ގެދޮރު އިމާރާތް ކުރުމަކީ އަމިއްލަ ވިޔަފާރިއަކަށް ވާތީ، އެތަންތަނުގެ ކުލި ކަނޑައެޅުން ފަދަ ކަންކަމަކީ ރައްޔިތުންގެ މަޖިލީހުގެ ކޮމިޓީއަށް ކުރެވޭނެ ކަމެއް ނޫން ކަމަށް އަންގައިފި އެވެ.
އަށް ސަތޭކައަށް ވުރެ ގިނަ މީހުންގެ ސޮޔާ އެކު މާލޭގައި ކުލި ދައްކައިގެން އުޅޭ މީހުންގެ ޔޫނިއަން، މާލޭ ޓެނަންޓްސް ޔޫނިއަން (އެމްޓީޔޫ)ގެ ފަރާތުން ކުލި ކޮންޓްރޯލް ކުރަން ގޮވާލާ މިދިޔަ އަހަރުގެ މާޗު މަހު ވަނީ ރައްޔިތުންގެ މަޖިލީހަށް ޕެޓިޝަނެއް ހުށަހަޅައިފަ އެވެ.
ޕެޓިޝަންގައި މަޖިލިސް މެމްބަރެއްގެ ގޮތުގައި ސޮއި ކުރެއްވީ ކެންދޫ ދާއިރާގެ މެމްބަރު އަލީ ހުސެއިނެވެ.
އެ ޕެޓިޝަނުގައި ބުނެފައި ވަނީ މާލޭގައި ދިރިއުޅެމުންދާ މީހުންގެ 63 ޕަސެންޓަކީ ނުވަތަ މެޖޯރިޓީއަކީ ކުއްޔަށް ދިރިއުޅޭ ރައްޔިތުންނަށް ވީހިނދު، މި ރައްޔިތުންނަށް ލިބޭ އާމްދަނީއާ ނުބައްދަލު މިންވަރެއް ކުއްޔަށް ހޭދަކުރުމަކީ ބޭއިންސާފެއް ކަމަށެވެ. އަދި މިހާ ބޮޑު ހޭދައެއް ހަމައެކަނި ކުއްޔަށް ދައްކާ، މަދު ބަޔަކު މުއްސަނދި ކުރުމަށް ހޭދަކުރާނަަމަ ފަގީރުކަމުން އަރައިނުގަނެވޭނެ ކަމަށް ވެސް އެ ޕެޓިޝަނުގައި ބުނެފައިވެ އެވެ.
އެ ޕެޓިޝަން ދިރާސާކުރީ ރައްޔިތުންގެ މަޖިލީހުގެ ޕެޓިޝަން ކޮމިޓީންނެވެ. ޕެޓިޝަން ދިރާސާކުރުމަށް ފަހު މި މަހުގެ 24 ވަނަ ދުވަހު ރައްޔިތުންގެ މަޖިލީހުގެ އަމީން އާންމުގެ ސޮއިކުރައްވައި ފޮނުވި ޖަވާބު ސިޓީގައި ވިދާޅުވެފައި ވަނީ އެ ޕެޓިޝަނުގައި ބަޔާންކޮށްފައިވާ މައްސަލައާ ގުޅޭ ގޮތުން ބޭންކް އޮފް މޯލްޑިވްސް (ބީއެމްއެލް)ގެ ކަމާގުޅޭ ފަރާތްތަކާ ކޮމިޓީން ބައްދަލުކޮށް މައުލޫމާތު ސާފުކުރި ކަމަށެވެ.
ސިޓީގައި ބުނެފައި ވަނީ ބީއެމްއެލް އިން ދޫކުރާ ލޯނުތަކުގެ އިންޓްރެސްޓް ރޭޓް ކަނޑައެޅުމުގައި އެ ބޭންކަށް ހުރި ރިސްކްތަކަށާއި ލޯން ޕްރޮޑަކްޓްސް ބައްޓަން ކުރެވިފައިވާ ގޮަތަށާއި، އަދި އޭގެ ކެޓަގަރީތަކަށް ވެސް ރިއާޔަތްކުރާ ކަމަށް ބޭންކުން ބުނެފައިވާ ކަމަށެވެ.
އަދި މާލޭގައި އިމާރާތްކުރާ ގެދޮރުތަކަކީ އެކި ފެންވަރަށް އިމާރާތްކުރާ ތަންތަނަށް ވާތީ، އެކި ލޯންތަކަށް ދައްކަން ޖެހޭ އަދަދު ކަނޑައަޅަނީ އެ ނަގާ ލޯނުގެ ނިސްބަތުން ކަމަށް ވެސް ބީއެމްއެލް އިން ބުނެފައިވާ ކަމަށެވެ.
"ގެދޮރު އިމާރާތް ކުރުމުގެ ދާއިރާ އަކީ ބައެއްގެ އަމިއްލަ ވިޔަފާރިއަކަށް ވެފައި، ގެދޮރުގެ ކުލި ކަނޑައެޅުމަކީ އެ އިމާރާތްކުރާ ބަޔަކު ނުވަތަ ގޯތީގެ ވެރިފަރާތުގެ އަމިއްލަ އިހުތިޔާރުގައި ނިންމާ ނިންމުމަކަށް ވީހިނދު، އަމިއްލަ ފަރާތްތަކުން ކުރާ މިފަދަ ވިޔަފާރިތަކަށް ގޮތް ނިންމުމަކީ ކޮމިޓީއަށް ކުރެވޭނެ ކަމެއް ނޫންކަމުގައި އެ ކޮމިޓީން ދެކެވަޑައިގަންނަވާތީ އެ ވާހަކަ ދެންނެވީމެވެ." ސިޓީގައިވެ އެވެ.
ކުލީގެ މައްސަލައަށް އެކަށީގެންވާ ގޮތެއްގެ މަތިން ފިޔަވަޅު އަޅައި ހައްލު ކުރުމަށް މަޖިލީހުންނާއި ސަރުކާރުން މަސައްކަތް ނުކުރާކަން އެމްޓީޔޫއިން ފާހަގަކޮށްފައިވެ އެވެ. އަދި ކުލީގެ މައްސަލައަކީ މަޖިލީހުންނާއި ސަރުކާރުން ވަގުތުން ވަގުތަށް ވެސް ފިޔަވަޅު އަޅަން ޖެހޭ ސީރިއަސް މައްސަލައެއް ކަމަށާއި މިހާރު ވެސް ގިނަ ބަޔަކަށް ލިބޭ އާމްދަނީއާ ނުބައްދަލު އަދަދެއް ކުއްޔަށް ހޭދަކުރަމުންދާކަން ފާހަގަ ކޮށްފައިވެ އެވެ.
ޓެނެންޓްސް ޔުނިއަންއަކީ ކުއްޔަށް ދިރިއުޅެމުން އަންނަ މީހުންނަށް ދިމާވާ އުނދަގޫތައް ހިއްސާކުރުމަށާއި ކުއްޔަށް ދިރިއުޅޭ މީހުންގެ އަޑަށް ރަސްމީ ސިފައެއް ގެނެސްދިނުމަށް 2019 ވަނަ އަހަރުގެ އޮކްޓޫބަރު މަހުގެ 15 ވަނަ ދުވަހު އުފައްދާފައިވާ ޖަމިއްޔާއެކެވެ.
އެމްޓީޔޫއިން ކުލި ކޮންޓުރޯލު ކުރުމަށް ގޮވާލާ ޕެޓިޝަންގައި ސޮއި ކުރުމުގެ މަސައްކަތް ފެށީ ސަރުކާރުން މަޖިލީހަށް ކުއްޔާ ބެހޭ ބިލެއް ހުށަހަޅާފައި ވަނިކޮންނެވެ. ނަމަވެސް އެ ބިލުގައި ކުލި ކޮންޓުރޯލު ކުރުމުގެ ވާހަކަ ނެތުމުން ގިނަ ބަޔަކު ވަނީ ފާޑުކިޔައިފަ އެވެ.