އިސްރާއިލަށް ދާއީދުކޮށް ސޯޝަލް މީޑިއާގައި ޕޯސްޓު ކުރި، ށ. ޅައިމަގު ސްކޫލުގައި ކިޔަވައިދޭ އިންޑިއާ ޓީޗަރު އެ ރަށުން ބާލައިފި އެވެ.
ސޯޝަލް މީޑިއާގައި ކުރި ޕޯސްޓާ ގުޅިގެން އެ ޓީޗަރު ހުރީ އިއްޔެ ސަސްޕެންޑު ކޮށްފަ އެވެ. ޅައިމަގު ސްކޫލުގެ ޕްރިންސިޕަލް މުހައްމަދު ފަޔާޒު އިއްޔެ "ސަން" އަށް ވިދާޅުވީ އެ ޓީޗަރުގެ މައްސަލަ އެޑިއުކޭޝަނުން ބަލަމުންދާ ކަމަށެވެ.
އެ ޓީޗަރު ރަށުން ބާލާފައިވަނީ ރަށުގެ ރައްޔިތުން ހިތްހަމަނުޖެހުން ފާޅުކޮށް، އޭނާ އެ ރަށުން ބާލަން ގޮވާލުމާ ގުޅިގެން ކަމަށް ފުލުހުން ބުންޏެވެ. ފުލުހުން ބުނީ އެ ޓީޗަރު ރައްކާތެރިކަމާއެކު ފުލުހުންގެ ބެލުމުުގެ ދަށުން ރޭ އެ ރަށުން ބާލާފައިވާ ކަމަށެވެ.
ޅައިމަގު ސްކޫލުގެ ޓީޗަރަކާމެދު ރައްޔިތުން ހިތްހަމަ ނުޖެހުން ފާޅުކޮށްފައިވާ އިރު އެފަދަ މައްސަލައެއްގައި ހދ. ހަނިމާދޫ ސްކޫލުގައި ކިޔަވައިދޭ އިންޑިއާ ޓީޗަރަކާ މެދު ވެސް ވަނީ ފިޔަވަޅު އަޅައިފަ އެވެ. އެ ސްކޫލުން ނިންމާފައިވަނީ އެ ޓީޗަރު އަނބުރާ ގައުމަށް ފޮނުވާލުމަށެެވެ.