖަހައިދިން ހިތްގައިމު ގޯލަށެވެ.