މިހާރު ކުރިއަށްދާ ޓީ20 ކްރިކެޓް ވޯލްޑް ކަޕުގައި އަފްޢާނިސްތާން ބަލިކޮށް ނިއުޒީލަންޑް ސެމީ ފައިނަލަށް ދަތުރު ކުރިއިރު، އިންޑިއާއަށް ފުރުސަތު ގެއްލިއްޖެއެވެ.
މި މުބާރާތުގެ މެޗުތައް ޔުނައިޓެޑް އަރަބި އެމިރޭޓްސް (ޔޫއޭއީ) ގައި ކުޅެމުން އަންނައިރު، މިއަދު ހަވީރު އަފްޢާނިސްތާން އަތުން ނިއުޒީލަންޑް ކުރި ހޯދީ އަށް ވިކެޓުންނެވެ. މި މޮޅާއެކު ނިއުޒީލަންޑް މުބާރާތުގެ ސެމީއިން ޖާގަ ހޯދިއިރު، އަފްޢާނިސްތާނުގެ ބައްޔާއެކު ގެއްލުންވި އަނެއް ގައުމަކީ އިންޑިއާއެވެ.
މި މެޗަށް ނުކުން އިރު ވެސް ސެމީއިން ފުރުސަތު ގެއްލިފައި އޮތް އަފްޢާނިސްތާން މޮޅެއް ހޯދި ނަމަ އިންޑިއާއަށް ސެމީއަށް ދިއުމުގެ ފުރުސަތު އޮންނާނެއެވެ. އެކަމަކު ޕާކިސްތާން އަދި ނިއުޒީލަންޑް އަތުން ވެސް ބަލިވި އިންޑިއާއަށް މިއަދުގެ ނަތީޖާއާއެކު ވަނީ މުބާރާތުގައި ކުރިއަށް ދިއުމުގެ ދޮރު ބަންދުވެފައެވެ.
މިއަދުގެ މެޗުގައި އަފްޢާނިސްތާނުން އެންމެ ފުރަތަމަ ކުޅެން އަރައި، 20 އޯވަރު ހަމަވިއިރު ހަތް ކުޅުންތެރިން ނުބައިވެގެން ހެދުނީ 124 ލަނޑެވެ.
ޖަވާބުގައި ނިއުޒީލަންޑުން ކުޅެން އަރައި 18.1 ގެ އޯވަރުގެ ތެރޭގައި ދެ ކުޅުންތެރިން ނުބައިވެގެން ވަނީ 125 ލަނޑު ހަދައި މެޗު ކާމިޔާބުކޮށްފައެވެ.
ނިއުޒީލަންޑާ އެކު ގުރޫޕު ދެއަކުން ސެމީގެ ޖާގައެއް ދެން ހޯދީ ޕާކިސްތާނުންނެވެ. ގުރޫޕު އެކަކުން އެ ޖާގަތައް ހޯދީ އިންގްލޭންޑާއި އޮސްޓްރޭލިއާއެވެ.