ތާޖުއްދީން ސުކޫލު ފަޅައިލައި، އެ ސުކޫލުގެ ސްޓާފްރޫމުން ވަގަށް ނެގި ޓެބްލެޓުތަކަކާއި އިތުރު ބައެއް ތަކެތި ހޯދައިފިއެވެ.
ފުލުހުންގެ މީޑިއާ އޮފިޝަލް "ސަން" އަށް ވިދާޅުވީ އެ ސުކޫލުން ރޭ ދަންވަރު ވައްކަން ކުރި ކަމުގެ ރިޕޯޓު ލިބިފައިވަނީ މިއަދު ހެނދުނު 10:28 ހާއިރު ކަމަށެވެ.
ފުލުހުން ބުނީ ސްޓާފްރޫމުން ވަގަށް ނަގައިފައިވަނީ ހަތް ޓެބްލެޓާއި އަތްދަބަހެއް ކަމަށެވެ.
މި މައްސަލަ ހުށަހެޅުމާއެކު، ސީސީޓީވީ ކެމެރާގެ އެހީގައި މި ތަކެތި ހޯދައިފައިވާ ކަމަށް ވެސް ފުލުހުން ބުނެއެވެ. ވަގަށް ނެގި ތަކެތި ހޯދައިފައިވަނީ މާލޭ ގެއެއްގެ ތެރެއިންނެވެ.
ވަގަށް ނެގި ތަކެތި ހޯދި ނަމަވެސް މިހާތަނަށް މި މައްސަލައިގައި މީހަކު ހައްޔަރުކޮށްފައެއްނުވެއެވެ.
ފުލުހުން ބުނީ މައްސަލައިގައި އިތުރަށް ބަލަން ޖެހޭ ކަންކަން ބަލަމުން އަންނަ ކަމަށެވެ.