މިހާރު ކުރިއަށްދާ ކްރިކެޓް ވޯލްޑްކަޕުގެ ގުރޫޕް ސްޓޭޖު ފަހު މެޗުގައި ނަމިބިއާ އަތުން މޮޅުވި ނަމަވެސް އިންޑިއާ މުބާރާތާއި އަލްވަދާއު ކިޔައިފިއެވެ.
ޔުނައިޓެޑް އަރަބި އެމިރޭޓްސް (ޔޫއޭއީ) ގައި ކުޅެމުން އަންނަ ވޯލްޑްކަޕުގައި އިންޑިއާ އެ މެޗަށް ނުކުން އިރު ވެސް އޮތީ ސެމީ ފައިނަލުގެ ޖާގަ ގެއްލިފައެވެ. މުބާރާތުގައި ކުޅުނު ފަސް މެޗުގެ ތެރެއިން ދެ މެޗުން ބަލިވި އިންޑިއާއަށް ލިބިފައިވަނީ ހަ ޕޮއިންޓެވެ. އެ ގުރޫޕުގެ އެއްވަނަ ހޯދި ޕާކިސްތާން ދިހަ ޕޮއިންޓް ހޯދި އިރު، ނިއުޒީލަންޑް ވަނީ އަށް ޕޮއިންޓް ހޯދައިފައެވެ.
މި ނަތީޖާތަކާއެކު އިންޑިއާ މުބާރާތަށް އަލްވަދާއު ކިޔައިފައިވާ އިރު، ނަމިބިއާ އަތުން ފަހު މެޗުގައި އެ ޓީމު މޮޅުވީ ނުވަ ވިކެޓުންނެވެ. އެ މެޗަށްފަހު އިންޑިއާގެ ކެޕްޓަން ވިރާތު ކޯލީ ވަނީ ޓީ20 ގައި އެ ޓީމަށް ކެޕްޓަންކަމުން ދުރުވެފައެވެ.
ވިރާތު ވަނީ ޓީ20 މުބާރާތްތަކުގެ ތެރެއިން 50 މެޗުގައި އިންޑިއާގެ ޓީމަށް ކެޕްޓަންކަން ކޮށްދީފައެވެ. އޭގެ ތެރެއިން 30 މެޗުން އިންޑިއާ މޮޅުވި އިރު، 16 މެޗުން ވަނީ ބަލިވެފައެވެ.
މި މެޗުގެ ޓޮސް ދިމާވުމުން އިންޑިއާއިން ނިންމީ ހޮވުމަށެވެ. އެއާއެކު ނެމިބިއާ އެންމެ ފުރަތަމަ ކުޅެން އަރައި، 20 އޯވަރު ހަމަވިއިރު އަށް ކުޅުންތެރިން ނުބައިވެގެން ހެދުނީ 132 ލަނޑެވެ. ޖަވާބުގައި އިންޑިއާ ކުޅެން އަރައި، 15.2 އޯވަރުގެ ތެރޭގައި އެންމެ ކުޅުންތެރިއަކު ނުބައިވެގެން ވަނީ 136 ލަނޑު ހަދައި މެޗު ކާމިޔާބުކޮށްފައެވެ.
މީގެ އިތުރުން މި މުބާރާތަށް ފަހު އެ ޓީމުގެ ކޯޗުގެ މަގާމުން ރަވީ ޝާސްތުރީ ވަކިވާނެއެވެ. އެ ގައުމުގެ ކޯޗުކަމާ ދެން ހަވާލުވާނީ އިންޑިއާގެ ކުރީގެ ކެޕްޓަން ރާހުލް ޑްރާވިޑެވެ.