އޭޝިއާ އާއި ޔޫރަޕްގެ ގައުމުތަކުގައި އަނެއްކާވެސް ބާރު ސްޕީޑުގައި ދޫނި ރޯގާ ފެތުރެން ފަށައިފިއެވެ.
އޭޝިއާ އަދި ޔޫރަޕްގައި ގިނަ އަދަދެއްގެ ދޫނިތަކަކަށް މި ރޯގާ ޖެހި ވޯލްޑް އޯގަނައިޒޭޝަން ފޯ އެނިމަލް ހެލްތު (އޯއައިއީ) އަށް ރިޕޯޓު ކުރަމުން ދާ ކަމަށްވެސް ބޭރުގެ ބައެއް މީޑިއާ ތަކުން ވަނީ ރިޕޯޓުކޮށްފައެވެ.
މި ބައްޔަކީ ފަސޭހަކަމާއެކު އިންސާނުންގެ ގަޔަށްވެސް އަރާ ބައްޔަކަށް ވުމުން ގިނަ އެޕިޑެމޮލޮޖިސްޓުން ދަނީ ކަންބޮޑުވުން ފާޅު ކުރަމުންނެވެ.
މި އަހަރުގެ މިހާތަނަށް ޗައިނާއިން ވަނީ 21 މީހަކަށް މި ބަލި ޖެހުނުކަމަށް ރިޕޯޓު ކޮށްފައެވެެ. މިއީ މިދިޔަ އަހަރާ އަޅާ ބަލާއިރު ގިނަ އަދަދެއް ކަމަށް އޯއައިއީ އިން ވަނީ ބުނެފައެވެ.
ދެކުނު ކޮރެއާއިން ރިޕޯޓު ކޮށްފައިވާ ގޮތުގައި އެ ގައުމުގައި 770،000އަށް ވުރެ ގިނަ ޖަނަވާރު ގެންގުޅޭ ފާމްއަކުން ވަނީ މި ރޯގާގެ އަސަރުތައް ފެނިފައެވެ. އޭގެ ސަބަބުން އެތަނުގައި ގެންގުޅުނު ހުރިހާ ޖަނަވާރެއް ވަނީ ކަތިލައިފައެވެ.
ދޫނި ރޯގާގެ ޖަރާސީމު އާންމުގޮތެއްގައި ހުންނަނީ ބަލިޖެހިފައިވާ ދޫނީގެ ނަޖިހުގަޔާއި، ދޫނީގެ ނޭވާލާ ނިޒާމުގައި ހުންނަ ދަވައިގައާއި ދޫނީގެ ލޭގަ އެވެ.
ދޫނި ރޯގާގެ ވައިރަސް ދޫނިތަކުގެ މެދުގައި ފެތުރެނީ ތަންތަނުން ގެންނަ ދޫނިތަކާއި ގައުމުތަކުގެ ސަރަހައްދު ހުރަސްކޮށް އެއްގައުމުން އަނެއް ގައުމަށް ހިޖުރަކުރާ ދޫނިތައް އެހެން ދޫނިތަކާ ގައިގޯޅިވުމުގެ ސަބަބުންނެވެ. އިންސާނުންގެ ކެއުމަށް ބޭނުންކުރާ ކުކުޅު ހާލާއި ޓާކީ އާއި އަސްދޫނި ފަދަ ދޫނިތަކަކީ އެންމެ ފަސޭހައިން ދޫނި ރޯގާގެ ވައިރަސް ޖެހޭ ދޫނިތަކެވެ.