އީރާނުގެ ނިއުކްލިއާ ޕްރޮގްރާމާ ގުޅޭގޮތުން 2015ގައި ހެދި ޑީލަށް އަނބުރާ ރުޖޫއަވުމާ ބެހޭ ގޮތުން އޮސްޓްރިއާގެ ވިއެނާގައި އަށް ވަނަ ފަހަރަށް މަޝްވަރާތައް ބާއްވައިފިއެވެ.
އެ މަޝްވަރާތަކުގައި އީރާނުގެ ފަރާތުންނާއި ދުނިޔޭގެ އެހެނިހެން ބާރުތަކުގެ ފަރާތުން ޑެލިގޭޓުން ވަނީ ބައިވެރިވެފައެވެ.
އީރާނުގެ ފަރާތުން ވާހަކަފުޅުދައްކަވަމުން އެ ގައުމުގެ ޗީފް ނެގޯޝިއޭޓަރު އަލީ ބަގޭރީ ކަނީ ވިދާޅުވީ، ވާހަކަތައް ކުރިއަށްދާ ގޮތް ރަނގަޅު ކަމަށާއި މަޝްވަރާތަކާ ބެހޭ ރަނގަޅު ފްރޭމްވޯކެއް މިހާރު އެބައޮތް ކަމަށެވެ.
"މި ޖޮއިންޓް ކޮމިޝަންގެ ބައްދަލުވުމުގެ އެންމެ މުހިންމު ކަމަކީ [އީރާނާ ދެކޮޅަށް] މިހާރު އަޅާފައިވާ ދަތިކުރުމުގެ ފިޔަވަޅުތައް ނެގުމަށް އިސްކަން ދިނުމުގެ މުހިންމު ކަމާ ބެހޭ ގޮތުން އެކި ފަރާތްތަކުން ވާހަކަ ދައްކައި، އަށް ވަނަ ބުރުގައި އެކަމުގެ ޔަގީންކަން ވެސް ދިންކަން،" ކަނީ ވިދާޅުވިއެވެ.
ކަނީ ވަނީ އީރާނަށް ގަބޫލުކުރެވޭ އެއްބަސްވުމަކާ ހަމައަށް އާދެވެންދެން ވިއެނާގައި މަޑުކުރަން އެގައުމުގެ ޑެލިގޭޝަނުން ތައްޔާރަށް އޮތް ކަމަށް ވިދާޅުވެފައެވެ.
ދެހާސް ފަނަރަ ވަނަ އަހަރު ދުނިޔޭގެ ބާރުތަކުން އީރާނާއެކު ހެދި އެއްބަސްވުމުން، 2018 ވަނަ އަހަރު އެމެރިކާއިން ވަނީ ވަކިވެފައެވެ. އެއީ ކުރީގެ ރައީސް ޑޮނަލްޑް ޓްރަމްޕްގެ ވެރިކަމުގައެވެ.
އީރާނުން މިހާރު އެދެނީ އެމެރިކާ ދެން އެއްބަސްވުމަށް ރުޖޫއަވެއްޖެ ނަމަ، އެ އެއްބަސްވުމުން ވަކިނުވާނެ ކަމުގެ ޔަގީންކަން ދިނުމަށެވެ. އަދި އީރާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އެއްކޮށް އުވާލުމަށް ވެސް އެގައުމުން ވަނީ ގޮވާލާފައެވެ.
އެމެރިކާއިން އެ އެއްބަސްވުމުން ވަކިވި ފަހުން އީރާނުން ދަނީ އެގައުމުގެ ނިއުކްލިއާ ޕްރޮގްރާމް ފުޅާ ކުރަމުންނެވެ.