ލ. މުންޑުއިން ކޮވިޑް-19 ކޭސްތަކެއް ފެނިއްޖެއެވެ.
މުންޑޫ ކައުންސިލް ރައީސް އާދަމް ނާސިފް "ސަން" އަށް ވިދާޅުވީ އެރަށުގައި މިހާރު ކޮމިއުނިޓީ ސްޕްރެޑެއް އޮތްކަމަށް ލަފާކުރެވޭކަމަށާއި އެހެންނަމަވެސް އަދި ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ފަރާތުން ރަށް މޮނިޓަރިންއަށް ލީ ކަމުގެ ރަސްމީ ލިޔުމެއް ފޮނުވާފައި ނުވާކަމަށެވެ.
"ރަސްމީކޮށް އެޗްޕީއޭއިން އަދި އަންގާފައެއް ނުވޭ އަޅުގަނޑުމެންނަށް، ރަށް މޮނިޓަރިންއަށް ލީ ކަމަށް، އެކަމަކު އެ ހާލަތުގަ މިތިބީ އަޅުގަނޑުމެން،" ނާސިފް ވިދާޅުވިއެވެ.
މުންޑުއިން އެންމެ ފުރަތަމަ ޕޮޒިޓިވްވި ކޭސްތަކަކީ މި މަހުގެ 25 ވަނަ ދުވަހު މާލެ ދިޔަ ތިން ފަރާތެއްކަމަށް ނާސިފް ވިދާޅުވިއެވެ. އަދި އެ ފަރާތްތައް ޕޮޒިޓިވްވީ މާލެއިން ޓެސްޓުކުރުމުންކަމަށް ނާސިފް ވިދާޅުވިއެވެ.
"މާލެއަށް ދިޔަ ތިން ފަރާތެއް އެއީ، އެމީހުން މާލެއިން ޕޮޒިޓިވްވީ، ދެން އެމީހުންނާ ގުޅިގެން މިބުނީ ކޮންޓެކްޓުން ގޮތުގައި ރަށުން ނެގި ރެންޑަމް ނުވަ ސާމްޕަލްއަކުން ހަތް ސާމްޕަލް ޕޮޒިޓިވްވެފަ މިވަނީ، ހަމަ ބެލެވޭ ކޮމިއުނިޓީ ސްޕްރެޑަކާ ހަމަޔަށް ގޮސްފައިކަން މިހާރު މިއޮތީ،" ނާސިފް ވިދާޅުވިއެވެ.
ނާސިފް ވިދާޅުވީ މިހާރު ތިބި ހަތް ކޭސްއާއެކު އަދި ނަތީޖާ ނުލިބޭ ސާމްޕަލްތަކެއްވެސް އެބަ ހުރި ކަމަށެވެ. އަދި މިހާރުވެސް ކޮންޓެކްޓް ޓްރޭސިން މަސައްކަތް ކުރަމުންދާކަމަށް ނާސިފް ވިދާޅުވިއެވެ.
އިތުރަށް ވާހަކަދައްކަވަމުން ނާސިފް ވިދާޅުވީ މުންޑޫއަކީ މީގެ ކުރިން އަދި ދުވަހަކުވެސް މޮނިޓަރިންއަށް ލީ ރަށެއް ނޫންކަމަށާއި އަދި މިފަހަރު މި ފެނުނު ކޭސްތަކަކީ ސަރުކާރުން "ހިފެހެއްޓުމެއް ނެތް ގޮތަށް، ކައުންސިލްތަކަށް ނުބެލޭނެހެން" ދޫދިނުމުގެ ސަބަބުން ފެނުނު ކޭސްތަކެއް ކަމަށެވެ.
"އަޅުގަނޑުމެން ވަރަށް ބަލައިގެން މިހުރިހާ ދުވަހުވެސް މިއުޅުނީ، އަތޮޅު އެހެން ރަށްތަކުން ފެނުނު އިރުވެސް މި ރަށުން ނުފެނޭ، އެއްވެސް ކަހަލަ އުސޫލެއް ނެތި، [ވެކްސިން] ދެ ޑޯޒް ޖެހީމަވެސް ދަތުރުކުރެވޭނެހެން ދޫދިނީމަ ވީ ގޮތް މިއީ އަސްލު، ކައުންސިލަކަށް ނޯވޭ ބެލޭކަށް އެގޮތަށް ދަތުރުކުރާ އިރު، ކައުންސިލަށް ނުހިފެހެއްޓޭހެން ދޫދިނީމަ،" ނާސިފް ވިދާޅުވިއެވެ.