ށ. ޅައިމަގުގައި ކުޑަކުއްޖަކު ރަހީނުކޮށް، އަނިޔާކުރި މައްސަލާގައި ތިން މީހަކު ހައްޔަރުކޮށްފިއެވެ.
ފުލުހުން "ސަން"އަށް ވިދާޅުވި ގޮތުގައި އެ މައްސަލާގައި އިއްޔެގެ ވަގުތެއްގައި ހައްޔަރުކޮށްފައި ވަނީ ތިން ފިރިހެނުންނެވެ. އެއީ 31 އަހަރުގެ މީހަކާއި 26 އަހަރުގެ ދެ މީހެކެވެ.
އެ މައްސަލައާ ގުޅިގެން ޖެންޑާ މިނިސްޓްރީން "ސަން"އަށް ބުނީ، ރާއްޖޭގެ އުތުރުގެ ރަށެއްގައި 17 އަހަރުގެ ފިރިހެން ކުއްޖަކު ރަހީނުކޮށް އަނިޔާކުރި މައްސަލައެއް، މިދިޔަ ހޯމަ ދުވަހުގެ ރޭ ރިޕޯޓުކޮށްފައިވާ ކަމަށެވެ.
އެ ހިސާބުން ފެށިގެން ފެމިލީ އެންޑް ޗައިލްޑް ޕްރޮޓެކްޝަން ސާވިސް (އެފްސީއެސްސީ)އިން ދަނީ ކުއްޖާއަށް ދޭން ޖެހޭ އިޖުތިމާއީ ހިދުމަތްތައް ފޯރުކޮށްދެމުން ކަމަށް މިނިސްޓްރީން ބުންޏެވެ.