ރާއްޖޭގައި ފިޒިކަލް އަދި ވާޗުއަލްކޮށް އެއްފަހަރާ ކުރިއަށްގެންދާ ފުރަތަމަ ފޮތް މައުރަޒު އިސްލާމިކް ޔުނިވާސިޓީ އޮފް މޯލްޑިވްސް (އައިޔޫއެމް) އިން ފަށައިފިއެވެ.
އިގްރާ ހައިބްރިޑް ފޮތް މައުރަޒުގެ ނަމުގައި މިއަދު ހެނދުނު ފެށި މި ފޮތް މައުރަޒު ކުރިއަށް ދާނީ މި މަހުގެ 10 ވަނަ ދުވަހުގެ ނިޔަލަށް ޔުނިވާސިޓީގެ ހޯލުގައި އަދި ޔުނިވާސިޓީގެ ލާނިން ސެންޓަރު ހުންނަ ރަށްތަކުގައެވެ. އެއީ ލ. ފޮނަދޫ، ސ. މީދޫ، ހދ. ހަނިމާދޫ އަދި ފުވައްމުލައް ސިޓީގައެވެ.
އެ ފޮތް މައުރަޒުގައި އައިޔޫއެމްއާއި ލާނިން ސެންޓަރުތަކުގެ އިތުރުން އޮންލައިންކޮށްވެސް ފޮތް ގަތުމުގެ ފުރުސަތު ވަނީ ހުޅުވައިލައިފައެވެ.
އެގޮތުން އޮންލައިންކޮށް ފޮތްތަކަށް އޯޑަރު ކުރަން ބޭނުންވާ މީހުންނަށް އިގްރާ ވެބްސައިޓް iqra.com.mv މެދުވެރިކޮށް އޯޑަރު ކުރެވޭނެ ކަމަށް އައިޔޫއެމްއިން ބުންޏެވެ.
އައިޔޫއެމްއިން ބުނީ މި ފޮތް މައުރަޒުގެ މަގުސަދަކީ އިލްމު ފެތުރުމާއި މައުލޫމާތު މުއްސަނދި ކުރުމަށް އެހީތެރިވުން ކަމަށެވެ. އަދި ލިޔުންތެރިންނާއި ޝާއިއުކުރާ ފަރާތްތަކާއި ފޮތް ވިއްކާ ފަރާތްތަކަށް ފޮތް ވިއްކުމަށް މަގުފަހިކޮށްދިނުމަކީވެސް މި މައުރަޒުގެ އަމާޒެއް ކަމަށް އައިޔޫއެމްއިން ބުންޏެވެ.
އެ މައުރަޒުން އެކި ބާވަތުގެ ފޮތާއި މަޖައްލާ އަދި އޯޑިއޯ ވިޝުއަލް ފަދަ ތަކެތި ހެޔޮ އަގުގައި ލިބެން ހުންނާނެ ކަމަށްވެސް އައިޔޫއެމްއިން ބުންޏެވެ.
ހަމައެއާއެކު މުޖުތަމައުގައި ކިޔުންތެރިކަމުގެ ސަގާފަތް ދެމެހެއްޓުމަށް ބާރުއެޅުމަށް އެކި އުމުރުފުރައަށް އަމާޒު ކޮށްގެން، އެ މައުރަޒުގައި ހަރަކާތްތަކެއް ހިންގަން ހަމަޖެހިފައިވާކަން އައިޔޫއެމްއިން ފާހަގަކުރިއެވެ.