ބެއާ ގްރިލްސްގެ ޑޮކިއުމެންޓްރީ ސީރީޒްގެ އެންމެ ފަހުގެ އެޕިސޯޑުގައި ކ. ހުރާގެ ކުޅި އާ ބެހޭ ގޮތުން ދޮގު މައުލޫމާތު ގެނެސްދީފައިވާތީ ހުރާ ކައުންސިލުން ކަންބޮޑުވުން ފާޅުކޮށްފިއެވެ.
ހުރާގެ ކައުންސިލުގެ ރައީސް އީސާ އަހްމަދު މިއަދު "ސަން" އަށް ވިދާޅުވީ މިއީ ހުރާގެ ރައްޔިތުންގެ ވަރަށް ބޮޑު ކަންބޮޑުވުމެއް ކަމަށެވެ.
"އެމީހުން ހަމަ ވަރަށް ތެދު މައުލޫމާތު ހޯދި ކުޅި އާ ބެހޭ ގޮތުން. އެކަމު ފަހު ވަގުތު މިއޮތީ ހުސް ދޮގު. އަޅުގަނޑުމެންނަށް ވެސް އަލަށް މި އަޑު އިވުނީ ކުޅީގަ ހަރުފަ އާއި ކިނބޫ އުޅޭ ވާހަކަ. އެކަހަލަ ބިރުވެރި ކަމެއް މިވީ ހުރިހާ ދުވަހު ވެސް ފެންނާކަށް ނެތް،" އޭނާ ވިދާޅުވިއެވެ.
އީސަ ވިދާޅުވީ ސައްހަ މައުލޫމާތު ހޯދުމަށް ފަހު ވެސް ދޮގު މައުލޫމާތު ފަތުރާފަ ވާތީ އެކަމާ ހައިރާންވާ ކަމަށާއި އެކަމާ ގުޅިގެން އިތުރަށް ބުނާނެ އެއްޗެއް ވެސް ނޭނގޭ ކަމަށެވެ.
އިނގިރޭސި ވިލާތުގެ ސަވައިވަލް އެކްސްޕާޓް ގްރިލްސް ގެނެސްދެމުން އަންނަ "އިންޓު ދަ ވައިލްޑް" ގެ އެންމެ ފަހު އެޕިސޯޑުގައި ދައްކަނީ ރާއްޖޭގެ ދެ ސަރަހައްދެކެވެ. އެއް ސަރަހައްދަކީ ހުރާގެ ކުޅިއާއި ވ. އަތޮޅުގެ "ޝިޕްވަރެކް" ސަރަހައްދެވެ.
އެމްއެންޑީއެފްގެ ކޯސްޓް ގާޑު އުޅަނދެއްގައި ކުޅިއާ ކައިރި ކުރުމުން ބެއާ ބުނަނީ އެ ކުޅީގައި ކިނބުލާއި ހަރުފަ ފަދަ ނުރައްކާތެރި ޖަނަވާރު އުޅޭނެ ކަމަށެވެ. ނަމަވެސް، އަދި މިވީހާ ތަނަށް ރާއްޖޭގެ ތާރީހުގައި އެފަދަ ނުރައްކާތެރި ޖަނަވާރެއް އެ ސަރަހައްދުން ފެނިފައެއް ނުވެއެވެ.
އިންޓު ދަ ވައިލްޑް ޑޮކިއުމެންޓަރީ ގެ އެޕިސޯޑެއް ޝޫޓް ކޮށްފައިވާ ކ. ހުރާ ކުޅި ----
ބެއާ އިތުރަށް ބުނީ އެ ކުޅީގައި ތިން މޭލު ހުންނާނެ ކަމަށެވެ. އެހެންނަމަވެސް، ރާއްޖޭގައި އެހާ ބޮޑު ކުޅިއެއް ނޯންނާނެއެވެ.
އެއަށްފަހު، ދެން ދައްކާލަނީ ހުރާ ކުޅީގެ މެޕެކެވެ. މި މެޕުން ފެންނަ ގޮތުގައި ވ. އަތޮޅުގައި އޮންނަ ޝިޕްރެކާ ކުޅި އާ ދެމެދު ހުންނަނީ އެއް މޭލުގެ ދުރުމިނެއެވެ. އެހެންކަމުން، ބެއާ ދައްކާ މެޕަކީ ރާއްޖޭގެ މެޕެއް ނޫން ކަން އެނގެއެވެ. ކެޔޮދޫ ފަޅުގައި އޮންނަ ޝިޕްރެކާއި އެ ކުޅި އާ ދެމެދު ހަގީގަތުގައި 60 މޭލުގެ ދުރުމިން ހުންނާނެއެވެ.
ޑޮކިއުމެންޓްރީއިން ފެންނަ ގޮތުގައި އެމީހުން ޝިޕްރެކަށް ދަނީ ހުރާ ކުޅިން ފަތާފައެވެ.
އިންޓު ދަ ވައިލްޑް އެޕިސޯޑުގެ ޝޫޓިން ވ. އަތޮޅުގައި އޮންނަ ޝިޕްރެކްގައި ކުރިއަށް ދަނިކޮށް ---
ޝިޕްރެކުގެ ކައިރީ ފީނި ފީނުމުން ބެއާ އަށް ވަނީ މޫދު އަޑިން މަސް ދަޅެއް ފެނިފައެވެ. މިއީ އޯޕަން ކޭން އިންނަ މަސްދަޅަކަށް ވާއިރު އޭނާ ބުނީ އެއީ 20 ވަރަކަށް އަހަރު ވެފައިވާ އެއްޗެއް ކަމަށެވެ. އޭނާ އިތުރަށް ބުނީ އެއީ ބުޅާ ކާ އެއްޗެއް ކަމުގައެވެ. ނަމަވެސް ހަގީގަތުގައި ރާއްޖޭގައި އޯޕަން ކޭން މަސްދަޅު އުފައްދަން ފެށީ ދާދި ފަހުންނެވެ.
މި ޑޮކިއުމެންޓްރީ ނިމިގެން ދާއިރުވެސް މިއީ ރާއްޖޭގެ ސަރަހައްދެކޭ ބެއާ ނުބުނެއެވެ. އޭނާ ބުނެފައި ވަނީ މިއީ އިންޑިއާ ކަނޑުގެ މެދު ތެރޭގެ ކޮންމެވެސް ހިސާބެއް ކަމަށެވެ.
މީގެ ކުރިންވެސް "އިން ޓު ދަ ވައިލްޑް"ގެ އެހެން އެޕިސޯޑެއްގައިވެސް ވަނީ ވ. އަތޮޅުގެ ފަޅު ރަށެއްގައި ވަނީ ޝޫޓްކޮށްފައެވެ. އަދި އެ އެޕިސޯޑުގައި ވެސް ވަނީ އެ ރަށުގައި ހަރުފަ އުޅޭ ކަމަށް ބުނެފައެވެ.
މި ކަމާއި ގުޅިގެން ގިނަ ބަައެއްގެ ފާޑު ކިޔުން ވަނީ ބެއާ ގްރިލްސްއަށް އަމާޒުވެފައެވެ.