ރައްޔިތުންގެ މަޖިލީހުގެ މެމްބަރެއްގެ ގޮތުގައި ހުރެ އެ މެމްބަރުންނަށް ލިބެންޖެހޭ އިއްޒަތް ނުލިބޭނަމަ މެމްބަރުންނާ މުހާތަބުކުރުން އެންމެ ރަނގަޅު ގޮތަކީ "ނިކަމެތި މެމްބަރުން"ކަމަށް ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު އިކްރާމް ހަސަން ވިދާޅުވެއްޖެއެވެ.
މަޖިލީހުގެ މެމްބަރުންނަށް ސާފުގެ މެޗުތަކުގެ ޓިކެޓު ވިއްކުމުގައި ހާއްސަ އިމްތިޔާޒުތަކާއި އިންތިޒާމުތައް ނެތުމުން އެކަމާ ހިތްހަމަޖެހިވަޑައިނުގަތް އިކްރާމްވަނީ އެމްޑީޕީގެ ވަަޓްސްއަޕް ގްރޫޕަކަށް މެސެޖުކުރައްވާފައެވެ.
މަޖިލީހުގެ މެމްބަރުންތަކެއް ހިމެނޭ ގްރޫޕެއްގައި އޭނާ ހިތްހަމަ ނުޖެހުން ފާޅުކޮށް މެސެޖުކޮށްފައިވަނީ ރޮސްޓްރަމް އިން މަޖިލީހުގެ މެމްބަރުންނަށް ޖާގަ ނުލިބޭތީއެވެ. އަދި ޓިކެޓު ހޯދުމުގައި މެމްބަރުންނަށް ހާއްސަ އިންތިޒާމުތަކެއް ނެތުމުންނެވެ.
"އިއްޒަތްތެރިކަން ނުލިބޭނަމަ އިއްޒަތްތެރި މެމްބަރު ކިއުމުގެ ބަދަލުގައި ނިކަމެތި މެމްބަރު ކިއުން ރަނގަޅުވާނެ. އޭރުން ރައްޔިތުން އަދި މާ އުފާވާނެ،" އިކްރާމްގެ މެސެޖެއްގައި ވިދާޅުވިއެވެ.
ހަމައެއާއެކު ވީއައިޕީކޮށް ދަނޑަށް ވަދެވޭނެ އިންތިޒާމު ހަމަޖައްސައިދިނުމަށް ވެސް އޭނާ ވަނީ އެދިފައެވެ.
އޭނާ ވަނީ މަޖިލީހުގެ މެމްބަރުންނަށް ދޭ އިއްޒަތް އަމަލުން ނުފެންނާތީ ކަންބޮޑުވުން ފާޅުކޮށްފައެވެ. އެގޮތުން މެމްބަރުންނާ މުހާތަބުކުރާއިރު "އިއްޒަތްތެރި"އެއްގެ ލަގަބު ދީފައި މުހާތަބުކުރި ނަމަވެސް އާންމު ތަންތަނުގައި އެ އިއްޒަތް ނުލިބޭކަމަށް ބުނެ އޭނާ ވަނީ ޝަކުވާކުރައްވާފައެވެ.