ފާއިތުވި ދެތިން ހަފްތާގައި ނޫސްތަކާއި އާންމުންގެ މެދުގައި ވެސް އެންމެ ބޮޑަށް ވާހަކަ ދެއްކީ އަންނަނީ ދައުލަތުން މަންދު ކޮލެޖަށް ބަދަލު ދޭ މައްސަލައިގަ އެވެ. އޮޑިޓާ ޖެނެރަލް ތައްޔާރުކޮށްފައިވާ އެސެސްމަންޓުގައި މަންދަށް ބަދަލުގެ ގޮތުގައި ދޭންޖެހޭ ކަމަށް އަންދާޒާ ކުރި އަދަދަށް ވުރެ އެތައް ގުނައެއް ބޮޑުކޮށް ބަަދަލު ދޭން ދައުލަތުން އެއްބަސްވެފައިވާކަން ހާމަވުމާ ގުޅިގެން ސަރުކާރަށް ބޮޑެތި ފާޑުކިޔުންތަކެއް ވަނީ އަމާޒުވެފަ އެވެ. އަދި އެ މައްސަލައިގައި އެޓާނީ ޖެނެރަލްގެ އޮފީހާއި އެޑިއުކޭޝަން މިނިސްޓްރީން ދައްކާ ވާހަކަ ދިމާނުވާތީ، އިތުރު ސުވާލުތަކެއް އޮތީ އުފެދިފަ އެވެ.
އެެހެންކަމުން ގިނަ ބަޔަކު އުންމީދުކޮށްގެން ތިބީ ރޭ ރައީސް އޮފީހުގެ ފަރާތުން ބޭއްވި ނޫސްވެރިންގެ ބައްދަލުވުމުގައި އެ ސުވާލުތަކަށް ޖަވާބު ލިބިގެންދާނެ ކަމަށެވެ. ނަމަވެސް ފެނިގެން ދިޔައީ، މަންދާ ގުޅޭގޮތުން ނޫސްވެރިން ކުރި ކޮންމެ ސުވާލަކުން ރައީސުލްޖުމްހޫރިއްޔާގެ ލީގަލް ކައުންސެލް، އަހުމަދު އަބްދުﷲ އަފީފް ރެކިވަޑައިގެންނެވި މަންޒަރެވެ. މަންދާ ގުޅޭ ހަމަ އެންމެ ސުވާލަކަށް ވެސް ޖަވާބެއް ނުދެއްވި އެވެ. ވިދާޅުވީ ޕްރެސްގައި އޮތީ ވަކި ވަކި މައްސަލަތަކާ ގުޅޭގޮތުން ވާހަކަ ދެއްކުން ނޫން ކަމަށެވެ. ސުވާލުތަކުން ރެކިވަޑައިގަތުމަށް ރައީސް އޮފީހުގެ ތަރުޖަމާނު މަބްރޫކް އަޒީޒް ބޭނުންކުރެއްވީ މަންދު މައްސަލައިގައި އެޓާނީ ޖެރެނަލްގެ އޮފީހުން ނެރޭނެ ކަމަށް ބުނާ ބަޔާނެކެވެ. ކޮންމެ ސުވާލެއްގެ ޖަވާބު ވެސް އެ ބަޔާނުގައި އޮންނާނެ ކަމަށް ވިދާޅުވި އެވެ. ދެން އެހެންވީ އިރު ކީއްކުރަން ބާއްވާ ޕްރެސްއެއް ހެއްޔެވެ؟
މަންދުގެ މައްސަލައިގައި ނޫސްވެރިން ސުވާލުކުރާތާ ހަފްތާއެއް ވެގެން ދިޔަ އިރުވެސް އެޓާނީ ޖެނެރަލްގެ ފުރިހަމަ ޖަވާބެއް މިހާތަނަށް ވެސް ލިބިފައެއް ނުވެ އެވެ. އެޑިއުކޭޝަން އިން ބުނަނީ މަންދަށް ދޭ ބަދަލަކީ އެޓާނީ ޖެނެރަލްގެ އޮފީހުގެ ނިންމުމެއް ކަމަށެވެ. އޭޖީ އޮފީހުން ބުނަނީ އެއީ އެޑިއުކޭޝަންގެ ސްޓޭންޑެއް ކަމަށެވެ. އަސްލު ސްޓޭންޑު ނެނގީ ކޮބައެއްކަން ވެސް ސާފެއް ނުވެ އެވެ.
އެ މައްސަލައިގައި އޭޖީގެ ބަހެއް ހޯދަން ގުޅުމުން ފުރަތަމަ ލިބުނު ޖަވާބަކީ، އެ މައްސަލައިގައި ސަރުކާރުން ޕްރެސް އެއް ބާއްވާއި ސުވާލުތަކަށް ޖަވާބު ދޭނެ ވާހަކަ އެވެ. ރޭގައި ގިނަ ނޫސްވެރިން އެ މައްސަލައާ ގުޅޭގޮތުން ސުވާލުތައް އަމާޒުކުރީ ވެސް ކުރިން އެގޮތަށް މައުލޫމާތު ދީފައި ވާތީ އެވެ. ނަމަވެސް ޕްރެސްގައި ބުނީ ބަޔާނަކުން ސުވާލުތަކަށް ޖަވާބު ދޭނެ ވާހަކަ އެވެ.
ރޭގެ ޕްރެސްގައި މަންދު ކޮލެޖާ ގުޅޭ އެއްވެސް ސުވާލަކަށް ޖަވާބު ލިބިގެން ނުދިޔައީ، އެ މައްސަލައިގައި އަހުމަދު އަބްދުﷲ އަފީފްގެ މަސްލަހަތު ހިމެނޭތީ އެވެ. އަހްމަދު އަފީފަކީ ސެޓްލަމަންޓް ކޮމިޓީގައި އިންނަވާ ބޭފުޅެކެވެ. އަދި މައްސަލައިގައި މަންދު ކޮލެޖު ތަމްސީލުކުރާ ލޯ ފާމުގެ ހިއްސާދާރެއް ވެސް މެއެވެ. އޭގެ އިތުރަށް، އޭނާ އަކީ މަންދުގެ ޗެއާމަން އިބްރާހިމް އިސްމާއިލް (އިބްރާ) ގެ އަނބިކަނބަލުންގެ ކޮއްކޮ އެވެ.
ނޫސްވެރިން އެ ސުވާލު ކުރިމަތިކުރުމުން އަހްމަދު އަފީފް ވަނީ މައްސަލައިގައި އޭނާގެ މަސްލަހަތު ހިމެނޭކަމަށް އެއްބަސްވެވަޑައިގެންފަ އެވެ. ނަމަވެސް ދިފާއުގައި ވާހަކަ ދެއްކެވި އެވެ. މަންދުގެ ވާހަކަ ދައްކަވަން ވަޑައިނުގެންނެވި ނަމަވެސް، މަސްލަހަތާ ގުޅޭ ސުވާލުން ދިފާއުވާން އިންނެވީ ތައްޔާރަށެވެ.
އަހްމަދު އަފީފް ވިދާޅުވީ، ސެޓްލްމަންޓް ކޮމިޓީގައި މަންދުގެ މައްސަލަ ކުރިއަށް ދިޔަ އެއްވެސް ދުވަހެއްގައި، ކޮމިޓީގައި ބައިވެރިވަޑައިގެންފައި ނުވާނެ ކަމަށެވެ. އަދި އެ މައްސަލައިގައި ސަރުކާރުން ނިންމި އެއްވެސް ނިންމުމެއްގައި ބައިވެރިވެސް ނުވާ ކަމަށެވެ.
"މަސްލަހަތު ފުށުއަރާނެކަން އެނގޭތީ، މަސްލަހަތު ފުށުއަރާނެ މީހަކު އެ ކަހަލަ ތަނެއްގައި ހުންނަ ކަމަށް ވަންޏާ އުޅެން ޖެހޭ ގޮތަށް އުޅުނީ. އެގޮތަށް އަޅުގަނޑު އަމަލު ކޮށްފައި ވާނެ،" އޭނާ ވިދާޅުވި އެވެ.
ދެން ވިދާޅުވީ ޕްރެސްގައި ވެސް މަންދު ކޮލެޖާ ގުޅޭ އެއްވެސް ސުވާލަކަށް ޖަވާބު ދެއްވެން ނެތީވެސް އެ ސަބަބާ ހެދި ކަމަށެވެ.
މަސްލަހަތު ފުށޫއަރާ ބޭފުޅަކު ޕްރެސްގައި ބައިވެރިވެވަޑައިގެން، އެ މައްސަލައާ ގުޅޭ އެއްވެސް ސުވާލަކަށް ޖަވާބު ނުދެއްވާތީ ރޭ ނޫސްވެރިން ވަނީ ވަރަށް ބޮޑަށް ކަނބޮޑުވުން ފާޅުކޮށްފަ އެވެ. އަހުމަދު އަފީފް ޕްރެސްގައި ބައިވެރިވެވަޑައިގަތީ ދައުލަތުން ބަދަލު ދިނުމާ ގުޅޭ ކަންކަން ސާފުކޮށްދިނުމަށެވެ. އެހެންކަމަށް ވާނަމަ، މިވަގުތު ހޫނުވެފައިވާ މައްސަލައަށް އެޑްރެސް ނުކުރެވޭ ބޭފުޅަކު ޕްރެސްގައި ބައިވެރިކުރުމުގެ ބޭނުމަކީ ކޮބައިހެއްޔެވެ؟ ހުރިހާ ސުވާލަކަށް ޖަވާބު ދެވޭނެ ބޭފުޅަކު ބައިވެރިކުރުމުގައި އޮތީ ކޮން އުނދަގުލެއް ހެއްޔެވެ؟ މަންދަށް ބަދަލު ދިނުމާ ގުޅޭ މައްސަލައިގައި ޖަވާބު ދޭން އަދިވެސް ސަރުކާރަށް ތައްޔާރު ނުވެވެނީ ހެއްޔެވެ؟ އެޑިއުކޭޝަން މިނިސްޓްރީ އާއި އޭޖީ އޮފީހާއި ރައީސް އޮފީހުން މައްސަލައިގައި އެކައްޗެއް ކިޔަން އަދިވެސް ވަގުތު ބޭނުންވަނީ ހެއްޔެވެ؟
މަންދު ކޮލެޖް ހިންގާ މާލޭ ހައި ޕްރައިވެޓް ލިމިޓެޑާއެކު އެޑިއުކޭޝަން މިނިސްޓްރީއިން 10 އަހަރު ދުވަހުގެ އެއްބަސްވުމެއް ހެދީ 28 ޑިސެމްބަރު، 2008 ގަ އެވެ. އެތަން މާލޭ ހައިއަށް ދިނީ އިންޓަނޭޝަނަލް ސުކޫލެއް ހިންގާށެވެ. ނަމަވެސް، އެއްބަސްވުމުގައިވާ ގޮތަށް ސްކޫލު ނުހިންގާ ކަމަށް ބުނެ ޖެނުއަރީ 25، 2015 ގައި އެޑިއުކޭޝަން މިނިސްޓްރީން ވަނީ އެ އެއްބަސްވުން ބާތިލްކޮށްފަ އެވެ.
އެ މައްސަލަ މާލޭ ހައި ކުންފުނިން ސެޕްޓެމްބަރު 20، 2016 ގައި ސިވިލް ކޯޓަށް ހުށަހެޅި އެވެ. އެދުނީ ގެއްލުމުގެ ބަދަލާއި ވަކީލު ފީ ނަގައިދިނުމަށެވެ. ނަމަވެސް، އޮގަސްޓް 29، 2017 ގައި ސިވިލް ކޯޓުން ހުކުމް ކުރީ މާލޭ ހައިއަށް ގެއްލުމުގެ ބަދަލާއި ވަކީލު ފީ ނަގައިދެވޭނެ ތަނެއް ނެތް ކަމަށެވެ.
ސިވިލް ކޯޓުގެ ހުކުމް ހައި ކޯޓުގައި އިސްތިއުނާފުކުރުމުން އެ ކޯޓުން ނިންމާފައި ވަނީ، އެއްބަސްވުން އުވާލާފައި ވަނީ މާލޭ ހައި ޕްރައިވެޓް ލިމިޓެޑާ އެކު ވެފައިވާ އެއްބަސްވުމާ ހިލާފަށް ކަމަށެވެ. އަދި އެކަމުގެ ސަބަބުން އެ ކުންފުންޏަށް ލިބޭ ގެއްލުމުގެ ބަދަލު ހޯދަން ދައުލަތުގެ މައްޗަށް ދައުވާކުރުމުގެ ހައްގު މާލޭ ހައި ކުންފުންޏަށް ލިބިގެންވާ ކަމަށް ނިންމާފައިވެ އެވެ. އެކަމަކު ގާނޫނީ ވަކީލުންގެ ފީއަށް ހަރަދުވި 53،000 ރުފިޔާ ނަގައިނުދެވޭނެ ކަމަށް ހައިކޯޓުގެ ހުކުމުގައިވެ އެވެ.
ދައުލަތުން ހައިކޯޓުގެ ހުކުމް ސުޕްރީމް ކޯޓުގައި އިސްތިއުނާފު ކުރުމުން، އެމްއީއެސްގެ އިމާރާތް މަންދު ކޮލެޖާ ހަވާލު ކުރި އެއްބަސްވުން ބާތިލްކޮށް އެތަން އެ ކޮލެޖުގެ އަތުން އަތުލީ ގޯސްކޮށް ކަމަށް ސުޕްރީމް ކޯޓުންވެސް ވަނީ ހުކުމް ކޮށްފަ އެވެ.
މާލެ ހައި ޕްރައިވެޓް ލިމިޓެޑަށް 15 މިލިއަން ރުފިޔާ ބަދަލުގެ ގޮތުގައި ދިނުމަށް ސަރުކާރުން އެއްބަސްވީ، އެކުންފުނީގެ ފަރާތުން ސިވިލް ކޯޓަށް 18 މިލިއަން ރުފިޔާގެ ބަދަލު ނަގައިދިނުމަށް އެދި، ހުށަހެޅުމުން ޑިސްޕިއުޓް ރިޒޮލިއުޝަން މަރުހަލާގަ އެވެ. އެއާއެކު ސިވިލް ކޯޓުން ހުކުމް ކުރީ އެއް މަސް ދުވަސްތެރޭ އެ ފައިސާ ދައުލަތުން އެ ކުންފުންޏަށް ދެއްކުމަށެވެ.
ނަމަވެސް މިދިޔަ އޮގަސްޓު މަހު އެޑިއުކޭޝަން މިނިސްޓްރީގެ އެދުމަށް އޮޑިޓް އޮފީހުން ތައްޔާރު ކުރި އެސެސްމަންޓުގައި ބުނެފައި ވަނީ ބަދަލުގެ ގޮތުގައި އެންމެ ބޮޑުވެގެން ވެސް މަންދަށް ދޭން ޖެހޭނީ 1.5 މިލިއަނެއްހާ ރުފިޔާ ކަމަށެވެ. އޮޑިޓަ ޖެނެރަލްގެ ލަފަޔާ ހިލާފަށް، އެތައް މިލިއަނެއް ބޮޑު އަދަދަކުން ބަދަލު ދޭން ދައުލަތުން އެއްބަސްވީ ކީއްވެކަން އަދިވެސް އޮތީ ސާފު ނުވެ އެވެ. އެ ސުވާލަށް ރޭވެސް ޖަވާބެއް ނުލިބުނެވެ.