އއ. ފެރިދޫ ރައްޔިތުންނަށް އޭޓީއެމްގެ ހިދުމަތް ބޭނުންވާ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހަށް ދަންނަވައިފިއެވެ.
ރައީސަށް މިވާހަކަތައް ދެންނެވީ ފެރިދޫ ކައުންސިލާއެކު މިއަދު ބޭއްވި މަޝްވަރާ ބައްދަލުވުމެއްގައެވެ.
މި ބައްދަލުވުމުގައި ފެރިދޫ ކައުންސިލަރުން ވަނީ ރަށުގެ ތަރައްގީއަށް އެންމެ މުހިންމު ޕްރޮޖެކްޓްތަކާ ގުޅޭގޮތުން ރައީސްއާ މަޝްވަރާ ކޮށްފައެވެ.
އޭގެ ތެރޭގައި އެރަށުގެ ބަނދަރު ހެދުމާއި ގިރާ ސަރަހައްދު ހިމާޔަތްކުރުމާ ސިއްހީ މަރުކަޒުގެ ހިދުމަތް 24 ގަޑިއިރަށް ބަދަލުކުރަން ބޭނުންވާކަމުގައި ރައީސްއަށް ދެންނެވިއެވެ.
މީގެ އިތުރުން އައު މިސްކިތެއް ބިނާ ކުރުމާއި ޒުވާނުންނަށް ހާއްސަކޮށް، އެކި ކުޅިވަރުތައް ކުޅެވޭނެ ފަދަ މަރުކަޒެއް ބިނާކުރުމާ އެރަށުގައި ހުންނަ އއ. އަތޮޅު ސުކޫލަށް މަލްޓިޕާޕަސް ހޯލެއް އިތުރުކުރުމާބެހޭގޮތުން ރައީސްއާ މަޝްވަރާ ކުރިއެވެ.
މި މަޝްވަރާ ބައްދަލުވުމުގައި ކައުންސެލަރުން ފާހަގަކުރި އެހެނިހެން ކަންކަމުގެ ތެރޭގައި ރަށުގެ އިޖުތިމާއީ އަދި އިގްތިސޯދީ ތަރައްގީއަށް މުހިންމު ކަންކަން ހިމެނެއެވެ.
ފެރިދޫގެ ތަރައްގީއަށް އެންމެ މުހިންމު ޕްރޮޖެކްޓްތަކާ ގުޅޭގޮތުން ކައުންސިލަރުންނާއެކު މަޝްވަރާ ކުރެއްވުމަށްފަހު، ރައީސް، ވިދާޅުވީ ފެރިދޫ ކައުންސިލުން ފާހަގަކުރި ކަންކަމުގެ ތެރެއިން ބަނދަރުގެ މަސައްކަތާއެކު ގިރާ ސަރަހައްދު ހިމާޔަތްކުރުމުގެ މަސައްކަތް ކުރިޔަށްގެންދެވިދާނެތޯ ބައްލަވައިދެއްވާނެ ކަމަށެވެ.
މީގެ އިތުރުން ފެރިދޫ ކައުންސިލުން ފާހަގަކުރި ކަންކަމުގެ ތެރެއިން ބަނދަރު ހެދުމުގެ މަޝްރޫއު ވެސް އަންނަ އަހަރުގެ ބަޖެޓުގައި ހިމަނާފައިވާކަން ރައީސް ފާހަގަކުރެއްވިއެވެ.
ރައީސް އިތުރަށް ވިދާޅުވީ ކައުންސިލުން ފާހަގަކުރި ކަންކަމުގައި ވެސް ކަމާގުޅޭ މިނިސްޓްރީތަކާ މަޝްވަރާ ކުރައްވާނެ ކަމަށެވެ.
ރައީސް، މީގެ ކުރީންވެސް ވިދާޅުވަމުން ގެންދަވާ ވާހަކަފުޅެއް ތަކުރާރު ކުރައްވައި ވިދާޅުވީ ސަރުކާރުން ތަރައްގީގެ ކަންކަން ހިންގުމުގައި ވަކި ރަށެއް ތަފާތު ކުރެއްވުމެއްނެތި ތަރައްގީގެ މަޝްރޫއުތައް ކުރިޔަށްގެންދަވާނެ ކަމަށެވެ.