އަށާރަ އަހަރުގެ އަންހެން ކުއްޖަކަށް ބްލެކްމައިލްކޮށް، އެކުއްޖާ ގޭންގް ރޭޕް ކުރާނެ ކަމަށް ބުނެ އިންޒާރު ދިން މައްސަލައެއް ފެންމަތިވެއްޖެ އެވެ.
އަންހެން ކުއްޖަކަށް އިންޒާރު ދިން ކަމުގެ ތުހުމަތު ކުރެވިފައި ވަނީ މޯލްޑިވްސް ބޮޑީ ބޯޑިން އެސޯސިއޭޝަންގެ ރާޅާ އެޅުންތެރިއެއް ކަމުގައިވާ އިބްރާހިމް ސައިފަށެވެ.
އަންހެން ކުއްޖާގެ ފަރާތުން، ސޯޝަލް މީޑިއާގައި އެވާހަކަ ހިއްސާކުރި އޭނާގެ ބޮޑުދައިތަ ބުނެފައި ވަނީ އަންހެން ކުއްޖާގެ އުމުރުން 17 އަހަރުން ފެށިގެން އޭނާއަށް ބިރުދައްކައި ފުރައްސާރަކުރަމުން އަންނަ ކަމަށެވެ.
އެގޮތުން އަންހެން ކުއްޖާގެ ފޮޓޯތަކެއް ލީކުކޮށްލާނެ ކަމުގެ ބިރު ދައްކައި، ސައިފް ތަފާތު އެކި ނަންބަރުތަކުން ގުޅައި ފުރައްސާރަ ކުރަމުން އަންނަ ކަމަށް ބުނެފައިވެ އެވެ.
އަންހެން ކުއްޖާގެ ނަމުގައި ފޭކު ސޯޝަލް މީޑިއާ އެކައުންޓުތައް ހަދައި، އެކުއްޖާގެ ރައްޓެހިންނަށް ފޮޓޯތައް ފޮނުވުމުގެ އިތުރަށް، އަންހެން ކުއްޖާގެ ފޮޓޯތަކެއް، އެކުއްޖާގެ އާއިލާ މެމްބަރުންނަށް ވެސް ފޮނުވަމުން އަންނަ ކަމަށް ވެސް އާއިލާއިން ބުނެފައިވެ އެވެ.
އެކަމުގެ ސަބަބުން އަންހެން ކުއްޖާއަށް ނަފްސާނީ ގޮތުން ވަރަށް ބޮޑަށް އަސަރުކޮށްފައިވާ ކަމަށް ވެސް ބުންޏެވެ.
އެކަން ހުއްޓުވުމަށް ސައިފްއާ ވާހަކަ ދައްކައިގެން އެއްވެސް ކަހަލަ ފައިދާއެއް ނުވުމުން، ފުލުހުންނަށް މައްސަލަ ވަނީ ހުށަހަޅައިފަ އެވެ.
ފުލުހުންގެ މީޑިއާ އޮފިޝަލް މިއަދު ވިދާޅުވީ، 17 އަހަރުގެ އަންހެން ކުއްޖަކަށް ބިރުދައްކައި ބްލެކްމެއިލް ކުރާ މައްސަލައެއް މިދިޔަ ސެޕްޓެމްބަރު މަހުގެ ތިންވަނަ ދުވަހު ހުށަހަޅާފައިވާ ކަމަށެވެ.
މައްސަލައިގެ ތަހުގީގުގައި ފޮރެންސިކް ހެއްކާއި ގަރީނާ ހޯދަފައިވާ ކަމަށާއި، އަދި މައްސަލަ ޕްރޮސެކިއުޓަ ޖެނެރަލްގެ އޮފީހަށް ފޮނުވުމަށްޓަކައި ކުރަންޖެހޭ އެންމެ ފަހުގެ މަސައްކަތްތައް ފުލުހުން މިހާރު ކުރަމުން އަންނަ ކަމަށް އޮފިޝަލް ވިދާޅުވި އެވެ.
"ކުއްޖާގެ ރައްކާތެރިކަން ކަށަވަރުކޮށް، ބޭނުންވާ އެހީތެރިކަން ފޯރުކޮށްދިނުމަށް އަޅަންޖެހޭ ފިޔަވަޅުތައް ވަނީ އަޅާފައި،" އޮފިޝަލް ވިދާޅުވި އެވެ.
އަންހެން ކުއްޖާގެ ފޮޓޯތައް ލީކުކޮށްލާނެ ކަމުގެ އިންޒާރު ދޭ އޯޑިއޯއެއް ވެސް އާއިލާ އިން ވަނީ އާންމުކޮށްފަ އެވެ. ފޮޓޯ ލީކު ކޮށްލާނެކަމުގެ އިންޒާރުގެ އިތުރުން، މާލެ އަތުވެއްޖެނަމަ "ކޮއްކޮ އާ ކޮއްކޮ ހިސާބުގަނޑު މީހުން ވެގެން ހޭއަރުވާލާނެ" ކަމުގެ އިންޒާރު ވެސް ދީފައިވެ އެވެ.
އަދި އަންހެން ކުއްޖާގެ ދެ ފޮޓޯއެއް ގްރޫޕަކަށް ލާފައިވާނެ ކަމަށާއި، އެ ދެ ފޮޓޯ 10،500 އަށް ވުރެ ގިނަ މީހުން ބަލާފައިވާ ކަމަށާއި، އަދިވެސް 50 އަށް ވުރެ ގިނަ ފޮޓޯ ހުރި ކަމަށް ބުނެ އާއިލާއަށް އިންޒާރު ދޭ އޯޑިއޯ އެއް ވެސް އާންމުކޮށްފައިވެ އެވެ
އެ މައްސަލައިގައި ބޮޑީ ބޯޑިން އެސޯސިއޭޝަނުން ވަނީ ސައިފް އާމެދު ފިޔަވަޅު އަޅައިފަ އެވެ.
އެ އެސޯސިއޭޝަނުން ނެރުނު ބަޔާނެއްގައި ބުނެފައި ވަނީ، ސައިފް އާ ގުޅުވައިގެން ސޯޝަލް މީޑިއާގައި ދައުރުވަމުން އަންނަ ވާހަކަތަކަކީ ތެދެއް ކަމަށްވާނަމަ، އަދި އެފަދަ ކަމެއް ސައިފް ކޮށްފައި ވާނަމަ އެކަން ހަރުކަށި އިބާރާތުން ކުށްވެރި ކުރާ ކަމަށެވެ.
އެ މައްސަލައިގައި ކުއްލި ބައްދަލުވުމެއް ބާއްވައި، ކަމާބެހޭ ފަރާތްތަކުން މައްސަލައިގެ ތަހުގީގު ނިންމައި ވަކި ގޮތަކަށް މައްސަލަ ނިމެންދެން، އެ އެސޯސިއޭޝަނުން އިންތިޒާމުކުރާ ހުރިހާ ހަރަކާތްތަކަކުން އޭނާ ވަނީ ސަސްޕެންޑުކޮށްފަ އެވެ. އަދި މައްސަލަ ނިމޭ ގޮތަކަށް ބަލައި، އަޅަންޖެހޭ އިތުރު ފިޔަވަޅު އަޅާނެ ކަމަށް ވެސް ބަޔާނުގައިވެ އެވެ.
އެމްބީބީއޭ އިން ބުނީ ސައިފްގެ އެ އަމަލަކީ އެ އެސޯސިއޭޝަނުން އެއްގޮތަކަށް ވެސް ބަލައިގަންނަ އަމަލެއް ނޫން ކަމަށެވެ.