އަލްޖީރިއާގެ އިރުމަތީގައި މިހާރު ރޯވަމުންދާ އަލިފާނުގެ ސަބަބުން އެގައުމުން 42 މީހަކު މަރުވެއްޖެއެވެ.
އަލްޖީރިއާގެ ބޮޑުވަޒީރު ވިދާޅުވި ގޮތުގައި އަލިފާނުގެ ސަބަބުން މަރުވި މީހުންގެ ތެރޭގައި 25 ސިފައިން ހިމެނޭ އިރު، އިތުރު ސިފައިންނަށް އަނިޔާ ލިބިފައިވެއެވެ.
އަލްޖީރިއާގެ 17 ޕްރޮވިންސްއަކުން 100 އަށްވުރެ ގިނަ ސަރަހައްދުގައި އަލިފާން ރޯވެފައިވާ ކަމަށް އެގައުމުގެ ނޫސް އޭޖެންސީއެއްކަމަށް ވާ އޭޕީއެސް އިން އިއްޔެ ރިޕޯޓުކުރިއެވެ.
އެ އަލިފާންގަނޑުތައް ނިއްވުމުގެ ތެރޭގައި މަރުވި ސިފައިންނަށް ރައީސް އަބްދުލްމަޖީދު ތަބޫން ވަނީ ތައުރީފު ކުރައްވާފައެވެ. އަދި އެ ސިފައިން ވަނީ އެގައުމުގެ ބެޖައިއާ އަދި ޓިޒި އޯޒޫ ސިޓީގެ ފަރުބަދައިން 100 އަށް ވުރެ ގިނަ މީހުން ސަލާމަތް ކޮށްފައި ކަމަށް އެމަނިކުފާނު ވިދާޅުވިއެވެ.
އަލްޖީރިއާގެ ފިނިހޫނުމިން އިއްޔެ އާއި މިއަދު 46 ޑިގްރީ ސެލްސިއަސްއަށް މަތިވެފައިވެއެވެ. އަދި ހޫނު މޫސުމާ ދިމާކޮށް، ފަހަކަށް އައިސް ވަރަށް ގިނަ މެޑިޓޭރިއަން ގައުމު ތަކުގެ ޖަންގަލިތަކުގައި ދަނީ އަލިފާން ރޯވެ އަނދަމުންނެވެ.