ޑިޒައިން އެންޑް ބިޑް އުސޫލުގެ ދަށުން ހއ. މުރައިދޫ ބަނދަރު ހެދުމުގެ މަޝްރޫއު މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގް ކޮމްޕެނީ (އެމްޓީސީސީ) އާ ހަވާލުކޮށްފިއެވެ.
މިނިސްޓްރީ އޮފް ނޭޝަނަލް ޕްލޭނިން ހައުސިން އެންޑް އިންފްރާންސްޓަކްޗާގެ ފަރާތުން މި މަޝްރޫއު އެމްޓީސީސީއާ ހަވާލުކުރުން އޮތީ ޕްލޭނިން މިނިސްޓްރީގައެވެ.
މި މަޝްރޫއުގައި ޕްލޭނިން މިނިސްޓްރީގެ ފަރާތުން ސޮއިކުރެއްވީ އެ މިނިސްޓްރީގެ ޑިރެކްޓާ ޖެނެރަލް ފާތިމަތު ޝާނާ ފާރޫގުއެވެ. އަދި އެމްޓީސީސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓާ އާދަމް އާޒިމްއެވެ.
މި މަޝްރޫއުގެ ތެރޭގައި ބަނދަރު ފުން ކުރުމާއި 3،546 ކިއުބިކް މީޓަރު ބަނދަރަށް ވަންނަ ނެރު ފުން ކުރުމުގެ އިތުރުން 212 މީޓަރު އެއްގަމު ތޮށި ޖެހުން ހިމެނެއެވެ.
މީގެ އިތުރުން އެރަށު ބަނދަރުގެ 50 މީޓަރު ގައި ގްރޮއިން ޖަހައި 107 މީޓަރު އެގްޒިސްޓިންގް ބްރޭކްވޯޓާ ރިޕްރޮފައިލް ކުރަން ހަމަޖެހިފައި ވެއެވެ. މި މަޝްރޫގެ ތެރޭގައި ހިމެނޭ އިތުރު ކަންކަމުގެ ތެރޭގައި:-
- އެއްގަމު ތޮށިން ބޭރު ތޮއްޓަށް އެރުމަށް ބްރިޖް އެޅުން
- 105 މީޓަރު ރިވެޓްމަންޓް ޖެހުން
- ނެވިގޭޝަން ދެ ލައިޓް ހަރުކުރުން
- 40 މޫރިން ރިންގްސް ހަރުކުރުން
- 10 މޫރިންގް ބޮއި ހަރުކުރުން
- 407 މީޓަރު ބޮޑުހިލައިގެ ބޭރުތޮށި ޖެހުން
- ރޭމްޕް ހެދުން
- ޕޭވްމަންޓް ހެދުން
- 18 މަގުބައްތި ޖެހުން
މުރައިދޫ ބަނދަރުގެ މަސައްކަތަކީ 365 ދުވަހުގެ ތެރޭގައި ނިންމުމަށް ހަވާލު ކުރެވުނު މި މަޝްރޫއުގެ އަގަކީ 33.7 މިލިއަން ރުފިޔާއެވެ.