އުންމީދަކީ ޗައިނާއާއި ރާއްޖެއާ ދެމެދު ސޮއިކޮށްފައިވާ ފްރީ ޓްރޭޑް އެގްރިމެންޓް (އެފްޓީއޭ)އަށް އަވަހަށް އަމަލުކުރަން ފެށުން ކަމަށް އެ ގައުމުގެ ފޮރިން މިނިސްޓަރު ވާންގް ޔީ ވިދާޅުވެއްޖެއެވެ.
ފޮރިން މިނިސްޓްރީގައި މިއަދު ބޭއްވި ޚާއްސަ ރަސްމިއްޔާތުގައި ދެއްވި ބަޔާނުގައި ވާންގް ވިދާޅުވީ އެފްޓީއޭއަށް އަމަލުކުރަން ފެށުމުން ދިވެހި އުފެއްދުންތައްވެސް ޗައިނާގެ މާކެޓަށް ތައާރަފް ކުރެވޭނެ ކަމަށެވެ.
"ފްރީ ޓްރޭޑް އެގްރިމެންޓަށް އަމަލުކުރަން ފެށުމުން ދިވެހި އުފެއްދުންތައް ޗައިނާގެ މާކެޓަށް ގެންދިޔުމަށް ފަސޭހަ މަގުތައް ކޮށޭނެ،" ވާންގް ވިދާޅުވިއެވެ.
އެ މިނިވަން ވިޔަފާރީގެ އެއްބަސްވުމަކީ ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި ޗައިނާއާއެކު ސޮއިކުރި އެއްބަސްވުމެކެވެ. ނަމަވެސް މިއަދާ ޖެހެންދެންވެސް މި އެގްރިމެންޓަށް އަމަލުކުރަން ފަށާފައެއްނުވެއެވެ.
އެ އެއްބަސްވުމަށް އަމަަލުކުރަން ފެށޭނީ ވަކި ކަންތައްތަކެއް ކޮށްގެންކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވަނީ ވިދާޅުވެފައެވެ. ނަޝީދު ވިދާޅުވި ގޮތުގައި އެ އެއްބަސްވުމުގައި ސޮއިކުރާތާ 30 ދުވަހުގެ ތެރޭގައި އެ އެއްބަސްވުމާ ބެހޭ ގާނޫނުތަކެއް ދެ ގައުމުން ވެސް ހަދަންޖެހެއެވެ. ނަމަވެސް އޭގެއިން އެއްވެސް ކަމެއް ނިންމާފައި ނުވުމާއެކު، ރާއްޖެއާއި ޗައިނާއާ ދެމެދު ފްރީ ޓްރޭޑް އެގްރިމެންޓެއް ނެތްކަމަށް އޭނާ ވިދާޅުވިއެވެ.
ރާއްޖެއާއި ޗައިނާއާ ދެމެދު ފްރީ ޓްރޭޑް އެގްރިމެންޓެއްގައި ސޮއިކުރީ ރައްޔިތުންގެ މަޖިލީހުން އެކަމަށް ރުހުން ދީގެންނެވެ. ނަމަވެސް އޭރު އިދިކޮޅުގައި އޮތް އެމްޑީޕީން ވަނީ އެކަމާ ދެކޮޅު ހަދާފައެވެ. އެ އެގްރިމެންޓަށް އަމަލުކުރަން އެއްވެސް މަސައްކަތެއް މި ސަރުކާރުން ކޮށްފައިއެއްނުވެއެވެ.
ޗައިނާގެ ފޮރިން މިނިސްޓަރު ވާންގް ޔީ މިއަދު ދެއްކެވި ވާހަކަފުޅުގައި ވަނީ ކޮވިޑުގެ ބަލިމަޑުކަމުން އަރައިގަތުމަށް ކުރިއަށްއޮތްތަނުގައި ވެސް ރާއްޖެއަށް އެގައުމުން އެހީވާނެ ކަމަށް ވިދާޅުވެފައެވެ.
ވާންގް ވިދާޅުވީ ދިވެހި ފަތުރުވެރިކަން ޗައިނާގައި އިޝްތިހާރުކުރުމަށް ވެސް އެ ގައުމުން އެހީތެރިވާނެކަމަށެވެ. އެގޮތުން ފަތުރުވެރިކަން އިޝްތިހާރުކުރުމަށް ޗައިނާގައި ބާއްވާ އެންމެ ބޮޑު ހަރަކާތުގައި ރާއްޖެ ޕްރޮމޯޓްކުރުމާއެކު ފަތުރުވެރިކަން އަލުން ކޮޅަށް ޖެހުމަށް އިތުރު ފަސޭހެއް ލިބޭނެ ކަމަށް އޭނާ ވިދާޅުވިއެވެ.
ޗައިނާގެ ފޮރިން މިނިސްޓަރު ވަނީ ދިވެހީންގެ ޚާރިޖީ ސިޔާސަތު މިނިވަންކަމާއެކު ދެމެހެއްޓުމުގައި އެހީތެރިވާނެކަމަށްވެސް ވިދާޅުވެފައެވެ. އަދި ރާއްޖެ ތަރައްގީކުރުމުގައި އެހީތެރިކަމާއި އެއްބާރުލުން ފޯރުކޮށްދޭނެކަމަށް އޭނާ ވިދާޅުވިއެވެ.
ރާއްޖޭގެ ތަރައްގީއަށް އެ ގައުމުގެ އެހީގައި ހިންގާފައިވާ ބައެއް މަޝްރޫއުތަކާ ގުޅޭގޮތުން ވެސް ވާންގް ވާހަކަފުޅު ދެއްކެވިއެވެ. އެގޮތުން ވެލާނާ އިންޓަނޭޝަލް އެއާޕޯޓު ބޮޑުކުރުމުގެ މަސައްކަތާއި، ހުޅުލެ އާއި މާލެއާ ދެމެދު އަޅާފައިވާ ބްރިޖުގެ މަސައްކަތުގެ އިތުރުން 10،000 ހައުސިން ޔުނިޓު އެޅުމުގެ މަސައްކަތުގައި އެ ގައުމުން ރާއްޖެއަށް އެހީތެރިކަން ފޯރުކޮށްދިން ކަމަށް ވެސް އޭނާ ވިދާޅުވިއެވެ.
"ކުރިއަށް އޮތްތަނުގައިވެސް ރާއްޖެ ތަރައްގީކުރުމުގައި ޗައިނާގެ އެހީއާއި އެއްބާރުލުން ލިބޭނެކަމުގެ ޔަގީންކަން އަރުވަން،" ވާންގް ވިދާޅުވިއެވެ.
އޭނާގެ ވާހަކަފުޅުގައި ކުދި ގައުމުތަކަށް ދިމާވެފައިވާ ދުނިޔެ ހޫނުވުމުގެ މައްސަލައަށް ވެސް އަލިއަޅުވައިލެއްވިއެވެ.
ވާންގް ވިދާޅުވީ ދުނިޔެ ހޫނުވުމުގެ މައްސަލާގައި ދިވެހީން ކުރާ މަސައްކަތަށް ޗައިނާގެ އެއްބާރުލުން އަބަދުވެސް ލިބޭނެކަމަށެވެ. އަދި ދެ ގައުމު ގުޅިގެން ޕެރިސް އެގްރިމެންޓް ތަންފީޒުކުރާނެ ކަމަށް އޭނާ ވިދާޅުވިއެވެ.
ޗައިނާގެ ފޮރިން މިނިސްޓަރު ރާއްޖެއަށް ކުރައްވާ ރަސްމީ ދަތުރުފުޅަކީ ރާއްޖެއާއި ޗައިނާއާ ދެމެދު ޚާރިޖީ ގުޅުން ގާއިމުކުރިތާ 50 އަހަރު ފުރޭ މުނާސަބަތާ ދިމާކޮށް ކުރައްވާ ދަތުރުފުޅެކެވެ. މި ދަތުރުފުޅުގައި ރާއްޖެއާ އެކު ފަސް އެއްބަސްވުމެއްގައި އެ ގައުމުން ވަނީ ސޮއިކުރައްވާފައެވެ.
ވާންގެ މި ދަތުރުފުޅުގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހާ ވެސް ބައްދަލުކުރެއްވިއެވެ. މިރޭގެ ވަގުތެއްގައި އޭނާ ވަނީ ދަތުރުފުޅު ނިންމަވާލެއްވުމަށްފަހު ފުރާވަޑައިގެންފައެވެ.